Yehova Asininkiziizie Nangue Wakaba Kufikilizia Bulayo Bwakue bwa Kuleeta Paradiso

1. Kabika Isaya waabalandile ki Baisraeli benakue?

KABIKA Isaya waalandile nangue Yehova ni “Leeza wa kisinka.” Bulanzi bupilibuilue na “kisinka,” mulandu kwa mulandu, buli na mana ya “amen.” (Is. 65:16, bulondolozi bwa pensina.) Mulandu “amen” uli na mana ya “kibe evio” ao “kakiine.” Musita mulandu “amen” luuli wabombiiwa mu Bibilia palwakue Yehova ao palwakue Yesu, keekio kili kyasininkizia nangue kintu ni kya kisinka. Pakaako, Isaya waabalandile eevi Baisraeli benakue: Kine Yehova walanda kintu ntaanzi, lyonse kili kyakitika. Yehova ali walangilila nangue keekio ni kisinka kupitila kufikilizia bintu byonse byali walaya.

2. Juu ya ki kunti twaswapila bulayo bonse bwakue Yehova palua musita weetu uli waiza, kabili ni biipuzio ki bituli kulondoluela?

² Eba, ni fwefue kunti twaswapila nangue bulayo bonse bwakue Yehova palua musita weetu uli waiza bwakaba kufikiliziiwa? Mu peepi ni miaka 800 kisia musita wakue Isaya, mutumua Paulo waalondoluele juu ya ki bulayo bwakue Yehova buli bwafikiliziiwa lyonse. Paulo waalandile eevi: “Leeza taviinda kulanda bufi.” (Baeb. 6:18) Kasulo kamo tekaviinda kufumia menda aweeme pamo ni menda a kikelekele. Evio vyenka, Yehova, Nsulo ya kisinka, taviinda kulanda bufi. Pakaako, kunti twaswapila nangue kila kintu kili kyalanda Yehova kili kyafikiliziiwa, kubiika mukati ni bulayo bwakue bonse palua musita weetu uli waiza. Mu leeli lyasi, tuli kulondoluela palua beebi bipuzio: Yehova alaile kutupeela ki musita uli waiza? Kabili, ni busininkizio ki bwatupeele bulangiliile nangue wakaba kufikilizia bulayo bwakue musita uli waiza?

YEHOVA ALAILE KUTUPEELA KI?

3. (a) Ni bulayo ki bwa mana saana ku bantu bonse bakue Leeza? (Nfyulo 21:3, 4) (b) Musita utuli twabasimikila bange palua bobo bulayo, bali bakita siani?

³ Tuli kulondoluela bulayo bwa mana saana ku babombi bonse bakue Leeza mwaya kyalo. (Soma Nfyulo 21:3, 4.) Yehova alaile nangue musita umo “lufu telukabako kabili, kabili tekukaba malilo, aosie kulila ao misa tebikabako kabili” (NWT). Bengi pakati keetu bali babombia leeli lileembo lya kuteekia mutima palua buikazi vibwakaba mu Paradiso musita ubali babasimikila bange. Musita utuli twasimikila bange palua bobo bulayo, bali bakita siani? Paange kunti balanda eevi: “Beebi bintu biweeme saana, inzi nsiswapiile nangue byakakitika.”

4. (a) Yehova waamanine kabili waamwene ki ntaanzi? (b) Kukila pa bulayo, ni kiki kinge kyaakitile Yehova?

⁴ Kupitila mupasi wakue utakatiifu, Yehova waamutunguluile mutumua Yoane eevi aleembe palua bulayo bulangiliile buikazi vibwakaba mu Paradiso. Lwaakitile evio, Yehova abanga wamanine nangue ni fwefue loonu kunti twatona kubabuilako bange palua keekio kiswapilo musita utuli twabasimikila mpunda ya Bukolo. Kabili, Yehova waamwene ntaanzi nangue bantu bengi bakamona kyakolele kuswapila bobo bulayo bwa “bintu bya leenu.” (Is. 42:9; 60:2; 2 Bakor. 4:3, 4, NWT) Pakaako, eba kunti twabasininkiziizia siani bange, kabili kunti twaisininkiziizia siani fwe beene nangue mpaalo ilondoluelue mu Nfyulo 21:3, 4 yakaba kufikiliziiwa? Yehova taatupeelesie bobo bulayo bwa kuteekia mutima, inzi atupeele ni nsaambu isininkiziizie, eevi kutukwasia tuswapile nangue wakaba kufikilizia bobo bulayo. Ni nsaambu ki yatupeele?

NSAAMBU ISININKIZIIZIE NANGUE YEHOVA WAKABA KUFIKILIZIA BULAYO BWAKUE

5. Ni milongo ki yalondoluela bintu byakutukwasia kuswapila bulayo bwakue Leeza, kabili ezio milongo ilandile siani?

⁵ Mu mulongo wa 5 ni wa 6, muli nsaambu isininkiziizie nangue Yehova wakaba kufikilizia bulayo bwakue bwa kuleeta Paradiso. Twasoma eevi: “Olia waali waikeele mu kitebe kya Bukolo waanganine: ‘Mona! nakita bintu byonse kuba bya leenu.’ Kabili waanganine: ‘Leemba, paantu twebo twane ni twa kisinka, kabili twa kuketekelua.’ Kabili waatwaliliile kungana: ‘Twakitika! Ndi Alfa ni Omega! I kulanda nangue, wa mambo ni wa mpeleezio.’”—Nfy. 21:5, 6a.

6. Juu ya ki milandu ili mu Nfyulo 21:5, 6 yatukwasia tukile kuswapila bulayo bwakue Leeza?

⁶ Juu ya ki ezio mpunda ili mu Bibilia yatukwasia kukila kuswapila bulayo bwakue Leeza? Kitabu Ufunuo—Upeo Wao Mtukufu U Karibu! kilandile eevi palua ezio milongo: “Kili nga evelia Yehova ali mukubabiikila bantu ba kisinka sinyatire ao kipapie kya kusininkizia palua mpaalo ya musita uli waiza.”b Bulayo bwakue Leeza buli mu Nfyulo 21:3, 4. Inzi kisia, mu mulongo wa 5 ni wa 6, muli milandu ili nga evelia sinyatire yakue Yehova ya kutusininkiziizia nangue bulayo bwakue bwakaba kufikiliziiwa kakiine. Ale tumone milandu ibombiizie Yehova eevi kutusininkiziizia nangue tupalile kumuswapila.

7. Naani watendeka kulanda milandu ili mu mulongo wa 5, kabili juu ya ki tupalile kuswapila ezio milandu?

⁷ Mulongo wa 5 watendeka na eezi milandu: “Olia waali waikeele mu kitebe kya Bukolo waanganine.” (Nfy. 21:5a) Eezi milandu iibeleele paantu yazimbulua mara imo pakati ka mara itatu sie ilondolwelue mu kitabu kya Nfyulo musita Yehova lwabanga walanda kupitila bimonua. Bobo busininkizio te buleetelue na malaika wa maka, kabili te buleetelue na Yesu, inzi bwaleetua na Yehova muine! Keekio kilangiliile juu ya ki tupalile kuswapila bulondolozi bukoonkelepo bolia bulandilue na Yehova. Juu ya ki? Paantu Yehova ni Leeza “asili wabeepa.” (Tit. 1:2) Pakaako, milandu itwasoma mu Nfyulo 21:5, 6 yakaba kukitika kakiine.

“MONA! NAKITA BINTU BYONSE KUBA BYA LEENU”

8. Yehova walanda siani eevi kusininkizia saana nangue wakaba kufikilizia bulayo bwakue? (Isaya 46:10)

⁸ Loonu, tulondoluele palua mulandu “Mona!” (Nfy. 21:5) Mulandu wa Kigiriki upilibwilue “mona!” ubombiiziwe lingi mu kitabu kya Nfyulo. Kalangi ka kupapa kali pa ozo mulandu, kabombiiziwe eevi kumulanda olia ali mukusoma “apoozeko saana maano ku milandu ikoonkelepo.” Kisia paapo, Leeza walanda siani? Walanda eevi: “Nakita bintu byonse kuba bya leenu.” Kulanda kisinka, Yehova ali mukulanda palua bupilibuko bwa musita uli waiza. Inzi, paantu weene asininkiziizie saana nangue wakaba kufikilizia bobo bulayo, walanda nga evelia bwakikitika kale.—Soma Isaya 46:10.

9. (a) Milandu “nakita bintu byonse kuba bya leenu” ilangiliile bintu ki bibili beelia byakaba kukita Yehova? (b) “Lyulu” ni “kyalo” bilipo loonu, Yehova wakaba kubikita siani?

⁹ Tutoosie musemua ukoonkelepo uli mu Nfyulo 21:5. Yehova waalandile eevi: “Nakita bintu byonse kuba bya leenu.” Keekio kili na mana ki? Mu leeli lileembo, ezio milandu ilangiliile bintu bibili beelia byakaba kukita Yehova. Kya kuanza, Yehova wakaba kufumiapo keenu kyalo kya kale. Kya bubili, wakaba kuleeta kyalo kya leenu. Lileembo lya Nfyulo 21:1, lyalanda eevi: “Lyulu wa mambo ni kyalo kya mambo byaalobele.” Paapa, bulanzi “lyulu wa mambo” bulangiliile ma buteeko ali asonseziiwa na Sataana pamo ni bibanda byakue. (Mat. 4:8, 9; 1 Yoan. 5:19) Mulandu “kyalo” ubombiiziwe mu Bibilia, kunti walangilila bekazi ba pa kyako. (Kut. 11:1; Malum. 96:1) Pakaako, “kyalo kya mambo” kilangiliile bantu babiipile. Yehova takaba kuwaamiasie “lyulu” ni “kyalo” bilipo loonu. Kuliko kukita evio, wakaba kubinoona kakiine. Kisia kukita evio, wakaba kuleeta “lyulu lya leenu ni kyalo kya leenu,” i kulanda, buteeko bwa leenu bwakaba kuteeka bantu ba nsaambu.

10. Ni biki byakaba kwalulua bya leenu kuli Yehova?

¹⁰ Yehova wakaba kukita bintu byonse kuba bya leenu mu nzila ki inge? (Nfy. 21:5) Yehova wakaba kutunza kyalo pamo ni bantu eevi bakabe kupuililika. Nga vyaalandile Isaya lwa ntaanzi, kyalo kyonse kyakawaama saana nga busitani bwa Edeni. Kabili wakaba kukita kyalo kikabe kwaluka kya leenu kupitila kumutunza kila muntu mu nzila ipuililikile. Babilema, bampofu, ni bampokoto bakaba kukosiiwa. Kabili, baalia baafuile bakaba kutuntumunua.—Is. 25:8; 35:1-7.

‘TWEBO TWANE NI TWA KISINKA, KABILI TWA KUKETEKELUA . . . TWAKITIKA!’

11. Yehova waamulandile Yoane akite ki, kabili juu ya ki?

¹¹ Ni kiki kinge kyaalandile Leeza eevi kutusininkiziizia nangue tupalile kumuswapila? Yehova waamulandile eevi Yoane: “Leemba, paantu twebo twane ni twa kisinka, kabili twa kuketekelua.” (Nfy. 21:5) Yehova taamupeelesie Yoane malaizio a kuleemba, inzi waamuanine ni nsaambu ipalile kumulengia ‘aleembe.’ Yehova waalandile eevi: “Paantu twebo twane ni twa kisinka, kabili twa kuketekelua.” Keekio kilangiliile nangue milandu yakue Leeza ni ya kisinka. Ni kya nsaansa saana paantu Yoane waanakiile malaizio a ‘kulemba’ abaamupeele. Loonu, keekio kili kyalengia tuye twasoma mpunda palua bulayo bwakue Yehova bwa kuleeta Paradiso, ni kutontonkania palua mpaalo iweeme saana elia yali wakaba kutukitila musita uli waiza.

12. Juu ya ki Yehova waalandile eevi: ‘Twakitika!’?

¹² Kisia paapo, Leeza walanda eevi: ‘Twakitika!’ (Nfy. 21:6) Juu ya ki Yehova walanda bebio bintu byonse palua bulayo bwakue kusia byaakitikile kale? Paantu te kuli kintu ata kimo kili kuviinda kumwanzia weene kufikilizia keelia kyakebele kukita. Yehova walanda kabili kintu kinge eevi kutusininkiziizia nangue wakaba kufikilizia bulayo bwakue bwa kuleeta Paradiso. Eba, walanda ki?

“NDI ALFA NI OMEGA!”

13. Juu ya ki Yehova waalandile eevi: “Ndi Alfa ni Omega”?

¹³ Nga vitwalandanga ku ntendeko, Yehova muine i waalandile ni mutumua Yoane mara itatu kupitila bimonua. (Nfy. 1:8; 21:​5, 6; 22:13) Mu ezio yonse mara itatu, Yehova waalandile eevi: “Ndi Alfa ni Omega.” Mu alfabeti ya Kigiriki, alfa i lisomo lya kuanza, ni omega i lisomo lya kupeleezia. Kupitila kulanda nangue weene i “Alfa ni Omega,” Yehova watukwasia kumana nangue weene kine watendeka kukita kintu, mpakasie akipue.

14. (a) Leeta mufuano ulangiliile musita Yehova lwaalandile “Alfa,” ni musita lwali wakalanda mu nzila ya mufuano “Omega.” (b) Ni busininkizio ki buli mu lileembo lya Kutendeka 2:1-3?

¹⁴ Kisia kubabumba ba Adamu ni Eva, Yehova waabalandile kintu kyaalengele ababumbe ni kubumba kyalo. Bibilia yalanda eevi: “Leeza waabapaalile, kabili wabalandile eevi: ‘Vyale, mwaluke bengi, mwizuzie kyalo ni kukiteeka.’” (Kut. 1:28) Mu ozo musita, kilisie nga evelia Yehova waalandile nangue “Alfa.” Waalandile paswetele keelia kyabanga wakebele kukita, i kulanda, luvyalo lwa ba Adamu ni Eva lupuililikile kabili luli lwanakila lwizuzie kyalo ni kukyalula Paradiso. Musita uli waiza, Yehova lwali wakaba kufikilizia keelia kyakebele kukita, kyakaaluka nga evelia walanda nangue “Omega.” Kisia kupua kubumba “muulu pamo ni kyalo ni kila kintu kilimo,” Yehova waalandile kintu kimo eevi kulangilila nangue keelia kyakebele kukita kyakaba kufikiliziiwa kakiine. Keekio kintu kili mu lileembo lya Kutendeka 2:1-3. (Soma.) Yehova waalandile nangue ya saba ni busiku butakatiifu. Keekio kili na mana ki? Yehova waasininkiziizie nangue kakiine wakaba kufikilizia keelia kyatonene kukita palua bantu pamo ni kyalo. Keekio kyakaba kufikiliziiwa mu nzila ipuililikile ku mpela ya busiku bwa saba.

15. Juu ya ki Sataana waatontonkaniizie nangue abanga wali ni buviinde bwa kumwanzia Yehova kufikilizia keelia kyabanga wakebele kukita?

¹⁵ Musita ba Adamu ni Eva lubaasangukile, baalukile bantu ba lizaambi, kabili baambukiziizie baana babo lizaambi ni lufu. (Bar. 5:12) Pakaako, keekio kyasiile kumoneka nangue Sataana waanzia keelia kibanga kyakebele kukita Leeza, i kulanda, bantu bapuililikile kabili bali banakila bezule pa kyako. Kyamwenekele nga evelia Sataana wamwanzia Yehova kulanda mu nzila ya mufuano nangue “Omega.” Paange Sataana waatontonkaniizie nangue Yehova tabanga wali na kintu kinge kya kukita eevi kufikilizia bulayo bwakue. Paange Sataana waatontonkaniizie nangue Yehova wakaba kubepaya ba Adamu ni Eva, ni kubumba ba mulume ni mukazi bange bapuililikile eevi afikilizie keelia kyabanga wakebele kukita. Inzi kulanda kisinka, Yehova akitenge evio, ozo Kibanda nga waamwanine nangue waaluka wa bufi. Juu ya ki? Paantu, nga vilandile lileembo lya Kutendeka 1:28, Yehova waabalandile ba Adamu ni Eva nangue luvyalo lwabo i lwakezuzia kyalo.

16. Juu ya ki paange Sataana waatontonkaniizie nangue Yehova takaba kuviinda kufikilizia beelia byaalaile?

¹⁶ Eba, paange Sataana waatontonkaniizie nangue Leeza wakaba kukwata bupinguzi ki bunge? Paange Sataana waatontonkaniizie nangue Yehova wakaba kubalekelasie ba Adamu ni Eva bavyale baana, inzi babo baana apana bakapuililike ata limo. (Kas. 7:20; Bar. 3:23) Yehova akitenge evio, ozo Kibanda nga waamulandile nangue waandua. Juu ya ki? Paange kubombia ezio nzila nga kwalengiizie keelia kibanga kwakebele kukita Yehova kyande kukitika, i kulanda, luvyalo lupuililikile kabili luli lwanakila lwa ba Adamu ni Eva lwizule mu Paradiso.

17. Yehova waakwete mupaango ki eevi kupuisia bukisanguka bwakue Sataana pamo ni ba Adamu ni Eva, kabili ni biki byakafumamo ku mpela? (Mona ni foto.)

¹⁷ Sataana tabanga wali na buviinde ata kaniini bwa kumana nzila elia yakaba kubombia Yehova eevi kufikilizia keelia kyabanga wakebele kukita. Yehova abanga wamanine nzila iweeme saana ya kubombia eevi kufikilizia keelia kyabanga wakebele kukita atasie kine Sataana ni Adamu pamo ni Eva baasangukile. (Malum. 92:5) Yehova waabapeele ba Adamu nsaambu ya kuvyala baana. Keekio kyalangiliile nangue milandu elia yaalandile yaafikiliziiziwe. Pakaako, weene te wa bufi. Kabili Yehova waalangiliile nangue weene kine wapingula kukita kintu, te kuli kintu kili kuviinda kumwanzia. Waatwaliliile kusininkizia nangue keelia kyakebele kukita kyakaba kufikiliziiwa kupitila kufumia “luvyalo,” loolia lwakaba kuviinda kupususia baana bali banakila ba ba Adamu ni Eva. (Kut. 3:15; 22:18) Kipalile Sataana waapapile saana paantu Yehova waakitile mupaango wa kufumia kilubula mulandu! Juu ya ki? Paantu ozo mupaango ubanga waimaniine pa ntono yakue Yehova isili ya butani. (Mat. 20:28; Yoan. 3:16) Sataana takwete ezio mibeele, weene ali ni butani. Pakaako, ni kiki kyakaba kufikiliziiwa kupitila mupaango wa kilubula mulandu? Ku mpela ya Buteeko bwa Miaka Elufu bwakue Kristu, luvyalo lwa bantu bapuililikile kabili bali banakila lwa ba Adamu ni Eva lwakekala mu Paradiso pa kyalo nga evelia vyaatonene Yehova ku ntendeko. Mu ozo musita, Yehova wakalanda mu nzila ya mufuano nangue “Omega.”

KUNTI TWAKITA SIANI EEVI TUKILE KUSWAPILA BULAYO BWAKUE YEHOVA?

18. Ni busininkizio ki butatu butupeelue na Leeza palua bulayo bwakue bwa Paradiso? (Mona ni kisanduku kilandile “Ni Nsaambu ki Itatu Ipalile Kutulengia Kuswapila Bulayo Bwakue Yehova”?)

¹⁸ Nga vitwafumu mu kusambilila, ni busininkizio ki buuli kuviinda kupeela baalia bali batwisika nangue bulayo bwakue Yehova palua Paradiso te bukaba kuviinda kufikiliziiwa? Busininkizio bwa kuanza ni bobu, Yehova muine i alaile bobo bulayo. Kitabu kya Nfyulo kilandile eevi: “Olia waali waikeele mu kitebe kya Bukolo waanganine: ‘Mona! Nakita bintu byonse kuba bya leenu.’” Yehova ali ni mulangue pamo ni maka, kabili atonene saana kufikilizia bulayo bwakue. Busininkizio bwa bubili ni bobu, kufikiliziiwa kwa bulayo bwakue kusininkiziiziwe saana paantu weene amwene nga evelia bwakifikiliziiwa kale. Keekio i kilengele alande eevi: ‘Twebo twane ni twa kisinka, kabili twa kuketekelua. . . . Twakitika!’ Busininkizio bwa butatu ni bobu, kine Yehova watendeka kukita kantu, ali watwalilila mpaka kukapua. Keekio i kyaalengele alande nangue: “Ndi Alfa ni Omega.” Yehova wakaba kulangilila nangue Sataana ni wa bufi, kabili nangue waandua.

19. Kine muntu watwisika palua bulayo bwakue Leeza bwa kuleeta Paradiso, weewe kunti wakita siani?

¹⁹ Languluka nangue mu miilo ya kusimikila, lyonse luuli wababuila bantu palua busininkizio butupeelue na Leeza juu ya Paradiso, keekio kili kyalengia ukile kuswapila nangue bobo bulayo bwakaba kufikiliziiwa. Pakaako, busiku buwakaba kusoma mpunda iteekiizie mutima juu ya Paradiso ili mukuiza, nga vilandile lileembo lya Nfyulo 21:4, kisia wasaakaana ni muntu olia walanda eevi: “Bebio bintu biweeme saana, inzi nsiswapiile nangue byakaba kukitika,” weewe kunti wakita siani? Wamona siani kine wasoma ni kumulondoluela mulongo wa 5 ni wa 6? Mulangilile Yehova vyasininkiziizie bulayo bwakue nga evelia muntu asiniizie na sinyatire yakue muine.—Is. 65:16.