Kunti Twasambilila ki Kupitila Mikanda Ibili Yakue Petro?

1. Musita uniini ntaanzi mutumua Petro afue, Yehova waamutunguluile kukita ki?

MUTUMUA Petro waamanine nangue bukose bwakue bubanga bwali peepi ni ku mpela. Waamubombeele Yehova mu miaka ingi wali wa kisinka. Waaendele pamo ni Yesu, waatendekeziizie miilo ya kusimikila bantu basili Bayuda, kabili kisia musita, waabombeele mu kabungue kali katungulula. Inzi, miilo yakue Petro te yaapeleele paapo. Mu muaka wa 62-64 eevi, Yesu wasyavyelue, Petro waatunguluilue na mupasi wakue Leeza eevi kuleemba mikanda ibili, i kulanda, kitabu kya Bibilia kya 1 Petro ni kya 2 Petro. Abanga waswapiile nangue ezio mikanda yakakwasia Bakristu kisia kufua kwakue.—2 Pet. 1:12-15.

2. Juu ya ki mikanda yaaleembele Petro yaali yapalile saana?

² Petro waaleembele mikanda yakue musita Bakristu benakue lubabanga basaakaana ni “maavia paleepale.” (1 Pet. 1:6, NWT) Bantu ba mitima ibiipile babanga baleeta masambilizio a bufi ni mibeele ibiipile mu kilonghaano. (2 Pet. 2:1, 2, 14) Bakristu baalia baali baikala mu Yerusalemu babanga baali peepi ni kwimwena “mpeleezio ya bintu byonse,” i kulanda, kwinoonua kwa muzi wa Yerusalemu ni buteeko bwa Bayuda na bisepe bya basoda Baroma. (1 Pet. 4:7) Kulanda kisinka, mikanda yakue Petro yaakwasiizie Bakristu bamone vya kukita eevi kusipikizia maavia abaali nao ni kwiteania juu ya maavia a mu musita olia waali waiza.b

3. Juu ya ki tupalile kutoosia mikanda yakue Petro itungulwilue na mupasi?

³ Atasie kine Petro waaleembele mikanda yakue palua Bakristu ba mu miaka mia ya ku ntendeko, Yehova waabiikile ezio mikanda mu Mulandu wakue. Pakaako, ezio mikanda kunti yatukwasia ni fwefue loonu. (Bar. 15:4) Nga evelia Bakristu ba mu miaka mia ya ku ntendeko, ni fwefue twikeele mu kyalo kivulilemo mibeele ifiitile. Kabili keekio kunti kyalengia kiye kyakolele kumubombela Yehova. Kabili, leenusie twakaba kusaakaana ni lyemo likata saana, lipitile pa leelia lyaapuisiizie buteeko bwa Bayuda. Petro watulangulusia bintu bya mana mu mikanda yakue ibili. Bebio bintu byakaba kutukwasia kutwalilila kupembelela busiku bwakue Yehova, kuluisia muenzo wa kutiina muntu, ni kukila kutonana saana pakati keetu. Kabili, bebio bintu bitwalangulusiiwa na Petro, kunti byakwasia ni bakote bamone vya kukwasia balupua ni bankazi mu kilonghaano eevi basiale baimeene sinta.

TWALILILA KUPEMBELELA

4. Nga vilangiliile 2 Petro 3:3, 4, ni kiki kili kuviinda kulengia kiketekelo kyetu kitope?

⁴ Mu keenu kyalo twikeele na bantu basizumiine bintu bilandile Bibilia palua musita uli waiza. Baluani kunti batendeka kutuseka paantu papita kale miaka ingi tangu lutwaatendekele kulanda nangue mpela ili mukuiza. Bantu bange bali balanda nangue mpela teikeeza ata kaniini. (Soma 2 Petro 3:3, 4.) Paange kiketekelo kyetu kunti kyatopa kine twaunvua malanga a evio kufuma ku muntu utuli mukusimikila, ku mubombi neetu ao ku muntu wa mu lupua lwetu. Petro waalondoluele bintu bili kuviinda kutukwasia.

5. Ni kiki kili kuviinda kutukwasia kupembelela mpela ya keenu kyalo twateekameene? (2 Petro 3:8, 9)

⁵ Bantu bange kunti bamona nangue Yehova wakokola bila kuleeta mpela ya keenu kyalo kibiipile. Elia milandu yaaleembele Petro kunti yatukwasia paantu ili yatulangulusia nangue Yehova ali wamona musita mu nzila ipuseene saana ni vili vyamona bantu. (Soma 2 Petro 3:8, 9.) Kuli Yehova miaka elufu imo ili nga busiku bumo. Yehova ali ni mibeele ya kupembelela, kabili tatonene muntu ata umo akabe kuiza kwinoonua. Anzia evio, kine busiku bwakue bwafika, keenu kyalo kyakaba kwinoonua. Kakiine tuli ni lisyuko lya kubombia musita usieleko eevi kusimikila bantu mwaya kyalo kyonse!

6. Kunti ‘twatwalilila kubiika mu maano’ busiku bwakue Yehova mu nzila ki? (2 Petro 3:11, 12)

⁶ Petro watusoka nangue tupalile “kubiika mu maano” busiku bwakue Yehova. (Soma 2 Petro 3:11, 12.) Kunti twakita evio mu nzila ki? Kine kyaviindikana, kila busiku kili buino kuya twatontonkania palua mpaalo elia yakaba mu kyalo kya leenu. Ezia kwimona we muine wali mukupeema ka mwela kaweeme, wali mukulia byakulia bya kukuula mubili, wali mukupokelela babibuza ni bantu ba mu lupua musita ubali mukutuntumunua. Kabili ezia kwimona wali mukusambilizia bantu baalia baaikeele mu miaka ingi yaapitile eevi bamane palua kufikiliziiwa kwa bukabika bwa Bibilia. Kutontonkania palua bebio bintu, kunti kwakukwasia utwalilile kupembelela bobo busiku kwa nkulu, ni kuya wasininkiziizie nangue mpela ilisie peepi. Paantu fwefue “beebi bintu byonse . . . tetusyabimanine” palua musita uli waiza, bakasambilizia ba bufi ‘te bakaba kuviinda ‘kutufumia’ mu keelia kituketekeele.—2 Pet. 3:17.

LUISIA MUENZO WA KUTIINA MUNTU

7. Kutiina bantu kunti kwatulengia tukite ki?

⁷ Kine twatwalilila kubiika mu maano busiku bwakue Yehova, keekio kyakaba kutusonsezia kubasimikila bange mpunda iweeme. Inzi, nsita inge kunti twaunvua muenzo wa kukita evio. Juu ya ki? Paantu nsita inge, kunti twatiina muntu. Keekio kyaamufikiile ni Petro. Lwaakyuziiziwe Yesu, mu nsita ya busiku, Petro waaunvuile muenzo wa kulanda nangue weene ni musambi wakue Yesu, kabili waakeene lingi nangue tamumanine. (Mat. 26:69-75) Inzi, wenka ozo mutumua waafikiile kulanda eevi wasininkiziizie: ‘Tekutiine keelia kibali batiina kabili tekusakamane.’ (1 Pet. 3:14) Milandu yakue Petro yatusininkiziizia nangue kunti twaviinda kuluisia muenzo wa kutiina muntu.

8. Ni kiki kili kuviinda kutukwasia kuluisia muenzo wa kutiina muntu? (1 Petro 3:15)

⁸ Ni kiki kili kuviinda kutukwasia kuluisia muenzo wa kutiina muntu? Petro watulanda eevi: “Mukindike Mulopue weenu [Kristu] mu mitima yeenu.” (Soma 1 Petro 3:15.) Keekio kibiikile mukati kuya twatontonkania palua kifulo ni buviinde bwakue Mulopue kabili Likolo weetu, Kristu Yesu. Kine uli waunvua muenzo wa kubasimikila bange mpunda iweeme musita luuli wapata fuasi ya kukita evio, mulanguluke Likolo weetu. Mumone wali mukuteeka ku muulu kabili wazyungulukiilue na bamalaika bengi saana. Languluka nangue ali ni ‘buviinde bonse ku muulu ni pa kyalo’ kabili nangue wakaba ‘pamo nobe nsiku yonse mpaka ku mpeleezio ya kyalo.’ (Mat. 28:18-20) Petro watusoka ‘tuye twaiteaniizie’ lyonse eevi kusakila kiketekelo kyetu. Eba, weewe kunti watona kumusimikila muntu umo ku miilo, ku masomo ao mu nzila inge yusipaangile? Tontonkaniizia mbeela kine ni musita ki luuli kuviinda kukita evio, kisia teania beelia byupalile kulanda. Muloombe Yehova akupeele mibeele ya kusipa, kabili uye waswapiile nangue weene wakaba kukukwasia kuluisia muenzo wa kutiina muntu.—Miil Bat. 4:29.

“TONANE SAANA”

9. Petro waandilue siani kulangilila ntono mu lwendo lumo? (Mona ni foto.)

⁹ Petro waasambiliile vya kulangilila ntono. Weene waasaangiluepo musita Yesu lwaalandile eevi: ‘Namipeela mulao, ao malaizio a leenu, tonane nga evelia vinaamitonene, i vya kuti mutonane ni mwemue.’ (Yoan. 13:34) Anzia evio, kisia musita, Petro waalekeele kulia pamo ni balupua ni bankazi basili Bayuda juu ya kutiina Bakristu Bayuda. Mutumua Paulo waakuutile beelia byaakitile Petro nangue “bukankobenkania,” ao bintu bya bunafiki. (Bag. 2:11-14) Petro waaitabiile koololua na Paulo, kabili waasambiliilepo masomo. Mu mikanda yakue ibili, waaleembele nangue te tupalilesie kwiunvua mukati keetu nangue tubatonene balupua ni bankazi, inzi kabili tupalile kulangilila nangue tubatonene.

10. ‘Ntono iine iine ya kutona bazumizi neetu’ ili yaleetua na ki? Londolola. (1 Petro 1:22)

¹⁰ Petro walanda nangue tupalile kuya twali ni ‘ntono iine iine ya kutona bazumizi neetu,’ i kulanda kutona balupua ni bankazi neetu mu kilonghaano. (Soma 1 Petro 1:22.) Ntono ya evio, ili yafuma mu “kunakila kisinka.” Keekio kisinka kibiikile mukati lisambilizio lilandile nangue “Leeza tali na kitoolela.” (Miil Bat. 10:34, 35) Tetuviinda kunakila malaizio akue Yesu palua ntono kine tuli twasaakuila bantu batuli twalangilila ntono mu kilonghaano. Inzi kulanda kisinka, kunti kyakitika tuye twali ni bukibuza bwa peepi saana ku bamo, kuliko vituli twaiunvua ku bange, nga vikyaali palwakue Yesu. (Yoan. 13:23; 20:2) Inzi Petro watulangulusia nangue tupalile kwikwinda ‘kutona bazumizi neetu,’ i kulanda tutonene kulangilila ntono ku balupua ni bankazi betu bonse paantu bali seemu ya lupua lwetu.—1 Pet. 2:17.

11. Kubatona bantu ‘saana na mutima weetu onse’ kubiikile mukati kiki?

¹¹ Petro waatusokele nangue ‘tonane saana na mutima weenu onse.’ Mu leelio lileembo milandu, kutona “saana,” ili na mana ya kumutona lupua ao nkazi atasie kine kikolele saana kukita evio. Kwa mufuano, ale kine lupua ao nkazi watuluvia ao watukisia mu nzila imo? Paange ku ntendeko kunti twatona kumukitila nga vyatukitilanga kuliko kumulangilila ntono. Inzi, Petro waasambilile kuli Yesu nangue ezio mibeele teizi kumusaansamusia Leeza. (Yoan. 18:10, 11) Petro waaleembele eevi: ‘Te kubuezie bubiifi pa bubiifi ao ntiipo pa ntiipo. Inzi, paale bonse bali bamikitila bibiipile.’ (1 Pet. 3:9) Lekela ntono ikusonsezie kuya wali muntu aweeme, kabili uye wapooza maano atasie baalia bali bakukisia.

12. (a) Kubatona saana bantu kunti kwatusonsezia kukita bintu ki binge? (b) Nga vilangiliile viideo ili mu bulondolozi bwa pensina, weewe utonene kwikwinda kukita ki?

¹² Mu mukanda wakue wa kuanza, Petro waabombiizie bulanzi ‘kutona saana.’ Ntono ya evio, ili yavimba “bibalo” ao mazaambi engi, apana aniinisie.” (1 Pet. 4:8) Paange Petro waalangulukile lisomo libaamusambiliziizie mu miaka yaapitile kuli Yesu palua kweleela. Mu ozo musita, Petro lwaalandile nangue apalile kumweleela lupua wakue “mpaka nghendo saba,” kipalile waaimwene kuya wali muntu aweeme saana. Inzi, Yesu waamusambiliziizie weene pamo ni fwefue kweleela “mpaka nghendo 77,” i kulanda nangue kweleela tekwizi kusaangua na mipaka. (Mat. 18:21, 22, NWT) Kine weewe wamona nangue kukoonka ozo musoko kukolele, te kutioka mutima! Babombi bonse bakue Yehova basipuililikile, nsita inge bali bamona kyakolele kweleela. Kintu kya mana kyupalile kukita loonu, ni kwikwinda kumweleela lupua obe ni kukita mutende pamo nakue.c

MWE BAKOTE, SUUNGE LIBUMBA

13. Ni kiki kili kulengia paange bakote bamone kyakolele kupata musita wa kuteekia mutima balupua ni bankazi babo?

¹³ Kisia Yesu kutuntumunua, Petro taalabile ata kaniini milandu ibaamulandile. Yesu waamulandile eevi: “Suunga mikooko yane.” (Yoan. 21:16) Kine uli mukote, umanine nangue ni weewe upeelue azo malaizio. Inzi, mukote kunti wamona kyakolele kupata musita wa kubomba ezio miilo ya mana. Ntaanzi ya byonse, bakote bapalile kwemena bantu ba mu lupua lwabo mu bintu bya kimubili, bya kimupasi ni mu aali ibali baiunvua. Kabili, bali bababiikila bange mufuano uweeme palua miilo ya kusimikila, kuteania ni kupisia biputulua ku kulonghaana kwa kila mulungu, ku kulonghaana kwa muputule ni ku kulonghaana kwa kalaale. Bange bali ni miilo ya kubomba mu Kabungue Kali Kabombela Pamo ni Opitali, ao kwitabila kubomba pamo ni kabungue kemaniine miilo ya kukuula mu kazonga kemaniinue na musambo. Kakiine, bakote bali ni miilo ingi ya kukita!

14. Ni kiki kili kuviinda kubasonsezia bakote basuunge libumba? (1 Petro 5:1-4)

¹⁴ Petro waabasokele bakote benakue nangue “suunge libumba lyakue Leeza.” (Soma 1 Petro 5:1-4.) Kine uli mukote, tumanine nangue weewe ubatonene ba lupua ni bankazi bobe kabili utonene kubasuunga. Anzia evio, nsita inge paange kunti waiunvua kuya wali ni bingi bya kukita ao kuya watopele saana ni kufikiila kwimona nangue paange teuviinda kubomba miilo ya bukote. Weewe kunti wakita siani? Mubuile Yehova vyuli mukwiunvua. Petro waaleembele eevi: “Onse ali wabomba abombe na maka aapeelue na Leeza.” (1 Pet. 4:11) Paange balupua ni bankazi bobe bali mukusaakaana ni maavia alia asiviinda kupuisiiwa onse mu keenu kyalo. Inzi, languluka nangue “musuungi mukulu,” Yesu Kristu, kunti wabakwasia balupua ni bankazi kupita muntu unge onse. Yesu kunti wakita evio leenu ni mu kyalo kya leenu. Leeza abaloombelesie bakote, babatone balupua, babasuunge kabili baye bali “mifuano ku libumba.”

15. Mukote umo ali wakita siani eevi kusuunga libumba? (Mona ni foto.)

¹⁵ Mukote umo ali wakuutua William, olia wakokola kale mu ezio miilo, enikile nangue miilo ya kusuunga ni ya mana. Musita buluele bwa korona (COVID-19) lubwaatendekele, weene pamo ni bakote benakue baaikwindile saana kila mulungu kuya balanda pamo ni kila muntu wa mu kikundi kyabo. Walanda eevi: “Balupua bengi babanga balisie bunke ku masesi abo, kabili malanga abo abanga aaluluka lubilo ni kubamba kutontonkania bintu bibiipile.” Kine lupua ao nkazi ali mukwemiiwa na maavia, William ali wamutuilizia wapoozeleko maano eevi amane bintu bikabiile ozo lupua ao nkazi ni beelia bili mukumwemia. Kisia ali waikwinda kukeba mpapulo paleepale, nga evelia bitabu ni ma viideo, beelia byali kuviinda kubombia eevi kumukoselezia ozo lupua ao nkazi. Walanda eevi: “Miilo ya kusuunga ikabiilue saana loonu kuliko musita waapitile. Tuli twaikwinda saana eevi kubakwasia bantu bange basambilile palwakue Yehova; kabili tupalile kwikwinda saana kusuunga libumba, kukwasia mikooko yakue Yehova isiale mu kisinka.”

MULEKELE YEHOVA APUILILILE KUBEELEZIIWA KOBE

16. Kunti twabombia siani masomo atwasambilila kufuma mu mikanda yaaleembele Petro?

¹⁶ Twalondoluelasie masomo aniini kufuma mu mikanda ibili itungulwilue na mupasi elia yaaleembele Petro. Paange weewe wamona fuasi imo yutonene kuwaamia pa lobe. Kwa mufuano, eba kunti watona kukila kutontonkania lingi palua mpaalo itwakapata mu kyalo kya leenu? Eba, waibiikila mupaango wa kusimikila ku miilo, ku masomo ao mu nzila inge isipaangilue? Ao eba, wamona vyuli kuviinda kubalangilila balupua ni bankazi bobe ntono mu nzila ikililepo? Mwe bakote, eba mwapingula kusuunga mikooko yakue Yehova mu kwitonena kabili kwa nkulu? Kwitoosia kakiine vyuli kunti kwakukwasia winike butope buuli naabo, inzi keekio te kipalile kukutiona mutima. Weewe, ‘winikile vili buwaame bwakue Mulopue,’ kabili weene wakaba kukukwasia kuwaamia paalia paupalile kuwaamia. (1 Pet. 2:3) Petro watusininkiziizia eevi: “Leeza . . . wakaba kupua muine kubeeleziiwa kwenu. Wakaba kumyalula sinta, wakaba kumilumia, wakaba kumisimpa.”—1 Pet. 5:10, NWT.

17. Kunti kwaaluka ki kine twatwalilila kumubombela Leeza ni kumulekelela atubeelezie?

¹⁷ Musita umo, Petro waaimwene kuya wali muntu asipalile kwimana ntaanzi ya Muana mwina Leeza. (Luk. 5:8) Inzi kupitila kukwasiiwa na Yehova ni Yesu mu nzila ya ntono, Petro waatwaliliile kumukoonka Kristu. Kakiine, Petro waaitabiilue “kwingila mu Bukolo bwa loonse bwakue Mulopue weetu, kabili Mupususi, Yesu Kristu.” (2 Pet. 1:11, NWT) Kakiine ezio ni mpaalo ya kupapia! Kine ni weewe watwalilila kumubombela Leeza nga vyaakitile Petro ni kwilekelela eevi ubeeleziiwe na Yehova, wakaba kupata bukose bwa loonse. Weewe, wakaba ‘kufikiila keelia kikebele kiketekelo kyobe, i kulanda, bupusuko bobe.’—1 Pet. 1:9, NWT.