Vya Kukuula Kabili Bukibuza Bobe Pamo ni Yehova

KILA muaka, mikooko ingi itonenue ili yabuela mu kilonghaano kya Kikristu. Tontonkania ‘mwiulu vimuli mwaya mwakilile nsaansa’ musita kila mukooko lwali wabuela! (Luk. 15:7, 10) Kine wakibueziiwa mu kilonghaano, uye wali ni kisinka nangue Yesu, bamalaika, ni Yehova muine, bali ni nsaansa saana paantu wakyaluka kabili seemu ya kilonghaano. Inzi, musita luuli mukuya wakuula kabili bukibuza bobe pamo ni Yehova, kunti wasaakaana ni maavia. Eba, ni maavia ki azo, kabili ni kiki kili kukukwasia?

KUNTI WASAANGA MAAVIA KI?

Balupua ni bankazi bengi bali baiunvua kutioka mutima atasie kisia kubuela mu kilonghaano. Paange wainika vyaaiunvuile Likolo Daudi. Atasie kisia kweleelua mazaambi akue, waalandile eevi: “Bilubo byane bintitikiile.” (Malum. 40:12; 65:3) Kisia muntu kubuela kuli Yehova, kunti wapua miaka ingi waimwene kuya wali ni kilubo kabili waunvuile busoni. Isabelle, waapuile miaka ikilile pa 20 watengelue.a Waalandile eevi: “Naali namwene kyakolele kwitabila nangue Yehova kunti wangeleela.” Kine watioka mutima, kunti waaluka mutope kimupasi. (Tus Maf. 24:10) Kita maka eevi te kunti waaluke mu ezio aali ya kutioka mutima.

Bange bali baunvua muenzo nangue tebaviinda kukita byonse bipalile eevi kubuezia bukibuza bwabo pamo ni Yehova. Kisia kubueziiwa mu kilonghaano, Antoine waalandile eevi: “Naalabile bintu bingi binasambiliile ao beelia binaali nakita musita umbanga nakili Kasininkizia.” Kwiunvua evio kuli kwalengia bange bandue kumukitila Yehova bintu bibapalile kumukitila.

Kwa mufuano, muntu ali ni nsesi yakituutua na mulula, kunti wavulunghana mu maano kine watendeka kutontonkania palua miilo ikata ni musita wakaloombua eevi kukuula kabili ezio nsesi. Enka evio, kine bukibuza bobe pamo ni Yehova bwaainoonenue na lizaambi lifinine, kunti wamona kyakolele saana kufikilizia byonse bipalile kukitua eevi kuwaamia kabili bukibuza bobo. Inzi, kunti wakwasiiwa.

Yehova watukupa walanda eevi: “Ale ize, kabili leke toolole bintu pakati keetu.” (Is. 1:18) Wakibombelapo kale saana eevi ‘koolola bintu.’ Yehova akutonene paantu waakikwinda. Tontonkania kakaniini: Paantu waakimubuelela Yehova, weene kunti wakubombia weewe nga mufuano ulangiliile nangue Sataana Kibanda ni wa bufi!​—Tus Maf. 27:11.

Paantu waakimubuelela Yehova, ni weene alaile nangue wakaba kukupalama. (Yak. 4:8) Balupua ni bankazi baakyunvua buino saana kukumona wabuela mu kilonghaano. Anzia evio, kuli ni kintu kinge kiupalile kukita. Upalile kukosia ntono yobe kuli Yehova Baba obe, kabili Kibuza. Kunti wakita siani evio?

IBIIKILE MIPAANGO YULI KUVIINDA KUFIKILIZIA

Ezia kwibiikila mipaango iuli kuviinda kufikilizia. Paange ukilangulukilesie bintu bya musinzi biwasambiliile palwakue Yehova ni bulayo bwakue bwa Paradiso. Inzi loonu, upalile kupaanga kupia ntantiko iweeme ya kimupasi nga evelia kusimikila lyonse, kusaanguako lyonse ku kulonghaana, ni kupisia nsita pamo ni balupua ni bankazi. Mona palua eezi mipaango ikoonkelepo.

Uye wamulanzia Yehova lingi. Baba obe amanine nangue kine watwalilila kwiluula palua lizaambi lyobe, kunti wamona kyakolele kupepa kuli Weene. (Bar. 8:26) Anzia evio, ‘pepa lyonse,’ wamubuila Yehova nangue utonene saana kwaluka kibuza wakue. (Bar. 12:12) Andrej walanguluka eevi: “Naali nailuula saana ni kunvua busoni bukata. Inzi, kila musita unaali napua kupepa, naali naiunvua buino. Naali naiunvua kuya nali ni mutende mu maano.” Kine te umanine milandu ya kubiika mu lipepo, kunti watontonkania palua mapepo akue Likolo Daudi waalapiile. Mapepo azo aleembelue mu Malumbo 51 ni 65.

Uye wasambilila Bibilia lyonse. Kukita evio kuli kukwasia kiketekelo kyobe pamo ni Yehova kikose, kabili ntono yobe kuli Yehova ili kukila kukosa. (Malum. 19:7-11) Felipe waalandile eevi: “Paantu nsyaali na ntantiko ya kila busiku ya kusoma Bibilia ni kusambilila, naalukile mutope ni kumulengia Yehova akisike. Nsyaali natonene kabili kukita kyenka keelia kilubo, pakaako, naapinguile kuya nakita lyonse lisambililo lyane lya bunke kila busiku.” Ni weewe kunti wakita enka evio. Kine utonene kukwasiiwa eevi kumana vya kupata mpunda ya kusambilila musita wa lisambililo lyobe lya bunke, kunti wamuloomba kibuza obe ali ni bukibuza buweeme pamo ni Yehova akukwasie.

Kuula kabili bukibuza bobe pamo ni balupua ni bankazi. Balupua ni bankazi bange bali babuela mu kilonghaano, bali baunvua muenzo nangue paange bange babafiitiilue. Larissa waalandile eevi: “Naali naunvuile busoni saana. Naali namwene nangue naabakisiizie ni kubationa mutima balupua ni bankazi mu kilonghaano. Naapuile nsiku ingi saana naali ni azo malanga.” Uye wali ni kisinka nangue bakote ba kilonghaano pamo ni balupua ni bankazi bange bakosele kimupasi, batonene saana kukukwasia ukuule kabili bukibuza bobe pamo ni Yehova. (Mona kisanduku kilandile “Bakote ba Kilonghaano Kunti Bakita ki?”) Baakitona saana kukumona wabuela, kabili batonene uye wali ni nsaansa!​—Tus Maf. 17:17.

Ni kiki kili kukukwasia upalame kilonghaano? Ni weewe uye wakita saana beelia bili mukukita balupua ni bankazi nga evelia kuya lyonse ku kulonghaana ni kusimikila lyonse. Kukita evio kunti kwakwasia siani? Felix waalandile eevi: “Balupua ni bankazi baali batonene saana kumpokelela mu kilonghaano. Naaiunvuile kuya natonenue. Bonse baankwasiizie ngiunvue kabili kuya nali seemu ya kilonghaano, ngiunvue nangue Yehova waakingeleela kakiine, kabili mone nangue kunti natwalilila kumubombela.”​—Mona kisanduku kilandile “Kunti Wakita ki?”

TE KUTOOBOKA!

Sataana wakaba kutwalilila kukuleetela milula eevi kukutopia musita luuli mukukuula kabili bukibuza bobe pamo ni Yehova. (Luk. 4:13) Ube waiteaniizie kupitila kukosia nsesi yobe ya kimupasi leenu.

Yehova alaile eevi palua mikooko yakue: “Olia azeezele nakaba kumukeba, olia ali mukuvuuba nakaba kumubuezia, olia akisikile nakaba kumupambilila, ni olia atopele nakaba kumukoselezia.” (Ezek. 34:16) Yehova tasyakwasiizie bantu bengi saana kubuezia bukibuza pamo nakue. Uye wali ni kisinka nangue atonene kukukwasia kukuula bukibuza bukilile kukosa pamo nakue.