Eba, Bungipaani Bwakapua?

Kine bakwingilila na kikundi kya bangipaani, kunti waiipuzia eevi: ‘Eba, ozu Leeza atupoozeleko maano? Juu ya ki beebi bintu bili mukukitika? Eba, bungipaani ao terorismea bwakapua? Ale vinaunvua saana muenzo, ndi kukita siani?’ Bibilia ili yatupeela byasuko bili byateekia mutima bya beebio biipuzio.

Leeza ali waiunvua siani palua Bungipaani?

Leeza, asuulile bubiifi ni bungipaani. (Malumbo 11:5; Tuswalo ni Mafunde 6:16, 17) Yesu ni weene, mukenzi ao muntu waali watuminue na Leeza, waabasasiliile basambi bakue baakitile bya bungipaani. (Mateo 26:50-52) Anzia kine bange bali bakita bya bungipaani mu liina lyakue Leeza, weene tabapeele nsaambu ya kukita beebio bintu. Kabili, teezi kutuilizia atasie mapepo abo.—Isaya 1:15.

Leeza ali waemena baalia bonse bali mu maavia, kubiika pamo ni baalia bakisilue juu ya kwingililua na bangipaani. (Malumbo 31:7; 1 Petro 5:7) Kabili, Bibilia ili yalanda nangue, Leeza wakaba kupuisia bungipaani.—Isaya 60:18.

Ni kiki kili kyalengia kwaluke bungipaani?

Bibilia ili yalanda nsaambu ikata ili yalengia kwaluke bungipaani: “Muntu ali wamuteeka muntu mwinakue mu nzila ya kumukisia.” (Kasimika 8:9) Istoria ili yalangilila nangue, bantu baalia bali ni buviinde, bali bakita bya bungipaani juu ya kubateeka bantu lusaba ao kwemia bantu bange. Ni bili byafuminamo, musita bange lubali bateekua lusaba, ni beene bali bakita bya bungipaani eevi kubuezia kibuelezi.—Kasimika 7:7.

Muisio wa bungipaani

Leeza alaile nangue wakaba kupuisia mwenzo ni bungipaani, kabili wakaba kuleeta mutende pa kyalo. (Isaya 32:18; Mika 4:3, 4) Wakaba:

Kufumiapo kelia kili kyalengia kwaluke bungipaani. Leeza wakaba kufumiapo buteeko bwa bantu ni kubiikapo buteeko bwakue bwakaba kuteeka kyalo kyonse. Yesu Kristu, Kateeka wa bobo buteeko, wakaba kukitila kila muntu mu nsaambu, kabili wakaba kupuisia kuteekua lusaba ni bungipaani. (Malumbo 72:2, 14) Ozo musita, tekukaba muntu wakaba kukita bya bungipaani. Bantu “bakaaluka ni nsaansa ikata saana mu mutende wingi.”—Malumbo 37:10, 11.
Kupuisia maavia onse ali mukuleetua na bungipaani. Leeza wakaba kubakosia baalia bali mukwemiiwa na bintu bilengiiziwe na bangipaani, anzia kine bakisikile kimubili ao kuvulunghana mu maano. (Isaya 65:17; Nfyulo 21:3, 4) Kabili, alaile nangue wakaba kubatuntumuna bafuile, ni kubabuezia bekale pa kyalo kyalipo mutende.—Yoane 5:28, 29.

Bibilia ili yatupeela nsaambu yaweeme ili kulengia tuzumine nangue wakaba kukita evio leenusie. Anzia evio, paange kunti waiipuzia eevi: ‘Juu ya ki Leeza tali mukufumiapo bungipaani?’ Pa kunti upate kyasuko, mona viideo ilandile eevi: Sababu ya ki Leeza Alekeleele Bintu Bibiipile ni Maavia?

a Lingi, “bungipaani ao terorisme ” bubiikile mukati kubakitila bekala kyalo ao baraia bintu bibiipile ao kubateeka lusaba eevi kubaleetia mwenzo ao kubatutumia kabili juu ya kulengia kwaluke bupilibuko mu politike, mu ma diini ao mu bantu. Anzia evio, bantu kunti bapinga kintu kyonse keelia kili kyakitua kimwenekele nangue ni kya bungipaani.

Bibilia ili yabakwasia bantu basipikizie

Paapa, pali bintu beelia bilandile Bibilia nangue bili kukukwasia.

Kupepa kuli Leeza.—Bafilipi 4:6, 7.
Kupooza maano ku mpunda ili yaleeta kiswapilo ili mu Bibilia.—Baebrania 6:19.

Eevi kupata masoke engi aswapiile Bibilia, mona lyasi lilandile “Vya Kuluisia Muenzo.”

Bakasininkizia Bakue Yehova baalia bali mukusipikizia, bali mukupata maka kupitila kukwasiiwa na bazumizi nabo. Mona eezi mifuano ibili:

Natalya pamo ni Aslan, muana wakue mwalalume wa miaka kenda, babanga ku masomo mu muzi wa Beslan, mu kyalo kya Urusi, musita bangipaani lubaaingiile mukutulumukila pa masomo ni kukwata bantu bakilile pa elufu imo (1 000) ni kubatuama. Kya bulanda, ma mia a bantu baafuile, ni bengi pakati kabo babanga bali baanike. Anzia kine ba Natalya ni Aslan baapusukile, baasiele bavulungheene mu maano. Mona keelia kyaabakwasiizie kusipikizia ezio aali.
Pablo ni Sophie, baafuiliilue na muana wabo musita mpungu ibili ao minara ibili luyaatutikile mu muzi wa New York. Mona eezi viideo eevi umone keelia kyabakwasiizie, beene pamo ni bange baasaanzilue na bobo bungipaani.