Uye wali ni lulumbi lwa kuya wali ni malanga ateekameene. Iipuzie eevi: ‘Eba, bantu bamwene neene kuya nali muntu ali ni malanga ateekameene, ali waaluluka kukoonkana ni aali, kabili ali waeleela? Ao eba, ndi nasaangua namwenue kuya nali muntu ali ni malanga aviizie, asiizi kwaluluka, ao muntu ali ni mutue uumine? Eba, ndi nabatuilizia bange ni kwaluluka kukoonkana ni vibatonene kine kyapala?’ Vituli kuya twakila kwikwinda kulangilila malanga ateekameene, i vituli kuya twakila kumupala Yehova ni Yesu. Tupalile kulangilila malanga ateekameene kine aali yeetu yaaluluka. Kine aali yaaluluka, kunti twapata maavia atusyakiba twaswapiile kupata ata limo. Kwa mufuano, paange mukusitukilasie kunti twapatua na buluele bwaviizie. Ao aali yeetu kunti yaaluluka lubilo ni kuponena mu buavia bwa kupata nfalanga ao paange buteeko bwa koolia kutwikeele kunti bwalengia buikazi bwetu bukole saana. (Kas. 9:11) Kabili paange kunti twamona kyakolele kine twalandua nangue miilo yeetu mu kuteania yaaluluka ni kulandua tubambe kubombela mu nzila inge ao ku fuasi inge. Kunti twaviinda kwipatanisia mu aali ya leenu kine twakoonka eezi nzila ina: (1) kwitabila nangue aali yaaluluka, (2) kukenta ku ntaanzi apana ku nyuma, (3) kupooza maano ku bintu biweeme mu buikazi, ni (4) kukwasia bange. w23.07 21-22 lifu. 7-8

Kabika Danieli abanga wakili mulumendo musita Bababiloni lubaamutweme wali muntu akakilue, ni kumutwala ku Babiloni, kule ni ku Yerusalemu. Inzi, atasie kine Danieli abanga wakili mulumendo, Bababiloni baamweneko bintu paleepale kuli weene. Baamwene nangue Danieli abanga wamwenekele buino, kabili nangue waafumine mu lupua lukindeeme. (1 Sam. 16:7) Pakaako, baamubeeleziizie eevi abombe mu nsesi yakue Likolo. (Dan. 1:3, 4, 6) Yehova waamutonene Danieli, apana juu ya kumoneka kwakue kwa kimubili, kabili apana paantu waali ni miilo iibeleele mu nsesi yakue Likolo, inzi waamutonene juu ya bumuntu bwaasaakuile kuya wali naabo. Kakiine musita Yehova lwaalandile nangue Danieli ali nga Noa ni Yobu, kipalile Danieli abanga walisie na miaka 20 eevi. Pakaako, Yehova waamumwene mulumendo Danieli kuya wali wa kisinka nga Noa ni Yobu, baalia baamubombeele Weene mu kisinka mu miaka ingi. (Kut. 5:32; 6:9, 10; Yob. 42:16, 17; Ezek. 14:14.) Kabili Yehova waatwaliliile kumutona Danieli mu buikazi bwakue buleepele, kabili bwa mana.—Dan. 10:11, 19. w23.08 2 lifu. 1-2

Kine uli mukukeba kusita nsesi, uli kutona kumona vili kila kantu palua nsesi yukebele kusita. Kunti twakita enka evio musita utuli mukusoma Bibilia. Kine wasomasie Bibilia lubilo-lubilo, kunti wasambililasie bintu bya musinzi, i kulanda ‘masambilizio a mambo palua keebo kakue Leeza.’ (Baeb. 5:12) Palua kumana nsesi viili, iloombele kwingila “mukati.” Evio vyenka pa kunti umane buino Bibilia, upalile kusoma waapoozeleko saana maano. Kumona seemu inge viikwateene ni seemu inge ya Bibilia i nzila iweeme saana ya kusambilila Bibilia. Te kwikwindasie kunvua bisinka beelia byuzumiine, inzi ikwinde kumana juu ya ki ubizumiine. Eevi kunvuisia Bibilia, tupalile kusambilila twapoozeleko saana maano. Mutumua Paulo waabasokele balupua ni bankazi Bakristu baye basoma kisinka kili mu Mulandu Wakue Leeza bapoozeleko saana maano eevi baviinde ‘kukimana . . . mu bukata ni mu kuleepa, mu kwingila pansi ni mu kutuuluka.’ Kine bakita evio, “bali kuya baziikile misila” mu kiketekelo kyabo. (Baef. 3:14-19.) Ni fwefue tupalile kukita enka evio. w23.10 18 lifu. 1-3