Oserúami japi nijí Japi Aʼlá Niseri

Kuira ba hermanos:

Japi riká ti we galé Onorúami alí echi pagótami, ati nijewi jepuná nulalíwami japi jériká aní: “Binérasi ne siʼnéami echi jaré pagótami, [...] ne siʼnéami [pakosi]” (Mat. 28:19, 20; Mar. 12:28-31). Ati we galéami nísaká, ati we kanílika iʼwíripo echi pagótami japi a mulíwinali Onorúami jiti ne sulachí jonsa binema echi jitra (Heb. 11:6).

Chabé ko ati iʼwérili nokayé binea ibili niraa echi raʼíchali japi ta iyiri aniboa japalí ti nawesa alí nijía echi publicaciones. Nalí be, jipi ko ati binésaré chúriká raʼichabo echi pagótami yúa. Tamujé ko newa noká japi ta we galéami ju japalí ti raʼicha japi iyiri machinali jarecho. Sinéami echi pagótami suwinárika nata alí noká, jiti bela ati we aʼlá natásaré alí kipúsaré piri iyiri machinali o raʼichánali echi pagótami japi ta yúa raʼicha. ¡Jepuná oselí tamó iʼwírima jiti echi riká nokiboa!

Jepuná oselí olá 12 binelíwami japoná ruyé 12 aʼlá namuti japi ta aminabi nokisáré bineria echi pagótami jiti nijéwami nima. Ibili niraa echi binelíwami, ruyé japi chúriká isili echi Jesús o bilé cristiano bachá siglo bitéami, japalí simili nawisasia o binérisia echi pagótami. Jipi ko ma ke binepo ibili niraa echi raʼíchali japi ta aniboa japalí ti nawesa, nalí jipi ko newa nokiboa japi ta we galé echi pagótami. Tákoré suwaba echi binelíwami japi bineri na oselí we natéami ju japi nokiboa japi riká aní echoná japalí ti nawesa, nalí be jaré echi binelíwami tamujé iʼwírima chúriká nokiboa japalí ti chotásimi raʼichia, japalí ti checho ku simí yúa raʼichasia alí japalí ti ma bineri echi pagótami japi aní echi Biblia.

Japalí mi biné ibili niraa echi binelíwami, natá chumi riká isima japi aní echoná japalí mi yúa raʼicha echi pagótami. Iʼwérili isí aminabi we galea Jeobá alí echi pagótami jiti jepuná ko we natéami ju. Ami echi riká isísaká, ami we aʼlá binérima echi pagótami jiti echi ko ayénachó Jesús discípulowala nima.

We ti kanili napawika nochia emi yúa (Sof. 3:9). ¡Jeobá mi natétima japi riká timí iʼwérili noká aminabi we galea echi pagótami alí iʼwiria jiti najátima Jesús!