CHUTI RIKÁ NOKIBOA JAPI RIKÁ CRISTO

Iʼwiri echi pagótami japi ke bichíyami ju jiti machimea Onorúami

¿Ami siné kaachi ke nawésili bilé pagótami ke bichíyami jiti mi mayeli japi ke kipúnilima? Echi riká nísaká, newalá japi wiká japi jipi ma testigo Jeobá ju, chabé ko ke olayé religión o ke bichíyami nili Onorúami. Jaré ko newaleli bi japi ta iʼwíripo binea echi namuti jitra japi néwariwéliti japi Onorúami a bité (Ro 1:20; 10:14).

MA INESA ECHI VIDEO NEWALASI: JAPI KE BICHÍYAMI JU A OMERO BICHÍYAMI NIYA. ECHI PAGÓTAMI JAPI KE OLÁ RELIGIÓN, ANISÍ JAPI TI MI NÁRIPORÉ JENAʼÍ:

¿Chúriká mi iʼwiri japi ikili Tommaso nawesia echi pagótami japi ke bichíyami ju?

Japi mi ruyema

Chúriká mi isima

Ami riwisáaká bilé pagótami japi ke bichiwi Onorúami, simárika raʼichá echi yúa alí we aʼlá kipú japi echi nata alí japi echi nili (2Ti 2:24). Raʼichá echi namuti jitra japi echi machinali. ¿Achi kipúnali echi namuti jitra japi néwariwéliti japi Onorúami a bité alí japi ma iʼwírili jarecho jiti bichíwima? Echi riká nísaká, nee echi oselí alí videos japi raʼicha echi jitra. Echi folletos japi rewé ¿Es la vida obra de un Creador? alí El origen de la vida. Cinco cuestiones dignas de análisis, uchuchaari echoná oselí japi mi muchuwasa simí nawisasia jiti mi ke jilima aa.

A keʼré japi ne kulí ko ami we majaa nílima raʼichia bilé pagótami yúa japi ke bichiwi Onorúami. Echi riká nísaká, iʼwírili tani bilé publicador japi ma we machíami ju. Alí newalá japi Jeobá ko a omérima mi iʼwiria jiti mi aʼlá binérima sinéami echi pagótami, tákoré jaré ko mayé japi Onorúami ke bité (Hch 13:48, TNM).