¿Ami machiyé?
Echalí bachá siglo, ¿piri nokayé echi sacerdotes echi namuti jákami lalá yúa japi miʼayé echoná templo?
CHABÉ echomí Israel, sinibí bamíali echoná templo echi sacerdotes miʼayé miles namuti jákami echoná altar. Josefo, japi bilé historiador Judío nili japi biteili bachá siglo, anili japi Pascua kaachi echi sacerdotes miʼayé 250,000 boʼwá japi riká chiliwéliami. Jiti la waʼlú nili echi la japi ruʼlúwili (Lev. 1:10, 11; Núm. 28:16, 19). ¿Chu olárami nili suwaba echi la yúa?
Echi arqueólogos riwali japi echi templo de Herodes japi néerami nili echi bamíali 70 chéami japalí najunárami nili, a olali japoná machínima echi baʼwí chókami. A keʼré japi echoná ruʼlúwili echi la echoná templo jonsa japi ripá rabó wilili.
Binepo okuá namuti jepuná jitra:
Echi altar rilé iwáami nili. Echoná Misná (bilé libro chabéwami japi oserúami nili ma simíriachi bamíali 200, echi ko olá nulalíwami alí aní chúriká pireili echi judíos) nirú jaré oserúami japoná ruyé chúriká ruʼlúwili echi la echoná altar jonsa. Echoná aní japi rilemi echoná altar sitochi niruili okuá iwáami, alí echi namuti jákami lalá alí echi baʼwí japi néeli biʼwamia echi altar, máali echoná iwáachi alí miná ko nawayé echoná valle o ipórachi Cedrón.
Japi ruyéliwa echoná Misná (japi niruili iwáami echoná mulipi altar) a ju japi riká riwali echi arqueólogos jipi rawé. Bilé libro japi ruyé chúriká piréami nili echi judíos chabé, aní japi mulipi echoná templo riwirúami nili japoná máali echi baʼwí chókami alí japi echi ko néerami níliré ruʼluwamia echi la baʼwí nalóami, japi machínali echoná templo jonsa japoná echi sacerdotes miʼayé echi namuti jákami.
Olali waʼlú baʼwí. Echi sacerdotes newaleli waʼlú baʼwí biʼwamia echi altar alí japoná machínili echi la baʼwí nalóami. ¿Kumi jonsa pali echi baʼwí? Echoná niruili japi riká acequias alí jarecho si namuti jiti echi baʼwí nawama echoná ciudad jonsa. Echi arqueólogo Joseph Patrich ruyeli: “Ke niruili bilecho templo chabé nirúami japi riká echi templo Jerusalén wilíami, japi we aʼlárika olali chúriká nawama echi baʼwí echoná”.