Jarecho okuá hermanos japi Aʼlá Nisériami ju

5 INÁRACHI OCTUBRE 2024, echoná napawíliwami we natéami aniri bilé anuncio: echi hermanos Jody Jedele alí Jacob Rumph jawárami nili japi riká Aʼlá Nisériami. Okuánika echi ma wiká bamíali nóchili Jeobá.

Echi hermano Jedele ochérili echomí Misuri (Estados Unidos). Echi onolá binérili echi bichíwali, alí sinéami pireili echoná japoná niruili kuabi testigo Jeobá. Jiti la echi ko omérili machiyá hermanos omáana piréami japi siyé echoná iʼwírimia nawesia. Inea japi Jeobá puéblowala we galéami alí napawika ju, we iʼwírili echi. Pakoli 15 inárachi octubre 1983 alí we kanilie nawesia. Jiti la, japalí sunili binea echoná escuela, echi ko chotásili nóchilia Jeobá japi riká precursor regular echi michá septiembre 1989.

Japalí echi alí echi wayela kuuchi nili, echi wénwala ko yurie echomí Betel. Simíaya echoná, we iʼwírili echi okuánika jiti nóchinilima Jeobá echoná. Alí a omérili echi riká nokayá. Echi michá septiembre bamíali 1990, echi hermano Jedele chotásili nochia echomí Betel echoná Wallkill. Bachá ko nóchili echoná Departamento de Limpieza alí miná ko Servicios Médicos.

Echalí echoná mulipi niruili congregaciones español raʼicháliami, japi aminabi wiká nílisili alí newalelie japi echi hermanos rijoi simama iʼwírisia. Echi hermano Jedele chotásili simiyá bilé echoná congregación alí binea español raʼichia. Miná ko machili bilé precursora japi asali echoná circuito Dámaris riwéami. Pe aminana niwili alí napawika chotásili nochia echoná Betel.

Bamíali 2005, ku simíali Betel jonsa tibumia Jedele iyela alí Dámaris wénwala. Echalí, okuánika echi nóchili Jeobá japi riká precursores regulares, alí echi hermano Jedele wisabé niraa binériami nili echoná Escuela japi Biné echi Precursor. Ayénachó echi ko iʼwírili echoná Comité de Enlace con los Hospitales alí Comité Regional de Construcción japi iʼwírili echoná japoná echi biteili.

Bamíali 2013, checho ku bayeri echomí Betel, nalí jipi ko nochamia iʼwírimia niwayá echi Betel echomí Warwick. Echalí jonsa ayénachó nóchili echoná Patterson alí Wallkill. Echi hermano Jedele ayénachó nóchili echoná Departamento Local de Diseño alí Construcción alí echoná Servicios de Información sobre Hospitales. Marzo 2023, wiláari japi riká kuʼíriami echoná Comité de Servicio. Natia echi nóchali jitra japi olali, echi ko jéaní: “Japalí ti olá kulíwami nóchali, a keʼré japi ta we jilí nirabo. Nalí echalí ju japalí ti newalásaré japi we natéami ju bichiwia Jeobá, jiti echi ju japi isimí japi oméripo nokayá chuwé nóchali”.

Echi hermano Rumph ochérili echomí California (Estados Unidos). Japalí echi taa nili, echi iyela ko ke simiyé napawíliwachi alí nawisasia, nalí a iʼwérili isili bineria Jacob echi bichíwali japi aní echi Biblia. Echi hermano Rumph, ayénachó sinibí bamíali simiyé inesia echi akáchuwala, japi bilé Testigo we aʼlá nijéwami nili, alí echi iʼwírili jiti aminabi binénalima echi Biblia jitra. Jiti la japalí 13 bamíbami nili, echi ko chotásili binea. Alí 27 inárachi septiembre 1992, echi ko pakoli japalí bilé towí nili. Ayénachó echi iyela checho ku chotásili nawesia alí simiyá napawíliwachi, alí echi onolá alí rejimala ayénachó bineli Jeobá jitra alí pakoli.

Japalí echi hermano Rumph towí nili, inéi japi echi precursores we kaníliami nili. Jiti la ma sunisa binea echoná escuela, echi ko chotásili precursor niya echi michá septiembre bamíali 1995. Alí bamíali 2000, echi ko simili Ecuador japoná newalelie nawésiami. Echoná machili bilé precursora Canadá bitéami Inga riwéami, alí pe aminana niwili. Japalí kulí niwili, echi ko mochili echoná bilé pueblo echomí Ecuador, japoná kuabi publicadores niruili. Jipi rawé echi kuabi publicadores, ma bilé congregación we nijéwami ju.

Miná ko jawáari japi riká precursores especiales alí nóchili japi riká circuito. Bamíali 2011, bayeri echoná clase 132 de Galaad. Miná ko ma machínisa echoná jonsa, juláari wikanami jenaʼí Wichimóbachi alí nóchili japi riká circuito, misioneros alí echoná Betel. Echi hermano Rumph ayénachó binériami nili echoná Escuela japi Biné echi Nawésami Raʼíchali Kalabé.

Echi nayulí COVID-19 jitra, echi ko ku simíali Estados Unidos. Bayeri nochamia echoná Betel echomí Wallkill, japoná echi hermano Rumph binéritami nili echoná Departamento de Servicio. Pe aminana checho ku juláari echoná sucursal japi wilí echomí Ecuador, alí echoná echi hermano Rumph nóchili japi riká Comité de Sucursal. Bamíali 2023 juláari echomí Warwick, alí enero 2024 echi hermano wiláari japi riká kuʼíriami echoná Comité de Servicio. Natia echi jitra japoná iyénili, echi ko jéaní: “Ke me natéami ju kumi ti nóchilia Jeobá, nalí jépuká ti yúa nocha: echi hermanos”.

Ati sinibí we natéami niraa iné jepuná hermanos alí japi riká noká echi (Filip. 2:29).