Binelíwami 5
¿Piri isiima Onorúami jenaʼí Wichimóbachi?
¿Chúsiá niwali Jeobá echi Wichimóbachi? (1, 2)
¿Chúsiá jipi echi Wichimóbachi ke baʼóami ju? (3)
¿Chu ikiméalé echi pagótami chati? (4)
¿Piri isíimalé Jesús pe aminana mi kiti kuʼírima echi nayúami, echi ochérami, alí echi suwíkami? (5, 6)
¿Piri mi isíisaré kiti mi olama namuti kalabé pe aminana mi? (7)
1. Jeobá ko niwali echi Wichimóbachi kiti echi pagótami we kanílika pirélima sinibí. Echi ko nakiyé japi echoná pirélima echi pagótami aʼláala (Salmo 115:16; Isaías 45:18). Echi Kawí tasi sineti najunárami nima (Salmo 104:5; Eclesiastés 1:4).
2. Japalí kecho niwali echi rejoy, Onorúami ko niwali echoná Wichimóbachi biléana we baʼóami alí riwali “Edén”. Echoná muchúali echi bacháwala rejoy alí echi bacháwala mukí: Adán alí Eva. Onorúami ko nakili kiti olama kúchuwala alí kiti wiká muwésima. Kilipi kilipi niraa we baʼóami niwama riweili omáana Wichimóbachi (Génesis 1:28; 2:8, 15).
3. Adán alí Eva chati namuti nokali tako a machili larú japi chati ju ke nijéwilia Onorúami nuláala. Kiti bela, Jeobá machí awali echoná Wichimóbachi baʼóachi jonsa japi Edén anilíachi nili alí ma ke wesi pireili echoná (Génesis 3:1-6, 23). We be nalí, Jeobá ko a bijí newalá japi isiima ruli jenaʼí Wichimóbachi. Echi ko aní japi niwama echi Wichimóbachi we baʼóami japi sinibí pirélima echi pagótami. ¿Chúriká niwámalé? (Salmo 37:29.)
4. Bachá ko suwábitami nima echi pagótami we chati alí pe aminana ko niwama echi Wichimóbachi we baʼóami (2 Pedro 2:9). Jepuná ko ikimea japalí Jeobá pama echi Armagedón, japi echi nikóala ju kiti ma suwábima echi chati namuti. Alí pe aʼlínala ko ma érika achaba echi Satanás bilé mili bamíali. Ma ke wesi chati namuti nokimea. Pe echi Onorúami amígowala bi pirélima (Apocalipsis 16:14, 16; 20:1-3).
5. Alí biché Jesucristo nulema echi pagótami bilé mili bamíali (Apocalipsis 20:6) alí kilipi kilipi niraa suwibásima echi namuti chati japi ta olá tamujé ripokálachi alí japi ta nata. Ata nipa japi riká nili echi Adán alí Eva japalí kecho chati nokáami nili. Alí biché ma ke che nirúlima nawilí, mukuwáami ni bilé ochérami nílisima. Echi nayúami ko ku saʼwimea alí echi ochérami kulí ochérami ayenama (Job 33:25; Isaías 33:24; Apocalipsis 21:3, 4).
6. Japalí bilé mili bamíali nulasa Jesús, echi pagótami nijéwami ko nochama kiti we baʼóami niwama echi Wichimóbachi (Mateo 5:5). Ayénachó, milloni suwíkami ku mochísima alí checho ku pirélima jenaʼí Wichimóbachi (Hechos 24:15). A nokisáaká japi Onorúami nakí, sinibí pirélima jenaʼí Wichimóbachi. Ke echi riká nokisáaká suwábitami nima (Juan 5:28, 29; Apocalipsis 20:11-15).
7. Echi riká isiima Onorúami japi riká nakili né chokichí jonsa jenaʼí Wichimóbachi. ¿Ami kanílisa nili narea jepuná namuti? Alí biché, ami binésabiré Jeobá kitra alí ami nijéwisabiré echi nuláala. Bilé namuti japi mi kuʼírima ko ju japi mi sinibí simea echoná napawíliwachi Japoná biné echi Testigo Jeobá (Isaías 11:9; Hebreos 10:24, 25).
[Iyóktami/Foto japi chukú echoná página 10]
Wikáwili echi Weʼé baʼóami
[Iyóktami/Foto japi uchuwi echoná página 11]
Ma simírisa Armagedón, echi Wichimóbachi we baʼóami ayénisima