Binelíwami 7

Chúriká mulíwipa Onorúami amachíkika

¿Chúsiá we natéami ju amachíkilia Onorúami sinibí? (1)

¿Jépuká ta amachíkisaré, alí chúriká? (2, 3)

¿Piri namuti a omérosaré taa alí aniyá japalí ta amachila? (4)

¿Chu kabú mi amachíkisaré? (5, 6)

¿A kipúiré Onorúami suwaba echi amachíliami? (7)

1. Echi amachíliami ko ju raʼichalia Onorúami riwiika. Ata amachíkisaré Onorúami sinibí. Ata echi riká nokisáaká, ata nílipalé japi we mulipi mochía echi yúa japi riká bilé amigo we nakiwáami. Tako Jeobá walubéala ke alí jiwérami, a kipusú japalí ta amachiki. ¿Ami amachiki Onorúami sinibí? (Salmo 65:2; 1 Tesalonicenses 5:17.)

2. Echi amachíkiwami ko ju aliwa walubéala bilé rikamti. Kiti bela, pe Onorúami Jeobá bi amachíkisaré. Japalí Jesús jenaʼí Wichimóbachi iyénali, sinibí amachíkili pe echi binói Onolá bi. Tamujé ayénachó a chikóriká nokisáré (Mateo 4:10; 6:9). We nalí ata sinibí amachíkisaré Jesús rewalá kitra. Echi riká a néwariwélitipa japi ta riwii echi Jesús wilíamiwala alí kiti ta a bichiwi kiti echi mukuli kiti ta niyúbitami niba (Juan 14:6; 1 Juan 2:1, 2).

3. Japalí ta amachiki Onorúami né sulachí jona raʼichásaré. Ke amachíkisaré raʼíchika echi bi raʼíchali wisabé niraa, kecho leérika biléana oselichi oserúa uchúwami (Mateo 6:7, 8). Ata omérosaré amachikia sinibí alí japi kumi ko yena ke, we nalí riwiika. Onorúami achó a kipusú japalí ta pe nátaka bi amachiki (1 Samuel 1:12, 13). We aʼlá ju amachíkilia biléana japoná ke chiliwalia alí japoná ke nirú pagótami (Marcos 1:35).

4. ¿Piri namuti a omérosaré taa alí aniyá japalí ta amachila? Pe chuwé namuti kiti mi kuʼírima kiti mi Onorúami amígowala nima (Filipenses 4:6, 7). Echi amachíkiliami japi aneliwa tamujé Onolá a bineri japi ta tánisaré kiti biʼwíami nima echi Jeobá rewalá alí kiti we sapú niwama japi nakí. Ayénachó ta tánisaré kiti nijima echi namuti japi ta newalé, kiti ta wikáwitami niba echi namuti chati kitra japi ta nokali alí kiti nikúuroma kiti ta ke rujipa echi Satanás misúalachi (Mateo 6:9-13). Japalí ta amachiki néwariwélitisaré japi tamujé ko ke me natéami ju. Pe ta tánisaré bi echi namuti japi Onorúami kalé (1 Juan 5:14).

5. Mujé ami omero amachikia sinibí japalí mujé sulala matétara iyánali (1 Crónicas 29:10-13). Kiti riwé amachikia Jeobá japalí mi olá cha ikiwáami alí namuti we jilírami (Salmo 55:22; 120:1). Ayénachó we natéami ju amachíkiwa japalí ta kecho koʼpóaré (Mateo 14:19). Jeobá ko nakí kiti “ke siné riwesi [echi] yúa raʼicha” (Efesios 6:18).

6. Ata nokisáaka bilé namuti chati, ata amachíkisaré Jeobá alí tánipa kiti ta wikáwitami niba. Onorúami ko “sayeka isimí kiti wikawama” sinibí japalí ta anésaká echi namuti chati japi ta nokali alí né jiwérika nokiboa ma ke che echi riká nokayá (Salmo 86:5; Proverbios 28:13).

7. Jeobá ko a kipusú japalí amachiki pe echi pagótami aʼláala bi. Kiti Onorúami kipuma mujé amachíala né mi jiwérika isíisaré nijewia echi nuláala (Proverbios 15:29; 28:9). Japalí mi amachiki, ami riwiika isíisaré (Lucas 18:9-14). Japi mi tánili amachíkika ami né echi riká isíisaré. Echi riká néwariwélima japi mi bichiwi alí japi mi né sulachí jona amachiki. Echi riká bi mi kipuma Jeobá mujé amachíala (Hebreos 11:6).