¡Echi Wichimóbachi we baʼóami ma mulipi nawama!

Echi namuti chati japi ikísimi jenaʼí Wichimóbachi a néwariwéliti kiti ma mulipi nima echi Wichimóbachi we baʼóami. Echi Biblia anili wabé chabéi japi ta riwiboa riweili rawemti we jilírami pe chabénala kecho nawáachi echi Wichimóbachi baʼóami. Jipi ko ta piré echi rawemti. Jepuná ko ju jaré namuti japi Biblia anili japi ikimea riweili:

Weli nakówami. “Alí biché jaré oʼwéara silíami pagótamiwala né wabé nakoma auché jaré oʼwéara silíami pagótamiwala sayérala.” (Mateo 24:7.) Jepuná raʼíchali né a echi riká ikísimi. Echi bamíali jonsa 1914 niruili echi okuá weli nakówami omáana kawirli alí che jaré nakówami ke me weli. Miyoni pagótami suwili echi kitra.

Nawilí japi omáana chijaní. “Ayénachó wikabé pagótami wabé nayúkama.” (Lucas 21:11.) ¿A echi riká ikísimi jepuná raʼíchali? Ayena a. Echi kánser, echi nayulíwami sulachí, echi tuberkulosis, echi bikalí alí jarecho nawilí japi a oʼyáali miyoni pagótami.

Nirúlima lochéwami. Omáana Wichimóbachi nirú wiká pagótami japi ke olá piri koʼmea. Wiká miyoni pagótami suwí locheka sinibí bamíali. Jepuná ko ju jarecho namuti kiti ta binériwa japi echi Wichimóbachi we baʼóami ma keayó nima. Echi Biblia aní: “Wisabé né wabé lochema jenaʼí wichimóbachi piréami pagótami” (Marcos 13:8).

Echi Wichimóbachi nokomea. “Wikanami jenaʼí wichimóbachi né wabé nokomea kawí.” (Mateo 24:7.) Jipi ayena a chigóriká ikísimi cho. Ma suwili wiká mili pagótami kiti 1914 jonsa né wisabé niraa nokoyá ijósimi echi Wichimoba.

Pagótami chati. Echi pagótami “né wabé korúkami nima echi winomí” alí ‘aboni we nakiká nokimeaʼ. “Né wabé nakimea oránala mapurigá aboni kaníraga olá, chopi aboni ke tasi nokimea bichíinala Riosi.” “Ke tasi nijéwami nima aboni wénwala.” (2 Timoteo 3:1-5.) ¿Ke chakó a nirú wiká pagótami echi iyiri jipi rawemti? Ke tasi riwiwi Onorúami alí ke riwé kiti jarecho binema Onorúami kitra.

Namuti we chati. Ayénachó “né wabé muwéwama echi wabé chati orowáwami” (Mateo 24:12). ¿Acha mi né wabé ritiwá namuti chati jepuná kuwachimti bamíali? Japi kumi ko rikáachi ke a nirú pagótami japi chikó, japi eki alí japi risoa olá jarecho pagótami.

Suwaba jepuná kitra bineri japi echi Onorúami Gobiérnowala ma mulipi nawama. Echi Biblia aní: “Japalí tamí ritiwá japi ikí jepuná namuti machisí kiti echi Onorúami Gobiérnowala ma mulipi nawá” (Lucas 21:31, Nuevo Mundo). We nalí, ¿piri be ju echi Onorúami Gobiérnowala? Echi ko ju Onorúami Gobiérnowala rewegachi nirúami japi niwama echi Wichimóbachi we baʼóami. Iyema echi nulalíwami sinéami isélikami alí pe echi bineli bi nulama (Daniel 2:44).