Biné japi ikili chabéi

Jeobá ko ke riwema echi pagótami chati japi pirélima echoná Wichimóbachi baʼóachi. Echoná ko pirélima pe echi amígowala bi. ¿Chú ikimea echi pagótami chati? Ami machimea, ami binésaká churiká biteili echi Noé. Wabé chabéi bamíali biteili Noé. Echi ko nili bilé rejoy aʼláala japi né sinibí isili né suwaba jiwérika isiá japi Jeobá nuleli. We nalí be jarecho pagótami nokayé chati namuti. Kiti bela, Jeobá ko aneli Noé kiti julama ruli echi walubé ukí kiti koʼwimea echi sinéami pagótami chati. Ayénachó nuleli kiti niwama riweili bilé arka kiti ke mukumea echi binói alí echi japi yúa pireili japalí nawama riweili Echi Walubé Ukí (Génesis 6:9-18).

Noé alí echi japi yúa pireili niwali bilé arka. Noé ruyeli echi pagótami japi nawama riweili Echi Walubé Ukí, kepi wesi kipuli pa. Ke bilé riweli nokayá namuti chati. Japalí Noé ma sunili niwayá echi arka moʼali echi namuti jákami alí ayénachó moʼili echi japi yúa pireili. Alí biché, Jeobá paali Echi Walubé Ukí; ukuli naosa makoy rawé alí naosa makoy rokó alí echi bawí póoili omáana echi Wichimóbachi (Génesis 7:7-12).

Echi pagótami japi chati nili ko suwili, Noé alí echi kúchuwala a niyúbitami nili. Jeobá ko tibuli japalí we ukuli alí echi riweli echoná Wichimóbachi japoná ke bilé iteili namuti chati (Génesis 7:22, 23). Echi Biblia ko aní kiti Jeobá checho a koʼwimea echi pagótami japi ke tasi riwé nokayá echi chati namuti. Echi pagótami aʼláala ke koʼwirúami nima. Sinibí pirélima echoná Wichimóbachi we baʼóachi (2 Pedro 2:5, 6, 9).

Jipi ko, wiká pagótami cha nokáami ju. Echoná kawichí nirú namuti japi ke aʼlá ju. Jeobá júula echi Testígowala wisabé kiti ruyema echi pagótami japi ikimea, na jónali wiká pagótami ke be kipunali echi Jeobá Raʼicháala. Tasi riwénali japi riká piréami ju. Kecho bilé nakí japi Onorúami anema piri aʼlá ju alí piri ke aʼlá ju. ¿Chú ikiméalé jepuná pagótami? ¿Aʼláala nílimiré siné rikáachi? Wiká echi ke siné riwénilimalé japi riká nokáami ju. Ma mulipi nawama echi rawé japalí koʼwirúami nima echi pagótami chati (Salmo 92:7).

Echi Wichimóbachi ko ke najunárami nima; echi Wichimóbachi we baʼóami nima. Echi japi jipi ayeni ko Onorúami amígowala sinibí pirélima echoná Wichimóbachi we baʼóachi (Mateo 5:5).