Ami omérima anachia japalí mi najátarami nisa

Sinéami japi ta Jeobá nijéwami ju, ata kichírami alí najátarami nipo. Nalí, ¿achi ti majásaré?

1. ¿Chúsiá ti kichíliwa alí najátiliwa?

Echi Biblia we aʼlá ruyé japi “siʼnéami [...] mapu ikí sinibí nakiko chopi galabé ologá pirélanala mapurigá Jesucristo nakí, abóniko arigá kichiga aʼnajátarami níima” (2 Timoteo 3:12). Jesús ayénachó najátarami nili jiti ke isili japi Satanás nakili. Alí jiti tamujé ayénachó noká japi riká Jesús, echi gobiernos alí echi religiones tamó najati (Juan 15:18, 19).

2. ¿Piri ta nokisáré jipi jiti anachabo japalí ti najátarami nisa?

Jipi ju japalí ti aminabi we bichíwisaré Jeobá. Alí, ¿chúriká nokiboa? Ati sinibí rawé raʼichásaré Jeobá yúa alí leérisaré echi Biblia. Ayénachó ati ke riwésaré simíaya echoná napawíliwachi. Echi namuti mi iʼwírima anachia alí jiti mi ke majama japalí mi najátarami nisa o japalí mujé téemala ke nakisaa japi mi nijéwima Jeobá. Echi apóstol Pablo japi wisabé niraa najátarami nili, osali: “Riosi ju mapu tamí kuʼwira. Ketásini majama” (Hebreos 13:6).

Bilecho namuti japi tamujé iʼwírima ko ju sinibí simíaya nawisasia. Jiti japalí ti simía nawisasia ati aminabi bichiwi Jeobá alí ti ma ke me majaa echi pagótami (Proverbios 29:25). Ami ke majásaká jipi, ke mi riwema aminabi nawesia japalí echi gobiernos ma ke nakisaa japi ta nawisabo (1 Tesalonicenses 2:2).

3. Japalí ti najátarami nisa, ¿chúsiá aʼlá ju japi ta anachabo?

A bichíwali ju japi ta ke kanili japalí ti najátarami ju. Nalí ati anachásaká, tamujé ko aminabi we bichíwipo. Ayénachó ati mulipi ka nílipo Jeobá yúa jiti ta iné japi echi tamó iʼwiri japalí ti mayé japi ta aboi ke omeri anachia (leeri Santiago 1:2-4). Jeobá ko omona nili japalí tamujé risoa nili, nalí japalí ti ke siwé echi ko we kanili. Echi Biblia ko aní japalí bilé “galabé olásagá, alí a binói arigá risúu olárami níisagá, echalí Riosi Binói anema mapu [...] galabé olá mapalí échiko kilíi niráa anachasa” (1 Pedro 2:20). Jeobá ko aní japi sinéami japi anacha alí nijewi, sinibí pirélima echoná wichimóbachi we baʼóachi japoná ma ke nirúlima japi echi sayérima (Mateo 24:13).

AMINABI NATABO JAPI TA BINÉ

4. Ami omérima anachia japalí mujé téemala mi sayeri

Jesús ko ne bichíwali raʼíchili japalí anili japi jaré tamujé téemala ke nakimea japi ta Jeobá nijéwipo. Leérisi Mateo 10:34-36 alí raʼichasi jepuná jitra:

• Japalí bilé nijéwinali Jeobá, ¿chúriká nokiméeré echi téemala?

VIDEO: Jeobá tamujé tibuli (5:13)

• Bilé amigo o bilé téemala mi anesa japi mi riwema nijewia Jeobá, ¿piri mi isima?

Leérisi Salmo 27:10 alí Marcos 10:29, 30. Ma leérisa ibili texto, raʼichasi jepuná jitra:

• ¿Chúriká mi iʼwírima echi textos japalí mujé téemala o echi amigos ke mi riwesa japi mi nijéwima Jeobá?

5. Ke riwepo nóchilia Jeobá tákoré jarecho tamó cha olá

VIDEO: Ke majabo tákoré jarecho tamó sayeri (6:27)

• ¿Chu iyiri namuti japi mi ineli echoná video mi iʼwiri jiti mi ke majama?

Leérisi Hechos 5:27-29 alí Hebreos 10:24, 25. Ma leérisa ibili texto, raʼichasi jepuná jitra:

• ¿Chúsiá we natéami ju japi ta ke riwepo nóchilia Jeobá tákoré echi weli jáwami ke nakí japi ta nawisabo alí napawipo?

6. Jeobá mi iʼwírima anachia

VIDEO: Jeobá tamí jiwérili iyama (3:40)

• ¿Piri iʼwírili echi Testigos jiti omérima anachia?

Leérisi Romanos 8:35, 37-39, TNM, alí Filipenses 4:13, TNM. Ma leérisa ibili texto, raʼichasi jepuná jitra:

• ¿Chúsiá mi machí japi mi a omero anachia chuwé namuti jilírami japi mi ikí?

Leérisi Mateo 5:10-12 alí raʼichasi jepuná jitra:

• ¿Piri mi iʼwírima kaníliami niya tákoré mi risoa oliwá?

JAPI MI BINELI

Jeobá ko we natéami niraa iné japalí ti iʼwérili noká echi nijewia tákoré ti risoa olárami ju, ¡alí echi tamó iʼwírima anachia!

Piri mi animea

• ¿Chúsiá ti kichíliwa alí najátiliwa?

• ¿Piri mi isísaré jipi jiti mi anachama japalí mi najátarami nisa?

• ¿Piri namuti mi iʼwírima bichiwia japi mi a omérima anachia chuwé namuti jilírami?

JITI MI CHE BINEMA

Iné chúriká Jeobá iʼwírili bilé remalí japalí erta asali jiti ke sontarsi nínali.

Anachabo tákoré ti najátiliwa 2:34

Iné piri iʼwírili bilé niwíkami jiti wiká bamíali nóchilima Jeobá tákoré ikili wiká namuti we jilírami.

Ke ti riwé nóchilia Jeobá tákoré ti wiká namuti jilírami ikili 7:11

Biné piri namuti mi iʼwírima jiti mi anachama japalí mi najátarami nisa.

“Piri ta nokiboa jipi jiti ta anachabo japalí ti najátarami nisa” (Echi Nawésami, julio 2019)

Japalí tamujé téemala tamó sayeri, ¿chúriká nokiboa jiti kilí pirélipo echi yúa alí jiti ke riwepo nijewia Jeobá?

“‘Kiti natasi japi ni nawali jiti jenaʼí wichimóbachi piréami kilí pirélimaʼ” (Echi Nawésami, octubre 2017)