Japi ta biné echi jubá raʼíchali jitra japi anili Jacob (parte 2)

1. ¿Piri binepo jenaʼí binelíwami?

ECHI Jacob kúchuwala napawika muchuwi kipúa japi ané echi onolá. Echoná binelíwami 24, ata bineli piri aneli Rubén, Simeón, Leví alí Judá, alí japi sinéami ke mayeli japi Jacob echi aboi anema. ¿Alí piri anéliré jaréala echi kúchuwala? Ma inepo piri ta biné echi jitra japi Jacob aneli echi Zabulón, Isacar, Dan, Gad, Aser, Neftalí, José alí Benjamín.a

ZABULÓN

2. ¿Piri anili Jacob Zabulón jitra, alí chúriká ikili japi echi anili? (Génesis 49:13; ayénachó iné echi recuadro).

² (Leeri Génesis 49:13). Jacob anili japi echi Zabulón kúchuwala pirélima mulipi echoná mar, echi weʼé norte japi Jeobá iyama riweili. Pe aminana ma simírisa 200 bamíali, echi tribu Zabulón níwala nareli echi weʼé japi nili echoná nasipa mar Galilea alí echi mar Mediterráneo. Ayénachó Moisés jériká osali echi jitra: “Kanili, oh, Zabulón, echi jitra japoná mi jonsa machina” (Deut. 33:18). ¿Piri ruyá anili? A keʼré japoná bitélima Zabulón iʼwírima riweili jiti echi omérima ralayá alí ralinea japi echi olali. Ke ti machí achi echi riká ruyá anili, nalí echi Zabulón kúchuwala olali wiká namuti japi jitra kanílima.

3. ¿Piri tamó iʼwírima jiti ke riwepo kanilia?

³ ¿Piri ta biné? Kumi ke japoná ti piré o japi ta ikiyé, ata olá wiká namuti japi ta jitra kanílipo. Jiti ke riwepo kanilia, ata kanílisaré echi namuti jitra japi ta olá (Sal. 16:6; 24:5). Isini kaachi a keʼré japi ta ke kanílipo echi namuti aʼláala jitra japi ta olá, jiti ta we nata echi namuti japi ta ke olá. Jiti la, ata iʼwérili nokisáré natia echi aʼláala namuti japi ta olá (Gál. 6:4).

ISACAR

4. ¿Piri anili Jacob Isacar jitra, alí chúriká ikili japi echi anili? (Génesis 49:14, 15; ayénachó iné echi recuadro).

⁴ (Leeri Génesis 49:14, 15). Jacob aneli Isacar japi we aʼlá isili jiti we jiwérika isimí nochia, alí anili japi ju japi riká bilé burro we jiwérami ochéami, jepuná aniwáami ju japi we jiwérami ju aperia echi namuti we betéami. Ayénachó anili japi Isacar bitélima echoná weʼé japi we aʼlá ju. Alí echi raʼíchali echi riká ikili japalí echi Isacar kúchuwala nareli bilé we aʼlá weʼé japi mulipi nili echoná bakochi Jordán (Jos. 19:22). Echi ko iʼwérili nokáliré nochia ichayá echi weʼéwalachi, nalí ayénachó iʼwérili nokali iʼwiria jarecho (1 Rey. 4:7, 17). Japi riká, japalí echi juez Barac alí echi profetisa Débora iʼwírili tánili jarecho nakomia Sísara yúa, echi tribu Isacar níwala nili bilé echi japi simíali iʼwírimia (Juec. 5:15).

5. ¿Chúsiá we natéami ju japi ta iʼwérili nokiboa nóchilia Jeobá?

⁵ ¿Piri ta biné? Japi Jeobá we natéami niraa ineli echi nóchali japi nokali echi tribu Isacar níwala alí ayénachó we natéami niraa iné japalí ta iʼwérili noká echi nóchilia (Ecl. 2:24). Japi riká, natabo echi hermanos jitra japi iʼwérili noká tibúa echi hermanos echoná congregación (1 Tim. 3:1, TNM). Jepuná hermanos ke nakó japi riká nokali echi tribu Isacar níwala, nalí echi ko iʼwérili noká tibúa echi hermanos japi we nijéwami ju, jiti ke bilé namuti isima japi riwema Jeobá amígowala niya (1 Cor. 5:1, 5; Jud. 17-23). Ayénachó iʼwérili noká binea alí nijía nawésali japi iʼwérili iyama echi congregación (1 Tim. 5:17).

DAN

6. ¿Piri nóchali iyárami nili echi tribu Dan níwala? (Génesis 49:17, 18; ayénachó iné echi recuadro).

⁶ (Leeri Génesis 49:17, 18). Jacob anili japi Dan nima riweili japi riká bilé sinói japi niyúrima echi sayérala japi wabé waʼlú ju echi yúa, japi riká bilé caballo alí echi japi aseka inari. Jepuná ko aniwáami nili japi echi tribu ke majama riweili nakoa echi israelitas sayérala yúa. ¿Chúriká ikili jepuná? Japalí Israel moʼiyé echoná weʼé japi Jeobá iyama riweili, echi tribu Dan níwala upaka sírili tibusia suwaba echi israelitas (Núm. 10:25). Tákoré jarecho ke riwali japi nokayé echi tribu Dan níwala, jepuná nóchali we natéami nili.

7. Japalí ti nóchili Jeobá, ¿piri ta newalásaré?

⁷ ¿Piri ta biné? Japalí ti nóchili Jeobá, nirú wiká namuti japi jarecho ke ritiwá, japi riká biʼwayá alí atewia echi salón japoná ta napawí, iʼwiria nochia echoná asamblea alí jarecho si namuti. Ami isílaká bilé echi iyiri nóchali, a timí ané japi mi we aʼlá isimí. Newalá japi Jeobá we natéami niraa iné suwaba echi namuti japi mi isimí echi jitra. Alí wabé natéami niraa iné jiti machí japi mi isimí echi nóchali jiti mi we galé echi, ke ko jiti jarecho animea japi mi we aʼlá isimí (Mat. 6:1-4).

GAD

8. ¿Chúsiá echi tribu Gad níwala a keʼré sayéritami nima riweili? (Génesis 49:19; ayénachó iné echi recuadro).

⁸ (Leeri Génesis 49:19). Jacob anili japi wiká chikóami sayérima riweili Gad. Ma 200 bamíali simírisa, jepuná tribu ko nareli bilé weʼé japi nili echomí este baʼomi echoná bakochi Jordán, mulipi japoná pireili wiká echi sayérala. Jiti la, a keʼré japi echi ko sayéritami nima riweili echi jitra. Nalí echi tribu Dan níwala echoná pirélinalie jiti echoná olali waʼlú asalá japoná uchútima echi bukula namuti (Núm. 32:1, 5). ¡Echi tribu Gad níwala ke majáami nili! We bichíwili japi Jeobá echi iʼwírima tibúa echi weʼé japi echi iyali. Japi riká, wiká bamíali bachaka jonsa, echi ko júali aboi níwala sontarsi echomí baʼomi Jordán, iʼwírimia jaréala tribus jiti olama echi weʼé japi Jeobá iyali (Núm. 32:16-19). Echi riká nokaká we bichíwili japi Jeobá tibuma echi téemala, japi riká echi jubila alí echi kúchuwala. Alí Jeobá iyali wiká namuti aʼláala jiti ke majali alí iʼwírili jarecho (Jos. 22:1-4).

9. Ata we bichíwisaká Jeobá, ¿piri ta nokinálipo?

⁹ ¿Piri ta biné? Japi ta sinibí bichíwisaré Jeobá, tákoré isini kaachi we jilí ju (Sal. 37:3). Jipi rawé, wiká hermanos iʼwérili noká nóchilia Jeobá, japi riká iʼwiria echoná proyectos de construcción, simíaya biléana congregación japoná newaléliwa iʼwírili o nokayá jarecho nóchali echoná Jeobá níwala organización. Echi riká noká jiti we bichiwi japi Jeobá sinibí echi tibuma (Sal. 23:1).

ASER

10. ¿Piri namuti ke aʼlá nokali echi tribu Aser níwala? (Génesis 49:20; ayénachó iné echi recuadro).

¹⁰ (Leeri Génesis 49:20). Jacob anili japi echi tribu Aser níwala we winomíwami nima, alí echi riká nili. Echi ko nareli weʼé japi wabé aʼlá nili jarecho yúa japi niruili echoná Israel (Deut. 33:24). Echi weʼé japi nareli mar Mediterráneo chéami nili alí olali bilé ciudad fenicia echoná Sidón, japoná niruili bilé puerto we natéami japoná wiká pagótami ralayé alí ralinéi wiká namuti, jiti echoná siyé wiká barcos. Nalí echi tribu Aser níwala ke aʼlá nokali jiti ke machí awali echi cananeos echoná weʼéwalachi jonsa (Juec. 1:31, 32). Jiti echi ko ineli chúriká pireili echi cananeos alí jiti aboi we winomíwami nili, a keʼré japi echi jitra ma ke kanílika nóchili Jeobá. ¿Chúriká ti machí? Jiti japalí echi juez Barac bayeli sinéami nakomia echi cananeos yúa, echi tribu Aser níwala ke simíali iʼwírisia, jiti la ke ineli chúriká Jeobá niyúbili echi puéblowala echoná Meguidó (Juec. 5:19-21). Alí we riwela níliliré japalí Barac alí Débora wikarali bilé canción japalí niyúrili, jiti echoná aniyé japi Aser kilí asali ke namú isiá (Juec. 5:17).

11. ¿Chúsiá ti ke we natéami niraa inésaré echi winomí?

¹¹ ¿Piri ta biné? Japi ta iʼwérili nokisáré nóchilia Jeobá, ke ko japi riká jarecho pagótami japi ke nijewi Jeobá, jiti echi ko nata japi echi winomí alí we aʼlá pirea, wabé natéami ju jarecho namuti yúa (Prov. 18:11). Tákoré ti newalé echi winomí, ke ti natásaré japi olayá wiká winomí wabé natéami ju nóchilia Jeobá yúa (Ecl. 7:12; Heb. 13:5). Ayénachó ke ti ménilisaré wiká winomí alí ke ti olánilisaré jarecho si wiká namuti, jiti echi riká ti nokisáaká, ati siwéporé nóchilia Jeobá. Nalí ti iʼwérili nokisáré we aʼlá nóchilia Jeobá, bichíwika japi pe aminana ata sinibí pirélipo alí ti olabo wiká namuti aʼláala (Sal. 4:8).

NEFTALÍ

12. ¿Chúriká ikíliré echi profecía japi anili Jacob Neftalí jitra? (Génesis 49:21; ayénachó iné echi recuadro).

¹² (Leeri Génesis 49:21). Jacob jéanili: “Neftalí ko [...] we simárika raʼicha”. ¿Chúriká ikíliré jepuná? Echi ko níliré japalí Jesús nawesia iyénili, echi ko we simárika raʼíchili alí we aʼlá binérili (Juan 7:46). Echi ko wilí iyénili echoná ciudad Capernaúm, japi nili echi Neftalí weʼéwalachi, jiti la echi Biblia aní japi echi ciudad Jesús níwala nili (Mat. 4:13; 9:1). Alí Isaías anili japi Jesús nima riweili japi riká bilé waʼlú luz echi Zabulón piréami jitra alí Neftalí (Is. 9:1, 2). Jiti Jesús we simárika binérili, echi ko nili japi riká “echi ne bichíwali luz japi rajé suwinárika pagótami” (Juan 1:9, TNM).

13. Ata kanílitinalaká Jeobá, ¿piri ta nokisáré?

¹³ ¿Piri ta biné? Japi Jeobá we natéami niraa iné echi namuti japi ta aní alí chúriká ti aní. Ati kanílitinalaká echi, ata simárika raʼichásaré. ¿Chúriká nokiboa? Bilé ko ju japi ta sinibí bichíwali raʼichásaré (Sal. 15:1, 2). Ayénachó, ata anisáré echi namuti japi iʼwérili iyama jarecho alí japalí aʼlá nokisaa anepo japi we aʼlá nokali, alí ke cha riká raʼichásaré jarecho jitra o sinibí aniyá echi namuti japi ta ke galé (Efes. 4:29). Ayénachó ti omeri natia chúriká nokiboa jiti ke me jilí nirabo chotasia raʼichia echi pagótami yúa jiti ruyepo Jeobá jitra.

JOSÉ

14. ¿Chúriká ikili echi profecía japi anili Jacob José jitra? (Génesis 49:22, 26; ayénachó iné echi recuadro).

¹⁴ (Leeri Génesis 49:22, 26). Jacob we kaníliliré José jitra, jiti echi ko Jeobá jitra “chapirúami nili jaréala rejimala yúa”. Anili japi José ko nili “bilé rojá we rakéami siwila”. Echi binoy Jacob nili echi rojá alí José ko nili echi siwila japi machínili echi rojá jonsa. José nili echi ne bacháwala ranala japi olali Raquel, echi Jacob upila japi wabé galeli. Jacob anili japi José narema riweili echi namuti japi iyérami nili Rubén, echi bacháwala Lea ranala, echi biléala upila japi olali Jacob (Gén. 48:5, 6; 1 Crón. 5:1, 2). Jepuná profecía ikili japalí echi okuánika kúchuwala japi olali José, japi riwéami nili Efraín alí Manasés, ibili niraa nili bilé tribu echoná Israel alí nareli echi weʼé japoná pirélima (Gén. 49:25; Jos. 14:4).

15. ¿Piri isili José japalí cha olárami nili?

¹⁵ Jacob ko jéanili José jitra: “Echi atá tóami ke riweli cha olayá echi, mujuli echi alí ke riweli kichía” (Gén. 49:23). Jepuná ko nili echi rejimala japi ne kulí ko ke galeli echi alí cha olali. Nalí José ko ke iyoli echi yúa alí ke cho Jeobá yúa. Ayénachó Jacob jéanili: “Echi níwala atá ke nokeli alí echi sikala ke riweli jiwérami niya alí sapúami” (Gén. 49:24). Japalí ikili namuti we jilírami, José ko we bichíwili Jeobá. Ayénachó ku wikáwili echi rejimala alí we simárika isili echi yúa (Gén. 47:11, 12). Echi ko riweli japi echi namuti jilírami isima japi aminabi we aʼláala rijoi nima (Sal. 105:17-19). Jiti echi riká isili, Jeobá ko echi néeli jiti isima namuti we natéami.

16. ¿Chúriká nokiboa japi riká José japalí ti ikí namuti we jilírami?

¹⁶ ¿Piri ta biné? Kiti siné riwepo japi echi namuti jilírami isima japi ta riwepo Jeobá o echi hermanos. Newalabo japi Jeobá isini kaachi riwema japi ta ikiboa namuti we jilírami, tamó binérimia alí tamó iʼwírimia jiti aminabi we aʼlá cristianos nipo (Heb. 12:7, TNM, nota). Echi riká, echi ko tamó iʼwírima olayá we aʼláala cualidades, japi riká we natimáami niya alí wikáwiami (Heb. 12:11, TNM). Alí ti machí japi ta anachásaká, Jeobá ko tamó iyama wiká namuti aʼláala japi riká isili José yúa.

BENJAMÍN

17. ¿Chúriká ikili echi profecía japi anili Jacob Benjamín jitra? (Génesis 49:27).

¹⁷ (Leeri Génesis 49:27). Jacob bachá anili japi echi tribu Benjamín níwala, sontarsi nima riweili japi riká malibochi we aparúami (Juec. 20:15, 16; 1 Crón. 12:2). Miná ko néeli echi raʼíchali “biʼá” alí “ma aʼlíwachi”. “Biʼá” aniwáami nili japalí echi Israel chotásili olayá isélikami. Saúl ko nili echi ne bacháwala silíami japi nawáami nili echi tribu Benjamín níwala jonsa, alí ke majaka nakoli echi filisteos yúa (1 Sam. 9:15-17, 21). Alí “ma aʼlíwachi” aniwáami nili japalí ma wiká bamíali simírili alí ma ke niruili isélikami echoná Israel. Echalí echi mukí silíami Ester alí echi walúala nuláami Mardoqueo, japi ayénachó síkami nili echi tribu Benjamín níwala jonsa, ke riweli japi echi persas koʼwimea sinéami echi israelitas (Est. 2:5-7; 8:3; 10:3).

18. ¿Piri ta biné echi jitra japi riká nokali echi tribu Benjamín níwala?

¹⁸ ¿Piri ta biné? Echi tribu Benjamín níwala we kaníliliré japalí Saúl silíami nílili, japi riká anili echi profecía japi Jacob anili. Nalí japalí Jeobá wilali David japi riká silíami, japi echi tribu Judá níwala nili, echi benjaminitas iʼwírili (2 Sam. 3:17-19). Alí japalí ma wiká bamíali simírili, echi jaréala tribus sayérili Judá alí echi silíami japi Jeobá wilali, nalí echi benjaminitas ke echi riká nokali (1 Rey. 11:31, 32; 12:19, 21). Jipi rawé, Jeobá ko jáwili jaré rijoi jiti nulema echi puéblowala. Tamujé ayénachó nijéwisaré alí iʼwírisaré japi riká nokali echi benjaminitas (1 Tes. 5:12).

19. ¿Piri ta bineli echi raʼíchali jitra japi Jacob anili kecho bijí mukuyá?

¹⁹ Ata wiká namuti bineli echi raʼíchali jitra japi Jacob anili kecho bijí mukuyá. Checho binea echi jitra tamó iʼwiri aminabi we bichiwia japi echi jaréala profecías japi uchuwi echoná Biblia, a echi riká ikimea. Alí binea echi aʼláala namuti japi nareli echi Jacob kúchuwala, tamó iʼwiri machiyá piri ta nokisáré ata nakiyáaká japi Jeobá we kanílima tamujé yúa.