Chúriká iʼwíripo bilé binéami jiti testigo Jeobá nínalima

1, 2. a) ¿Chúsiá jaré binéami kecho aʼlá machí achi testigo Jeobá nima? b) ¿Piri ta binepo jena binelíwami?

JAPALÍ mi kulí nátili testigo Jeobá nimia, ¿achi niruili jaré namuti japi mi jitra majali? A keʼré japi mi majali echi japi mi yúa nóchili, amigos o mujé téemala japi ke nakili japi mi Testigo nima. O ami nátiliré japi mi ke siné omérima isiá japi Jeobá nulá. Echi riká nílaká, ami machimea chu inili echi binéami japi kecho aʼlá machí achi testigo Jeobá nima.

² Jesús ko aʼlá machili japi echi iyiri namuti isima japi bilé we jilí nirama nijewia Jeobá (Mat. 13:20-22). Nalí echi ko ke riweli iʼwiria echi japi kecho aʼlá machili achi echi najátowala nima. Ati nokisáaká japi riká echi, ati oméripo iʼwiria echi binéami 1) machiyá piri jilí niraa testigo Jeobá nilia, 2) aminabi we galea Jeobá, 3) bachá isiá japi Jeobá nakí alí 4) machiyá chúriká isima japalí jarecho sayérisa. ¿Chúriká nokiboa japi riká Jesús japalí ti nee echi libro We mi kanílika bitélima iʼwírimia echi binéami testigo Jeobá niya?

IʼWIRI ECHI BINÉAMI MACHIYÁ PIRI JILÍ NIRAA TESTIGO JEOBÁ NILIA

3. ¿Piri namuti isili japi Nicodemo we jilí nirama najatia Jesús?

³ Nicodemo walúala nuléami nili echi judíos. Japalí Jesús kulí usani michá iyénili nawesia, echi ko ma machili japi Jesús nili echi Mesías (Juan 3:1, 2). Nalí echi ko we jilí nirali Jesús najátowala niya jiti “we majali echi jaré oʼwéala Juríosi”, jiti la ichípika simili Jesús yúa raʼichamia (Juan 7:13; 12:42). Echi ko nátiliré japi ma ke walúala nuláami nima alí ma ke olama echi winomí najátisaká Jesús.a

4. ¿Chúriká Jesús iʼwírili Nicodemo jiti aʼlá inámima piri nakili Jeobá japi echi isima?

⁴ Nicodemo we aʼlá machili echi Moisés Nulalila, nalí newaleli japi bilé iʼwírima aʼlá inamia piri nakili Jeobá japi isima. ¿Chúriká iʼwírili Jesús? Echi ko raʼíchili echi yúa, tákoré Nicodemo we rokojó simili echi yúa raʼichamia. Alí we aʼlá ruyeli japi isísaré jiti echi najátowala nima, japi riká riwea isiá chati namuti, pakoa alí néwariwélitia japi we bichiwi echi (Juan 3:5, 14-21).

5. ¿Chúriká ti omeri iʼwiria echi binéami machiyá piri namuti ke riwé japi testigo Jeobá nima?

⁵ A keʼré japi bilé binéami we aʼlá machí japi aní echi Biblia, nalí newalé japi bilé echi iʼwírima machiyá piri namuti ke riwé japi testigo Jeobá nima. A keʼré japi echi ko we nocha o echi téemala ke nakí japi Testigo nima. ¿Chúriká mi omeri isiá japi riká Jesús? Raʼichá echi binéami yúa. Japi riká, ami omeri bayea café bajimia o basalówisia simiyá. A keʼré japi echomí kilí nílima alí ke me jilí nirama raʼichia echi namuti jilírami jitra japi ikí. Echi riká mi omérima iʼwiria machiyá piri isísaré alí newalaria japi echi riká isísaré néwariwélitimia japi we galé Jeobá alí ke ko jiti mi kanílitinali.

6. ¿Chúriká mi iʼwírima bilé binéami jiti jiwérili olama isimia japi biné? (1 Corintios 16:13).

⁶ Jiti bilé binéami jiwérili olama isimia japi biné, we bichíwisaré japi Jeobá echi iʼwírima isiá japi echi nulá (leeri 1 Corintios 16:13, TNM). ¿Chúriká mi omeri iʼwiria? Natá japalí mi simiyé escuela. ¿Chu iyiri maestro yúa wabé mi kanilie binea? A keʼré echi yúa japi we kilí nili alí mi inílitie japi mi a omeri isiá bilé namuti. Iʼwérili isí echi riká cho niya. Kiti bi ruyé japi Onorúami nakí japi echi isima, nalí iʼwiri jiti machimea japi Jeobá echi iʼwírima isiá japi echi nakí. ¿Piri jarecho namuti mi omeri isiá iʼwírimia echi binéami?

IʼWIRI ECHI BINÉAMI AMINABI WE GALEA JEOBÁ

7. ¿Chúriká iʼwírili Jesús echi pagótami aminabi we galea Jeobá?

⁷ Jesús ko machiyé japi echi discípulos we galésaká Jeobá, ke me jilí nirama nokayá japi biné. Jiti la echi ko wisabé niraa binérili namuti japi echi iʼwírili aminabi we galea echi Onolá. Japi riká, Jesús anili japi Jeobá ju japi riká bilé onó japi iyá namuti aʼláala echi kúchuwala (Mat. 7:9-11). Jaré pagótami japi kipúe Jesús, ke oláliré bilé onó japi we simá isíami nili echi yúa. Natá chu iníliliré kipusa echi ejemplo japi bilé onolá we kanílika ku naré echi nolá japi riweli cha isiá. Echi riká echi ko inámili japi Jeobá we galé echi pagótami (Luc. 15:20-24).

8. ¿Chúriká mi omeri iʼwiria echi binéami aminabi we galea Jeobá?

⁸ Mujé ayénachó omeri iʼwiria echi binéami jiti aminabi we galema Jeobá. ¿Chúriká? Ruyé echi aʼláala namuti japi riká isíami ju Jeobá. Japalí timí binea mochisa, iʼwiri machiyá chúriká echi namuti japi binea atí, néwariwéliti japi Jeobá we galéami ju. Alí japalí mi ruyesa japi Jeobá nijili echi Nolá tamujé jitra, iʼwiri echi binéami aʼlá inamia japi Jeobá ke bi echi riká isili jiti we galé sinéami, nalí jiti we galé echi (Rom. 5:8; 1 Juan 4:10). Bilé binéami aʼlá inámisaká japi Jeobá we galé echi, a keʼré japi aminabi we galema Jeobá (Gál. 2:20, TNM).

9. ¿Piri iʼwírili Michael jiti nijéwima Jeobá?

⁹ Ma inepo japi ikili Michael, Indonesia bitéami. Taa ka jonsa echi ko machili echi bichíwali, nalí ke pakoli. Japalí ma 18 bamíbami nili, echi ko simili biléanachó país nochamia ulichia echi camiones. Miná ko ku roʼili echomí Indonesia, niwili alí olali bilé tiwé. Nalí a bijí nóchili biléanachó país, miká japoná muchuwi echi téemala. Miná ko, Michael upila alí echi ranala chotásili binea echi Biblia alí nijewia Jeobá. Japalí Michael iyela mukuli, echi ko ku roʼili echi bitélachi tibumia echi onolá alí chotásili binea echi Biblia. Ma binesa echi binelíwami 27 echi libro We mi kanílika bitélima, japoná aní “Aminabi natabo japi ta biné”, echi ko chotásili nalá jiti nátili japi Jeobá we risoa nílili inea we risoa níliachi echi Nolá. Japalí machili japi chu yena Jeobá galé echi, Michael chotásili nijewia Jeobá alí pakoli.

IʼWIRI ECHI BINÉAMI BACHÁ ISIÁ JAPI JEOBÁ NAKÍ

10. ¿Chúriká iʼwírili Jesús echi discípulos jiti we natéami niraa inema bachá nokayá japi Jeobá nakí? (Lucas 5:5-11; ayénachó iné echi dibujo).

¹⁰ Echi bachá discípulos sapú machili japi Jesús nili echi Mesías japi nawama riweili, nalí newaleli aʼlá inamia japi echi namuti japi bachá nokisáré ko ju nawesia echi raʼíchali aʼláala. Pedro alí Andrés ma jaré michá éenili Jesús yúa, japalí echi aneli japi riwema suwaba namuti alí simama echi yúa (Mat. 4:18, 19). Santiago alí Juan yúa, echi ko olali nóchali japoná wiká méami nili winomí (Mar. 1:16-20). Japalí Pedro alí Andrés riweli echi nóchali, a keʼré japi nokali jaré namuti jiti echi téemala olama suwaba japi newalema japalí echi ko ma simasa Jesús yúa. ¿Piri iʼwírili jiti we natéami niraa inema bachá nokayá japi Jeobá nakí? Jesús niwali bilé milagro japi echi iʼwírili bichiwia japi Jeobá iyama suwaba japi newalema (leeri Lucas 5:5-11, TNM).

11. ¿Piri ta omeri nokayá jiti echi binéami aminabi we bichíwima?

¹¹ Tamujé ko ke omeri niwayá milagros japi riká isili Jesús, nalí ati omeri ruyea echi binéami japi Jeobá sinibí iʼwiri echi japi bachá noká japi echi nakí. Japi riká, ¿achi mi newalá chúriká Jeobá mi iʼwírili japalí mi chotásili simiyá napawíliwachi? A keʼré japi mi raʼíchili echi patrón yúa alí mi aneli japi mi ke omérima wiká horas nochia jiti mi ikírima simiyá napawíliwachi. Ruyé echi binéami japi mujé ineli chúriká Jeobá mi iʼwírili japalí mi echi riká isili, alí jepuná isili japi mi aminabi we bichíwima.

12. a) ¿Chúsiá aʼlá ju japi mi bayema jarecho hermanos japalí mi bineri echi binéami? b) ¿Piri si mi omeri isiá iʼwírimia echi binéami bachá isiá japi Jeobá nakí? Ruyé bilé ejemplo.

¹² Kipúa japi riká nokali jarecho hermanos bachá nokayá japi Jeobá nakí, we iʼwírima echi binéami. Jiti la, bayé jarecho hermanos jiti mi yúa simea binérisia echi binéami alí ané japi ruyema chúriká machili echi bichíwali alí piri nokali jiti bachá nokimea japi Jeobá nakí. Ayénachó aʼlá nima japi mi inema echi binéami yúa echi videos japi uchuwi echoná secciones “Aminabi natabo japi ta biné” o “Jiti mi che binema” echoná libro We mi kanílika bitélima. Japi riká, japalí timí biné echi binelíwami 37, ami omeri ruyea echi busuréliami japi uchuwi echoná video Jeobá tamó iʼwírima jiti olabo japi ta newalé.

IʼWIRI ECHI BINÉAMI MACHIYÁ CHÚRIKÁ ISIMA JAPALÍ JARECHO SAYÉRISA

13. ¿Chúriká iʼwírili Jesús echi discípulos machiyá chúriká nokimea japalí jarecho sayérisa?

¹³ Wisabé niraa Jesús aneli echi discípulos japi jarecho sayérima riweili echi alí ayénachó a keʼré echi téemala (Mat. 5:11; 10:22, 36). Kecho mukuyá, ayénachó aneli echi discípulos japi risoa olárami nima riweili alí kowirúami (Mat. 24:9; Juan 15:20; 16:2). Alí jiti ke riwema nawesia, echi ko aneli japi ke naʼáwima echi pagótami yúa japi cha riká raʼicha echi jitra japi bichiwi alí japi tibuka nokimea echi namuti jitra japi aní alí noká.

14. ¿Chúriká ti omeri iʼwiria echi binéami jiti anachama japalí sayéritami nisa? (2 Timoteo 3:12).

¹⁴ Japi riká Jesús, tamujé ayénachó omeri iʼwiria echi binéami jiti anachama japalí sayéritami nisa. ¿Chúriká? Ruyeka piri namuti a keʼré japi nokimea o animea echi téemala, amigos o echi japi yúa nocha (leeri 2 Timoteo 3:12). Jaré japi echi yúa nocha, a keʼré japi kawélima echi jitra jiti nijewi japi aní echi Biblia. O echi téemala cha riká raʼichámiré echi jitra japi bichiwi. Jiti la aʼlá ju japi mi sapú anema echi binéami japi sayéritami nima. Echi riká, japalí echi iyiri namuti ikisaa, echi ko ma aʼlá machimea piri isima o piri animea.

15. Bilé echi binéami téemala sayérisaká echi, ¿chúriká ti iʼwíripo?

¹⁵ Bilé echi binéami téemala sayérisaká echi, iʼwérili iyá jiti natama chúsiá echi téemala iyó o sayeri echi. A keʼré japi echi nata japi echi Testigos echi eki o chati pagótami ju. Jesús echi riká cho ikili, jaré echi téemala nátili japi echi lowili (Mar. 3:21, TNM; Juan 7:5). Jiti la we natéami ju japi echi binéami we kilí nima alí aʼlá nátika raʼichama sinéami yúa, alí ayénachó echi téemala yúa.

16. ¿Chúriká ti omeri iʼwiria echi binéami jiti aʼlá ruyema japi bichiwi?

¹⁶ ¿Piri omeri isiá echi binéami bilé echi téemala aminabi machináliaká japi echi bichiwi? Wabé aʼlá ju japi kuabi namuti ruyema jiti echi riká ke wiká namuti nirama alí ma ke kipúnilima. Ané echi binéami japi teeli bi raʼichama alí néema raʼíchali japi ke jilírami ju. Echi riká echi téemala che siné kaachi aminabi raʼichánilima echi Biblia jitra (Col. 4:6). Echi binéami ayénachó omeri ruyea echi téemala echi página internet jw.org. Echi riká echi ko omérima bakiyá echoná página japalí echi nakí alí aaya japi machinali echi testigo Jeobá jitra.

17. ¿Chúriká mi iʼwírima echi binéami jiti ruyema jarecho japi machinali echi testigo Jeobá jitra? (Ayénachó iné echi foto).

¹⁷ Jiti mi binérima echi binéami chúriká ruyema japi machinali echi téemala o japi echi yúa nocha, ami omeri néea echi sección “Preguntas japi jaré machinali echi testigo Jeobá jitra” echoná jw.org (2 Tim. 2:24, 25). Newalá japi ma sunía ibili binelíwami echoná libro We mi kanílika bitélima, nirú bilé recuadro riwéami “Japi aní jaré pagótami”. Nari echi binéami chúriká ruyema japi bichiwi. Alí a newaléaká, ané piri namuti aminabi we aʼlá ruyésaré. Jepuná iʼwírima jiti ke majama ruyea jarecho japi echi bichiwi.

18. ¿Chúriká mi iʼwírima echi binéami jiti chotásima nawesia echi congregación yúa? (Mateo 10:27).

¹⁸ Jesús aneli echi discípulos japi nawisásaré echi raʼíchali aʼláala sinéami pagótami (leeri Mateo 10:27, TNM). Echi binéami sapú chotásisaká ruyea jarecho japi bichiwi, echi ko wabé sapú bichíwima Jeobá jiti inema chúriká Jeobá echi iʼwiri. ¿Chúriká mi iʼwírima echi binéami jiti chotásima nawesia echi congregación yúa? Japalí echi hermanos anisaa japi nirúlima campaña, echalí aʼlá ju japi mi anema echi binéami piri isísaré jiti omérima publicador niya. Ruyé japi campaña kaachi, ke me jilí ju chotasia nawesia. Bilecho namuti japi iʼwírima echi binéami ko ju, nijía asignaciones echoná napawíliwachi japi ju nasipa tarali. Echi riká binésima chúriká ke majaka raʼichama echi jitra japi bichiwi.

NÉWARIWÉLITI ECHI BINÉAMI JAPI MI BICHIWI JAPI ECHI KO AʼLÁ ISIMA

19. ¿Chúriká néwariwélitili Jesús japi bichíwili echi discípulos, alí chúriká nokiboa japi riká echi?

¹⁹ Kecho simiyá ripá rewegachi, Jesús aneli echi discípulos japi checho ku napawika mochima. Echalí echi discípulos ke aʼlá inámili piri ruyá anili Jesús. Nalí tákoré ke aʼlá inámili, Jesús we natéami niraa ineli japi echi discípulos we nijéwami nili (Juan 14:1-5, 8). Echi ko machiyé japi echi discípulos ke sinepi niraa inámima suwaba namuti, japi riká japi echi ko pirélima ripá rewegachi (Juan 16:12). Tamujé ayénachó néwariwélitipo echi binéami japi ta bichiwi echi alí japi ta machí japi echi ko kanílitinali Jeobá.

20. ¿Chúriká néwariwélitili María japi bichíwili japi echi binéami aʼlá isima?

²⁰ We natéami ju japi ta bichíwipo japi echi binéami a isínali japi aʼlá ju. Bilé hermana Malaui bitéami María riwéami,b chotásili bineria echi Biblia bilé tiwé Alinafe riwéami japi católica nili. Japalí binea mochili echi binelíwami 14 echi libro We mi kanílika bitélima, María nárili achi aʼlá ju japi néepo imágenes. Alinafe iyoli alí jéaneli: “¡Nijé binoy machí achi ni néema imágenes o ke!”. Echalí María ko nátili achi Alinafe ma riwema binea, nalí ke siweli alí aminabi binérili echi Biblia jitra nátika japi Alinafe inámima japi ke aʼlá ju néea imágenes. Ma jaré michá simírisa, María nárili echi náriwami japi chukú echoná binelíwami 34: “Japalí mi jonsa biné Jeobá jitra alí echi Biblia, ¿chúriká mi iʼwírili?”. María jéaní: “Alinafe anili wiká namuti we semati alí bilé ko nili japi echi testigo Jeobá ke noká japi echi Biblia aní japi chati ju”. Miná ko Alinafe riweli néea imágenes alí pakoli.

21. ¿Chúriká ti omeri iʼwiria bilé binéami jiti testigo Jeobá nima?

²¹ Tákoré ti machí japi Jeobá nalí isimí japi echi binéami mulíwima echi, tamujé ayénachó omeri iʼwiria echi binéami jiti nijéwima Jeobá (1 Cor. 3:7). Ke ti bi bineri jiti isima japi Jeobá nakí, nalí jiti galema ne sulachí jonsa. Ayénachó ti iʼwiri jiti néwariwélitima japi we galé Jeobá bachá isika japi echi nakí alí ti bineri jiti we bichíwima japi Jeobá iʼwírima japalí jarecho sayérisa. Japalí ti néwariwéliti echi binéami japi ta bichiwi echi, ata iʼwiri jiti echi ayénachó bichíwima japi a omérima we aʼlá testigo Jeobá niya.