BINELÍWAMI 41
CANCIÓN sjj-S 108 El amor leal de Jehová
Jeobá ko sinibí we galéami ju
“ Matétara iyasi Jeobá jiti echi ko we aʼláala ju; echi ko sinibí we galéami ju” (SAL. 136:1).
JAPI TA JITRA BINEPO
Japalí ti ikisaa namuti we jilírami, chúriká tamó iʼwérili iyama néwalayá japi Jeobá sinibí we galéami ju alí japi jepuná ko ju bilé namuti we natéami japi bineri echi Biblia.
1, 2. ¿Chu inili wiká hermanos japalí we jilírami namuti ikí?
NATÁ bilé barco jitra japi chukú echoná nasipa baʼwírili japalí we jiwérika ikayá wilí. Jiti we nokea maní echi baʼwí, echi barco ko anajumi noké alí a keʼré japi kilipi niraa we miká akibama. Nalí jiti ke echi riká ikimea, echi barco olá bilé namuti ancla riwéami, japi páliwa echoná rilé baʼwírili japi isimí japi echi barco ma ke we nokema.
2 Ami ikiyáaká namuti we jilírami, a keʼré japi mi inili japi riká echi barco japi we anajumi noké. Echi namuti jilírami japi mi ikí, a keʼré japi isimí japi mi sapú sinúrika ku inílima. Siné rawé mujé ko we bichiwi japi Jeobá we mi galé alí mi iʼwiri, nalí baʼalínala rawé mi nata japi Jeobá ke ritiwá echi namuti jilírami japi mi ikí (Sal. 10:1; 13:1). A keʼré japi bilé mujé amígowala mi ané bilé namuti japi mi iʼwérili iyá, alí echi ko mi ku kaníliti jaré rawé bi (Prov. 17:17; 25:11). Nalí miná ko mi checho ku nata japi Jeobá ke mi iʼwiri alí japi echi ko ke mi natéami niraa iné. Echi riká mi ikiyáaká, ¿chúriká mi isima japi riká ko “paa echi ancla” alí ke siné riwea bichiwia japi Jeobá we mi galé alí mi iʼwiri?
3. a) ¿Piri aniwáami ju echi raʼíchali “sinibí we galéami”? (Salmo 31:7; 136:1). b) ¿Chúsiá ti aní japi ke nirú bilecho japi wabé galéami ju japi riká Jeobá? (Ayénachó iné echi dibujo).
3 Japalí ti ikí namuti we jilírami, bilé namuti japi tamó iʼwírima ke riwea bichiwia japi Jeobá tamó galé, echi ko ju néwalayá japi Jeobá sinibí we galéami ju (leeri Salmo 31:7; 136:1). Echi raʼíchali “sinibí we galéami” aniwáami ju japalí bilé pagótami ne wabé galé bilecho pagótami alí ke siné riwé galea. Ke nirú bilecho japi wabé galéami ju alí japi ke siné riwé galea japi riká Jeobá. Echi Biblia aní japi Jeobá “sinibí we galéami” ju alí “sinibí we galé sinéami japi nijéwami ju” (Éx. 34:6, 7; Sal. 86:5). Natá japi aniwáami ju echi versículos: ¡Jeobá ko ke siné riwé japi nijéwami ju echi! Néwalayá jepuná mi iʼwírima anachia japalí mi ikisaa namuti we jilírami (Sal. 23:4).
Japi riká echi ancla isimí japi bilé barco ke miká akibama japalí we jiwérika ikayá wilí alí we nokea maní echi baʼwí, echi riká cho we bichiwia japi Jeobá tamó galé, tamó iʼwiri japalí ti ikí namuti we jilírami. (Iné echi párrafo 3).
NEWALABO JAPI ECHI BIBLIA BINERI JAPI JEOBÁ WE TAMÓ GALÉ
4. ¿Chu iyiri ju jaré namuti japi ta kulí bineki echoná Biblia, alí chúsiá ti ke riwé bichiwia echi jitra?
4 Bilecho namuti japi tamó iʼwírima ke riwea bichiwia japi Jeobá tamó galé, echi ko ju néwalayá japi echi Biblia echi riká bineri. Natá japalí mi kulí chotásili binea echi Biblia. Mujé ko bineli japi echi Onorúami riwalá ko ju Jeobá, japi Jesús ko echi Nolá ju, japi echi suwíami ke bilé iyiri machí, japi echi Wichimóbachi we baʼóami nima alí japi echi pagótami sinibí pirélima echoná (Sal. 83:18; Ecl. 9:5; Juan 3:16, TNM; Apoc. 21:3, 4, TNM). Japalí mi ma bichíwili echi namuti, ke bilé pagótami omérili isiá japi mi riwema bichiwia echi jitra. ¿Chúsiá? Jiti mi we aʼlá bineli japi a echi riká ju japi riká aní echi Biblia. Jiti la, mujé ayénachó omeri bichiwia japi Jeobá we mi galé alí we aʼlá machí japi mi ikí, jiti echi Biblia echi riká bineri. Jipi ko aminabi binepo echi jitra.
5. Ruyé chúriká bilé pagótami riwé bichiwia echi namuti japi ke bichíwali ju.
5 Japalí mi kulí chotásili binea echi Biblia, ¿piri mi iʼwírili jiti mi riwema bichiwia echi namuti japi ke bichíwali ju? A keʼré japi mi nátili piri bineri echi religión japi mi olali chabé alí piri bineri echi Biblia. Natabo jepuná: japi mi chabé bichiwie japi Jesús Onorúami ju. Japalí mi binésili, mujé ko nárika isili “¿Achi bichíwali ju jepuná?”. Miná ko mi bineli japi aní echi Biblia jepuná jitra alí mi machili japi ke bichíwali ju. Jiti la mi riweli bichiwia echi namuti alí mi bichíwili japi Jesús ju echi Onorúami Nolá japi bachá niwárami nili alí japi Jeobá binoy niwali (Col. 1:15; Juan 3:18). A bichíwali ju japi a nirú namuti japi ta we jiwérika bichiwi, jiti la we jilí ju riwea bichiwia echi (2 Cor. 10:4, 5). Nalí japalí ti ma biné japi aní echi Biblia, ata ma ke checho ku chotasi bichiwia japi ta bichíwili chabé (Filip. 3:13).
6. ¿Chúsiá echoná Salmo 136 wisabé niraa Jeobá aní japi echi ko “sinibí we galéami ju”?
6 Ami echi riká cho omeri isiá ami ikiyáaká bilé namuti jilírami alí mi chotásisaká natia japi Jeobá ke mi galé. Nárika isí: “¿Achi bichíwali ju jepuná?”. Miná ko natá japi bineri echi Biblia echoná Salmo 136:1, japi ju echi texto japoná machibúrami ju na binelíwami, japoná ruyé japi Jeobá we galéami ju. ¿Chúsiá Jeobá aní japi echi ko “sinibí” we galéami ju? ¿Alí chúsiá echoná Salmo 136 wisabé niraa echi riká aní? Japi riká ti ma bineli, echi Biblia bineri jaré namuti japi ta ke jilí nirali bichiwia japalí ti kulí chotásili binea, alí echi riká cho bineri japi Jeobá sinibí we galé echi puéblowala. ¡Ke bichíwali ju japi Jeobá ke mi galé! Jiti la sapú riwé echi riká natia, japi riká mi sapú riweli bichiwia echi namuti japi ke bichíwali ju.
7. ¿Chu iyiri ju jaré textos japi ruyé japi Jeobá we tamó galé?
7 Echi Biblia wisabé niraa ruyé japi Jeobá we tamó galé. Japi riká, Jesús ko jériká aneli binoy najátowala: “Emi ko wabé natéami ju wiká chuluwí yúa” (Mat. 10:31, TNM). Echi ko ke anili: “Emi ko a keʼré wabé natéami ju wiká chuluwí yúa”. Alí Jeobá echi riká aneli binoy puéblowala: “Nijé mi jiwérili iyámalí alí ni mi iʼwírimalí. Nijé watoná sikala jitra, chapiká mi iʼwírimalí jiti mi ke wichimea” (Is. 41:10). Echi ko ke anili: “A keʼré japi ni mi iʼwírima”. Japi riká ti iné, jepuná textos raʼicha namuti jitra japi a ne bichíwali ju. Jiti la, japalí mi ikí bilé namuti we jilírami ami chotásisaká natia japi Jeobá ke mi galé, jepuná textos mi iʼwírima aminabi inilia alí bichiwia japi Jeobá we mi galé. Ruyé Jeobá japi mi inili japalí mi ke me bichíwisa japi echi ko mi galé alí kilí niraa natá japi aní jepuná textos. Echi riká mi isísaká, ami omérima aniyá japi riká echi cristianos bachá siglo piréami: “Tamujé ko ma machili japi Onorúami we tamó galé alí ti bichiwi japi echi riká ju” (1 Juan 4:16, TNM).a
8. ¿Piri ta omeri nokayá ati bijí ke me aʼlá bichíwiaká japi Jeobá we tamó galé?
8 Nalí, ¿piri mi omeri isiá ami bijí ke me aʼlá bichíwiaká japi Jeobá we mi galé? Natá achi japi mi inili chopi riká ju japi riká mi ma bineli echoná Biblia. Tákoré mi inili japi Jeobá ke mi galé, mujé ko ma machí japi ke bichíwali ju, jiti echi Biblia bineri japi Jeobá ko we tamó galé. Ata ke bichíwilaká japi Jeobá tamó galé, a nima japi riká ko aniyá japi ke bichíwali ju japalí echi Biblia aní japi Jeobá “ne wabé galéami ju” (1 Juan 4:8).
NATABO JAPI “ONORÚAMI BINÓI” TAMÓ GALÉ
9, 10. ¿Piri jitra raʼichie Jesús japalí anili “Onorúami Binói ʼyemi mi wabé galé”? (Juan 16:26, 27; ayénachó iné echi imagen).
9 Bilecho namuti japi tamó iʼwírima we bichiwia japi Jeobá we tamó galé, echi ko ju binea japi Jesús aneli binoy najátowala: “Onorúami Binói ʼyemi mi wabé galé” (leeri Juan 16:26, 27). Jesús ke echi riká aneli jiti echi najátowala kanílima alí ke cho raʼichie echi jitra japi inilie echi discípulos, nalí raʼichie bilecho sinúrika namuti jitra: echi oración.
10 Jesús ne kulí sunili anea echi najátowala japi raʼichama Onorúami yúa néeka echi binoy riwalá, nalí japi ke echi yúa raʼichama (Juan 16:23, 24, TNM). We natéami nili japi echi ko machimea jepuná. ¿Chúsiá? Jiti echi ko we aʼlá Jesús amígowala nílili, alí japalí ma ku owínili Jesús a keʼré japi echi ko inílima riweili echi yúa raʼichánilia. A keʼré japi echi ko natama riweili japi riká Jesús we galeli aboi, echi nima japi kipuma japi echi tánima alí iʼwírili tánima echi Onolá echi discípulos jitra. Nalí Jesús ko aneli japi ke aʼlá ju echi riká natia. ¿Chúsiá? Jiti echi ko aneli: “Onorúami Binói ʼyemi mi wabé galé”. Jeobá ko we tamó galé, jiti la echi binoy tamó kipúnali japalí ti echi yúa raʼicha, alí jepuná ko ju bilé namuti we natéami japi bineri echi Biblia echi oración jitra. Natá japi aniwáami ju jepuná mujé jitra: japalí mi bineli echi Biblia, mujé ayénachó machili Jesús alí mi we galeli echi (Juan 14:21). Nalí japi riká echi Jesús najátowala bachá siglo piréami, ami omeri raʼichia Onorúami yúa we bichíwika japi echi ko mi kipú alí we mi galé. Sinibí japalí mi raʼicha Jeobá yúa, ami néwariwéliti japi mi we bichiwi japi “Onorúami Binói” we mi galé (1 Juan 5:14).
Ami omeri raʼichia Jeobá yúa we bichíwika japi echi ko mi kipú, jiti mi machí japi “Onorúami Binói” we mi galé. (Iné echi párrafos 9 alí 10).b
AʼLÁ MACHIBOA PIRI ISIMÍ JAPI TA KE ME BICHIWIA NÍLIPO
11. ¿Chúsiá kanili Satanás ati chotásisaká ke me bichiwia nilia japi Jeobá tamó galé?
11 ¿Piri isímiré japi ta ke me bichiwia nílipo japi Jeobá tamó galé? Ati natáboré japi Satanás ju, alí a bichíwali ju. Jiti echi Diablo “áa iyena mapu chigá miʼagá suwábama” ibili tamujé, alí nakí japi ta natabo japi Jeobá ke tamó galé (1 Ped. 5:8). Jeobá ko we tamó galeli, jiti la nijili binoy Nolá, alí Satanás ko nakí japi natabo japi ta ke iyárami nisa riweili echi chiliwéliami (Heb. 2:9). ¿Jépuká kanili japalí ti ke me bichiwia nílisa japi Jeobá ke tamó galé? Satanás. ¿Alí jépuká kanili japalí ti siwea nili alí ti riwé nóchilia Jeobá? Ayénachó Satanás. Echi ko nakí japi ta inílipo japi Jeobá ke tamó galé, alí jepuná ju bilé namuti japi echi ko wabé nee isimia japi wiká pagótami riwema nóchilia Jeobá. We be nalí, echi Satanás nalí ju japi ma ke galérami ju Jeobá jitra (Efes. 6:11). Machiyá echi namuti japi Satanás isimí jiti riwepo nóchilia Jeobá, tamó iʼwiri aminabi iʼwérili nokayá jiti ke nokiboa japi Satanás nakí (Sant. 4:7).
12, 13. ¿Chúsiá echi pecado isimí japi ta ke me bichiwia nílipo japi Jeobá tamó galé?
12 Nalí be, ke echi Satanás bi ju japi isimí japi ta ke me bichiwia nílipo japi Jeobá tamó galé. Ayénachó echi riká ti iníliré jiti ta nareli echi pecado Adán jitra (Sal. 51:5; Rom. 5:12). Echi pecado isili japi ta we jilí nirabo muliwia Jeobá. Ayénachó isili japi ta cha riká natabo, inílipo alí japi ta nayupo.
13 Echi pecado isimí japi ta inílipo namuti japi ke aʼlá ju, japi riká japi ta iyiri ka nílipo, we majaa nílipo natia wiká namuti, riwela nílipo alí japi ta ke me bichiwia nílipo. A keʼré japi ta echi riká inili japalí ti noká bilé namuti chati. Nalí ayénachó echi riká ti inili jiti ta sinibí nata japi ta ke sébali aʼlá nokáami ju alí japi tamujé ko ke ju japi riká Jeobá nakili japi ta nipo ne chokichí jonsa (Rom. 8:20, 21). Jiti ta ke sébali aʼlá nokáami ju, ati ju japi riká ko bilé carro sutula o llanta japi ma ikala machínali. Japi riká echi llanta ke omeri aʼlá maa, tamujé ayénachó ke omeri sébali aʼlá nokayá japi riká Jeobá nakili ne chokichí jonsa. Jiti la isini kaachi ke ti me bichiwia nili japi Jeobá tamó galé. Echi riká ti ikiyáaká, newalabo japi Jeobá ju “echi Onorúami japi ne walubéala ju [...] japi néwariwéliti japi sinibí galé echi japi binoy galé alí japi nijewi echi nulalíwami” (Neh. 1:5).
14. Natia japi Jeobá alí Jesús nokali tamujé jitra, ¿chúriká tamó iʼwiri aminabi bichiwia japi Jeobá we tamó galé? (Romanos 5:8; ayénachó iné echi recuadro “Aʼlá tibuka nokiboa jiti ke ékirami nipo echi pecado jitra”).
14 A keʼré japi isini kaachi ati inílipo japi ta ke galérami nísaré Jeobá jitra. Alí jepuná a bichíwali ju, jiti ta ke bilé namuti omeri nokayá jiti ta oméripo aniyá japi ta galérami nísaré Jeobá jitra. Nalí tákoré echi riká ju, Jeobá ko we tamó galé alí nijili binoy Nolá jiti oméripo wikáwirami niya echi jitra japi ta ke aʼlá noká (1 Juan 4:10). Ayénachó newalabo japi Jesús ko ke nawali niyúbimia echi pagótami sébali aʼlá nokáami, nalí echi japi ke sébali aʼlá nokáami ju (leeri Romanos 5:8). Jeobá ko ke buwé japi ta sébali aʼlá nokiboa, jiti machí japi ta ke omeri echi riká nokayá. Machiyá japi echi pecado omeri isiá japi ta ke me bichiwia nílipo japi Jeobá tamó galé, tamó iʼwiri jiti aminabi iʼwérili nokiboa ke echi riká natia (Rom. 7:24, 25).
IʼWÉRILI NOKIBOA KE SINÉ RIWEA JEOBÁ
15, 16. Ke ti siné riwésaká Jeobá, ¿piri ta omeri bichiwia, alí chúsiá? (2 Samuel 22:26).
15 Japalí ti ikí namuti we jilírami, Jeobá ko nakí japi ta aboi iʼwérili nokiboa “ke riwea echi” (Deut. 30:19, 20). Ata echi riká nokisáaká, ati omeri bichiwia japi Jeobá ayénachó ke siné tamó riwema tákoré chuwé namuti ikiyé (leeri 2 Samuel 22:26).
16 Japi riká ti ma bineli, japalí ti ikí namuti we jilírami wabé aʼlá ju japi ta nokiboa japi riká ko “paa echi ancla”: néwalayá japi Jeobá we tamó galé alí japi sinibí echoná asimea tamó iʼwírimia. Alí siné kaachi ati ke me bichiwia níliaká japi Jeobá tamó galé, newalabo japi ke chopi riká ju japi riká ti inili alí japi riká ti machí japi bichíwali ju. Sinibí we bichíwipo jepuná namuti we natéami japi bineri echi Biblia: japi Jeobá ko sinibí we galéami ju.
CANCIÓN sjj 159 ¡Ani walubéala anema Jeobá!
a Jarecho textos ko ju Deuteronomio 31:8, Salmo 94:14 alí Isaías 49:15.
b JAPI RUYÉ JAPI MACHINA ECHONÁ IMAGEN: Bilé hermano raʼicha Jeobá yúa jiti echi iʼwírima tibúa echi upila japi nayúa boʼí, aʼlá machiká néea echi winomí alí bineria binoy ranala jiti aminabi we galema Jeobá.