2023: ¿Ata aʼlá namuti buwésaré? | ¿Piri aní echi Biblia?

Jipi ma chotásili echi bamíali 2023 alí sinéami tamujé nakí japi ikimea namuti aʼláala. ¿Chúsiá ta buwésaré aʼláala namuti?

Echi Biblia ruyé japi ikimea namuti aʼláala

Echi Biblia we aʼláala namuti ruyé. A ruyé japi echi karú ikiwáami japi ikí nirú jipi, ke wilí rojorama alí ma mulipi suwibama. Ayénachó ruyé japi suwaba echi namuti japi oserúami nili echoná Biblia “suwaba echirigá osirúami níili mapurigá tamujeta echijiti binéritami níibo mapurigata waminabi galá bichíibo” (Romanos 15:4).

• Ami che machináliaká, leeri echi artículo “La esperanza real de un mañana mejor”.

Ata buwésaká japi ruyé echi Biblia, tamó iʼwírima jipi

Echi namuti aʼláala japi bineri echi Biblia “tamo iʼwírima jiti we aʼlá pirélipo” (Hebreos 6:19, TNM, nota). Buwea echi aʼláala namuti japi ruyé echi Biblia, tamó iʼwiri anachia echi karú ikiwáami japi nirú jipi, japi ke siweka pirélipo, nalí ne bichíwali kanílika pirélipo. Inepo jaré ejemplos:

• Iné chúriká japi ruyé echi Biblia iʼwírili bilé rijoi japi ke omérili riwea bajía. Iné echi video Ma ni ke kanili echi riká bitelia.

• Inesi chúriká japi ruyé echi Biblia tamó iʼwiri japalí mukusaa bilé japi ta we galé. Inesi echi video Ku kanílitima echi japi nalá jiti bilé mukuli.

Aminabi bichíwipo japi aní echi Biblia

Wiká pagótami nata japi ikimea aʼláala namuti, nalí echi ke aʼlá machí achi echi namuti echi riká ikimea. Nalí be, a bichíwisaré japi aní echi Biblia. ¿Chúsiá? Jiti suwaba echi aʼláala namuti japi ruyé echi Biblia Jeobá ju japi anili alí “echi Walubela Riosi tarapé ikaléami ju” (Tito 1:2).a Jeobá bi ju japi oméroma isiá suwaba echi namuti japi aní; echi bi ju japi a omero isiá suwaba echi namuti japi nakí (Salmo 135:5, 6).

Mujé a omero bichiwia japi aní echi Biblia. Mi ta bayé japi we aʼlá binema japi ruyé echi Biblia jiti aminabi bichíwima japi ruyé echoná (Hechos 17:11). ¿Ami kanílisa nili inea chúriká ti bineri echi Biblia ke natétika? ¡Chotasi echi bamíali 2023 we kanílika!