¿Achi olá echi testigo Jeobá aboi níwala Biblia?
Echi testigo Jeobá a néeli wiká traducciones jiti binema echi Biblia. Nalí be, we natéami niraa iné echi Traducción del Nuevo Mundo de las Santas Escrituras —japi traducíritami ju wiká raʼicháliami—, jiti nee echi Onorúami riwalá, we aʼlá aní alí ke jilí ju inámilia.
Nee echi Onorúami riwalá. Japi niwá copias echi Biblia jitra, ke siné aní japi Onorúami níwala ju echi oserúami. Japi riká a nirú bilé traducción japoná oserúa uchuwi 70 pagótami riwalá japi iʼwírili jiti buyama echi Biblia. Nalí be, ke siné osali Onorúami riwalá, Jeobá, japi isili japi oserúami nima echi Biblia.
Echoná Traducción del Nuevo Mundo oserúa chukú echi Onorúami riwalá japi riká echi oserúami japi bachá osali alí ke aní jépuká iʼwírili traduciria.
We aʼlá aní. A nirú wiká Biblias japi ke aʼlá aní japi riká echi oserúami japi bachá osali. Bilé ko aní echoná Mateo 7:13: “Moʼwisí echoʼná wabé uchíi yéachi, mapujiti ne wabé wiʼlé ju echoʼná auché biléana yéachi, ayénachó wabé wiʼlé ju echoʼná buwichí, echoʼná riʼlé riáblochi burúami, mapoʼná walú rajá, aʼlí biché ne wikabé ju mapu echoʼná moʼwiko”. Jaré traductores ko nátili japi echi pagótami chati ikósitami nima echoná infierno japoná sinibisi risoa oláliwa. Nalí be, echi oselí japi bachá osali bineri japi echi chati pagótami suwábitami nima. Jiti la, echi Traducción del Nuevo Mundo aní japi “mukuwáami too”, japi riká ne bachá oserúami nili.
Ke jilí ju inámilia. Tákoré we natéami ju japi echi Biblia we aʼlá animea, ayénachó ke jilí nísaré inámilia. Echoná Mateo 5:3, jaré Biblias aní: “Arigá ne wabé ganíliami ju siʼnéami pagótami mapu ikí we oʼmónami juko aboni sulálachi niráa”. Nalí be, echi pagótami ke aʼlá inamu jepuná raʼíchali. Jiti la, echi Traducción del Nuevo Mundo aní: “We kaníliami ju echi japi we aʼlá machí ko japi newalé Onorúami”.
Echi Traducción del Nuevo Mundo nee echi Onorúami riwalá, we aʼlá aní alí ke jilí ju inámilia. Ayénachó ke ralinéwami ju. Jiti la, wiká millones pagótami a omero leeria echi Biblia japi riká aboi raʼicha, tákoré ke niwe winomí japi riká ralimea bilé Biblia.