Japi wiká olá iʼwiri jarecho japi ke me olá

Echi testigo Jeobá raʼichi jarecho pagótami Jeobá jitra alí iʼwiri japi risoa nilia piré echomí 200 países alí japi sinucho riká raʼíchami ju. Nalí be, pe 35 países bi ju japi naré echi winomí japi newalé echi hermanos japi piré echoná. Alí biché, ¿piri ikí japoná ke me nirú echi winomí?

Echi hermanos Japi Aʼlá Niseri we aʼlá nata japi noká alí japi newalé echi testigo Jeobá omáana Wichimóbachi piréami. Jiti bela, echi winomí japi naré we aʼlá néeliwa. Japalí bilé sucursal wiká winomí naré, echi ko júuli jaréanami sucursales japoná newaléliwa. Echi riká noká japi riká nokali echi cristianos bachá siglo piréami. Echi cristianos néeli echi winomí iʼwiria jarecho cristianos japi ke me olali, jiti echi riká sinéami olama (2 Corintios 8:14).

¿Chu nili echi hermanos japalí naré echi winomí japi jarecho sucursales júula? Japi riká echomí Tanzania, echoná wiká pagótami piré nokí okuá dólares olaká bi alí echoná congregación Mafinga, néeli echi winomí japi echi sucursales júali jiti kariwema echi salón japoná biné echi testigo Jeobá. Echi hermanos ko anili: “Japalí jonsa kariweli echi salón, wiká pagótami nawá echoná napawíliwachi. Matétarabá Jeobá alí echi hermanos jiti timí we kanílika nijili echi winomí. Jipi ko ti ma olá bilé we baʼóami salón japoná ti biné Jeobá jitra”.

Jiti nirú echi nawilí COVID-19, jaré hermanos japi piré echomí Sri Lanka ke me olá koʼwáami. Japi riká echi hermana Imara Fernando alí echi ranala Enosh. Nalí be, matétarabá echi winomí jitra japi nijili jarecho hermanos, nareli echi namuti japi newaleli. Pe aminana echi ko osali: “Matétarabá echi hermanos jitra japi tamó iʼwírili japalí ta we risoa nili. We ti kanili jiti ta napawika nochi Jeobá. Ata sinibí tani Jeobá japi iʼwírima sinéami echi hermanos jiti ta ma piré kuwachimi rawé”.

Tákoré echi hermanos we miká piré o ke me winomíwami ju, sinéami we kanili nijía winomí alí echi riká iʼwiria jarecho hermanos. Japi riká Enosh, echi ko niwali bilé cajita japoná muchuwama echi winomí alí echi riká iʼwírima jarecho hermanos japi newalé. Guadalupe Álvarez ayénachó we kanílika nijí echi winomí iʼwiria jarecho. Echi ko bité echomí México japoná ke me nirú nóchali alí pe jaré pagótami bi a we aʼlá natétiliwa japoná nocha. Nalí be, Guadalupe ko iʼwérika isimí iʼwiria jarecho alí jéaní: “Matétarabá ni iyá Jeobá jiti tamí we galé alí jiti simá isimí nikuura. Ani machí japi echi winomí japi ni nijí iʼwírima jarecho hermanos japi we risoa nili”.

Japalí echi sucursales júuli winomí jaréanachó países, we kanili. Anthony Carvalho, japi nocha echoná Comité de Sucursal echomí Brasil, anili: “Ma wiká bamíali ju japi echi sucursales júula winomí tamó iʼwiria. Matétarabá jiti echi riká nokali, wiká pagótami binésimi Jeobá jitra. Jipi ko ma ta olá echi winomí japi ta newalé alí ti we kanílika iʼwiri jarecho jiti machimea Jeobá jitra. Echi hermanos we aʼlá machí japi omáana Wichimóbachi piréami echi hermanos napawika nocha alí omero iʼwiria jarecho japi riká Jesús nakí”.

¿Chúriká noká echi testigo Jeobá iʼwiria jarecho hermanos japi we risoa nilia piré? Nijí echi winomí japoná jéaní “Winomí jiti omáana piréami ruyérami nima echi raʼíchali kalabé” alí kiti nijí echi winomí echoná sucursales japi jaréana países ju. Ami omero nijía echi winomí echoná caja japi nirú echoná congregación japoná aní “Winomí jiti omáana piréami ruyérami nima echi raʼíchali kalabé” o echoná donate.jw.org. We natéami ju suwaba echi winomí japi timí nijí.