CHÚRIKÁ TA NEE ECHI WINOMÍ JAPI MI NIJÍ
Edificios japi niwárami nili kecho chotásiachi echi nayulí COVID-19
1 INÁRACHI NOVIEMBRE 2020
Sinibí bamíali wiká miles pagótami pakótami ju. Jiti bela ata newalé edificios jiti ta nóchilipo Jeobá. Echi departamentos locales de Diseño y Construcción omáana Wichimóbachi, niwánali alí ku atéwinali che wiká 2,700 edificios echi año de servicio 2020.a
Nalí, jiti nirú nayulí COVID-19, ke omérili niwayá echi edificios. Jiti tibuma echi hermanos alí jiti nijéwima echi gobiernos, echi Comité de Publicación japi nikuuri japi Aʼlá Niseri, anili japi ke ti cho omeri niwayá na edificios. Nalí be, echi año de servicio 2020, niwárami nili aminá 1,700 edificios alí ku atéwili kecho chotásiachi echi nawilí. Ayénachó 100 simírikami edificios niwárami nili japoná nirú sucursales. Inepo okuá ejemplos edificios jitra japi ma ayénili.
Sucursal de Camerún. Echi sucursal japi chabéi nóchali, echomí Duala, taa nili a newaleli japi ku atéwima. Echi Comité de Publicación atéwinali echi sucursal, nalí wiká winomí suwábima riweili ku atewia. Ayénachó echi hermanos nátili niwamia echi sucursal biléanachó o ralayá bilé edificio alí ku atewia. Nalí ke omérili nokayá japi riká nátali.
Alí biché, echi hermanos machili japi echi gobierno niwánali bilé carretera echomí Duala, mulipi japoná wilí Salón de Asambleas. Echi carretera japi kulí niwárami nima, iʼwírima jiti echi pagótami sapú simea japoná nirú sucursal alí ayénachó nirúlima riweili servicios públicos japi newalé echi sucursal. Jiti bela echi hermanos japi Aʼlá Niseri nakili japi niwárami nima kulíwami sucursal japoná wilili echi Salón de Asambleas.
Jaré hermanos nocha kulíwami sucursal niwayá echomí Camerún.
Echi hermanos ko natétili jarecho pagótami jiti iʼwírima nocha jaré namuti, jiti bela ke wiká winomí suwíali alí sapú ayénili. Okuá millón de dólares ju japi ripili japi ke suwíali. Japi nocha echoná Betel a omérili simíaya echoná kulíwami sucursal kecho chotásiachi echi COVID-19.
Echi kulíwami sucursal Camerún suniiru niwayá kecho chotásiachi echi nawilí COVID-19.
Echi japi nocha echoná Betel Camerún, jipi ko we kanílika nocha alí piré echoná alí echi ko aní japi echi kulíwami sucursal Jeobá chiliweli. Bilé niwíkami aní: “Jipi ko ta minabi we nochánali alí we ti natéami niraa iné jepuná sucursal”.
Hermanos nocha echoná kulíwami oficínachi japalí kecho chotásili echi nawilí.
Oficina Remota de Traducción al tojolabal (México). Ma wiká bamíali echi traductores tojolabal nóchali echomí sucursal de Centroamérica, mulipi echi Ciudad de México . Nalí, echi pagótami japi raʼicha tojolabal piré echomí municipios Altamirano alí Las Margaritas, ne nokí 1,000 kilómetros (620 millas) echi sucursal jonsa. Jiti bela, echi traductores ke kipuli jarecho raʼíchami japi riká aboi raʼicha. Alí echi hermanos japi nochánali traducción alí grabaciones ke oméroli jiti we miká pireili.
Hermanas alí hermanos si nakuuri niwayá echi Oficina Remota de Traducción.
Jiti bela, echi Comité de Redacción japi nakuuri japi Aʼlá Niseri nakili japi echi traductores simama japoná piré echi pagótami japi raʼicha tojolabal. Echi sucursal ralali alí ku atéwili bilé edificio. Echi riká ko ke me suwíali winomí.
Bilé traductor ko ruyé chu nili: “10 bamíali ni nóchili japi riká traductor echomí sucursal alí ni ke bilé riwali raʼíchami japi riká nijé. Jipi ko echi oficina wilí japoná echi pagótami raʼicha tojolabal. Sinibisi rawé nijé omero raʼicha echi pagótami yúa japi raʼicha japi riká nijé. Jipi ko ni we aʼlá raʼicha tojolabal alí tamí iʼwiri jiti ni we aʼlá nochama”.
Echoná oficina japoná raʼicháliwa tojolabal chabé jériká nili alí jipi ko jériká ju.
Edificios japi niwárami nima año de servicio 2021
Año de servicio 2021, ata omérisaká, ata nochánali niwayá 75 oficinas de traducción alí edificios jiti nirúlima Escuelas Bíblicas. Ayénachó niwama jaré sucursales, japi riká echomí Rámapo (Nueva York), alí echi sucursales echomí Argentina alí Italia kulíwami niwárami nima. Ayénachó newaléliwa simírikami 1,000 salones kulíwami japoná ta binepo. Nirú simírikami 6,000 salones japoná ta biné japi ma ke aʼlá ju jiti bela checho ku niwásaré. Alí 4,000 salones japoná ta biné japi ku atewárami nísaré.
¿Chúriká ti nateti suwaba jepuná nóchali? Echi hermano Lázaro González, japi nóchami ju Comité de Sucursal de Centroamérica, anili chúriká niwárami nili echi Oficina de Traducción al tojolabal, echi ko anili: “Echi Hermanos japi jenaʼí piré ke me olá echi winomí. Matétarabá sinéami echi hermanos omáana Wichimóbachi piréami jiti nijí echi winomí japi ta newaleli jiti nirúlima echi oficinas de traducción, ayénachó echi traductores ko a omeri pirea mulipi japoná echi pagótami raʼicha japi riká echi raʼicha. Ati matétara iyá sinéami echi hermanos japi kanílika nijili winomí”. Suwaba jepuná nóchali ata omérili niwayá matétarabá echi winomí japi timí nijili jiti omáana piréami ruyérami nima echi raʼíchali kalabé. Jaré echi winomí a júuliwa echoná página internet donate.jw.org.
a Echi departamentos locales de Diseño y Construcción bachá we aʼlá nátika noká chúriká niwama echi salones japi newaléliwa echoná sucursal japoná nocha. Echi Departamento Mundial de Diseño y Construcción echi ko aní chu yiri proyecto ju japi bachá nísaré japi niwabo omáana Wichimóbachi alí echi departamento wilí echomí central mundial.