¿Achi rojachi echi testigo Jeobá echi téemala o iʼwiri jiti kanila pirélima?

Tamujé testigo Jeobá ko, we ti iʼwérika noká iʼwiria tamujé téemala alí japi mulipi piré, jiti napawika pirélima. Ati we natéami niraa iné tamujé téemala jiti Onorúami echi riká nakí (Génesis 2:21-24; Efesios 3:14, 15). Echoná Bíbliachi tamó bineri japi iʼwíripo sinéami pagótami omáana wichimóbachi jiti kanílika pirélima echi niwíkami.

¿Piri noká echi testigo Jeobá jiti napawika kanilia pirélima echi téemala yúa?

Ata we iʼwérika noká nijewia japi aní echi Biblia, japi riká echi busuréliami japi iyá echi niwíkami alí kúchuwala (Proverbios 31:10-31; Efesios 5:22–6:4, TNM; 1 Timoteo 5:8). Ayénachó echi Biblia iʼwiri echi téemala tákoré jaré ke chopi iyiri bichiwi (1 Pedro 3:1, 2). Ma inepo japi aní jaré niwíkami japalí echi kunala, upila ma, testigo Jeobá nili:

• “Ne bachá usani bamíali ata sinibí rawé naʼawie. ¡We ti cha nilia pireili! Nalí, japalí Ivete ma testigo Jeobá nili, we simá isíami nili. Japi riká isili echi tamó iʼwírili jiti ta we kanílika pirélipo” (Clauir, echomí Brasil bitéami).

• “Japalí nijé kunala, Chansa rewéami, chotásili binea echi testigo Jeobá yúa, nijé ko ke nakiyé jiti nijé natie japi téemala rojachi. Nalí jipi ko ni aʼlá machí japi echi Biblia tamó iʼwírili jiti ta aʼlá pirélipo” (Agness, echomí Zambia bitéami).

Ayénachó, japalí ti bineri japi aní echi Biblia, ata iʼwiri echi pagótami machiyá japi chúriká echi Biblia iʼwiri echi téemala aʼlá pirea. Japi riká na namuti:

• Aʼlá natia jepi yúa niwima

• Anachia echi karú ikiwáami japi ikimea echi japi kulí niwí

• We aʼlá pirea kunala wénwala yúa, upila wénwala ma

• We aʼlá nátika néea echi winomí

• Ma ke naʼawia pirea

• Binea wikáwiami niya

• Raʼamia mujé kúchuwala

¿A naʼáwimiré japalí echi kunala, upila ma, ma testigo Jeobá nisa?

Ata machí japi isini echi riká ikimea. Bilé informe japi osali echi empresa de investigación Sofres bamíali 1998, aní japi jaré niwíkami karúa ikili japalí bilé ma testigo Jeobá nili.

Ma chabé kiʼyá, Jesús ko anili, japi isini kaachi echi najátowala téemala we naʼáwima echi yúa (Mateo 10:32-36). Echi rijoi machíami Will Durant ruyé, japalí echi romanos nulali, aniyé japi echi cristianos téemala rojachi.a Alí jipi ko echi pagótami ayénachó aní japi echi testigo Jeobá iyiri ju. Nalí be, ¿a ne bichíwali ju japi echi testigo Jeobá iyiri ju?

Japalí jaré pagótami aní japi testigo Jeobá ju japi rojachi echi téemala, echi Tribunal Europeo de Derechos humanos anili japi echi téemala japi ke testigo Jeobá ju, echi ju japi ke nakí japi echi téemala japi testigo Jeobá ju nokimea japi riká echi bichiwi. Echi Tribunal ayénachó anili: “Echi riká cho ikí echi pagótami japi echi téemala ke chopi iyiri bichiwi, japi riká echi testigo Jeobá”.b Tákoré tamujé téemala ko ke nakiyé, tamujé testigo Jeobá ko we iʼwérika noká nijewia japi riká aní na busuréliami: “Ketasi ku kuwana nimíkasi echi auché jaré mapu arigá ʼyemi mi risúu olá. [...] Ne suwaba galabé niráa olasi mapu ikítamo omero mapurigátamo echijiti ne galá kilí ologá pirélabo siʼnéami echi auché jaré pagótami yuwa” (Romanos 12:17, 18).

¿Chúsiá echi testigo Jeobá ko aní japi niwísaré echi testigo Jeobá bi yúa?

Echi testigo Jeobá ko nijewi echi busuré japi aní japi bi yúa niwísaré echi japi nijéwami ju Jeobá (1 Corintios 7:39). Echi busuré a ne bichíwali tamó iʼwiri. Japi riká aní echi revista Journal of Marriage and Family bamíali 2010, “echi niwíkami japi chopi iyiri bichíyami ju ko” we kanilia piré.c

Nalí be, echi testigo Jeobá ko ke bineri japi ku rojapo japalí bilé ke chopi iyiri bichíyami ju. Echi Biblia aní: “A bilé rijói bichíyami níwasagá kepu upí mapu ketasi cho bichíyami ju, aʼlí a echi mukí arigá waminabi nakisáagá echi rijói bichíyami yuwa kuneka niráa bitélanala, echalí ketasi risénsia ju mapu echi rijói bichíyami waminá ariwema binói upila. [...] Aʼlí a bilé mukí bichíyami níwasagá kepu kuná mapu ketasi cho bichíyami ju, aʼlí a echi rijói arigá waminabi nakisáagá echi mukí yuwa upeka niráa bitélanala, echalí ketasi risénsia ju mapu echi mukí miná ariwema binói kunala” (1 Corintios 7:12, 13). Tamujé ayénachó nijewi jepuná nulalíwami.