“Jipi ko ni a machí chúriká iʼwírima jarecho”

JAPI RIKÁ NI NILI CHABÉ:

Taa ka jonsa, we ni baʼori suwaba japi ikí nirú. Sinibí ni simiyé basalówasi nijé téemala yúa japoná we semáré alí japoná wiká nirú okó jenaʼí ciudad Jyväskylä, japi ju jenaʼí centro Finlandia. Ayénachó ne baʼori echi namuti jákami. ¡Japalí ni taa towí ke, ani we kanílisa nili mutúa echi kochí alí musa! Japalí ni ochériki, ani we risoa inili inea japi we risoa oliwá echi namuti jákami, jiti la ni a yúa napawiki ko echi pagótami japi tibú echi namuti jákami. Echoná ni machiki jarecho pagótami japi echi riká cho nata.

Ata niwayé campaña jiti ta tibupo echi namuti jákami alí ti sinéami ka napawisa simía nijisia jaré oselí alí iʼwérili anesia echi pagótami japi ke risoa olama echi namuti jákami. Miná ko ati niwaki bilé organización japi tibú echi namuti jákami. Jiti ta echi riká nokayé, ati we risoa olalie echi wéala jáwami jitra. Wisabé ni niraa értami nili.

Ayénachó ani we natie jarecho namuti jitra, jiti la ni si napawiki pagótami yúa japi nocha echoná Amnistía Internacional alí Greenpeace. Ani we si nakúuriki echoná. Ayénachó ni iʼwíriki japi ke me kaníliami ju, echi risóati alí japi we loché.

Nalí be, pe aminana ko ni machiki japi ni ke omérima iʼwiria sinéami. Tákoré ti isini kaachi ati niyurie, nalí aminabi ti we olayé karúa ikiwáami. Ani nili japi ke bilé natéami niraa ineni ku akarewia echi chati namuti japi ikí. Jiti la ni ke tasi kaníliami ke.

CHÚRIKÁ TAMÍ IʼWÍRILI JAPI ANÍ ECHI BIBLIA:

Ke ni kanilie natia echi namuti japi ikí, jiti la ni chotásiki natia echi Onorúami jitra alí japi aní echi Biblia. Tákoré ni chabéi ma bineli echi testigo Jeobá yúa alí ni we kanilie jiti we simárika noká, echalí ko ni ke nijéwinali japi ni biné. Nalí jipi ko ma ni ke echi riká nata.

Ani aaki echi Biblia alí ni chotásiki leeria. Japalí ni echi riká isiki we ni kaníliki. Wiká ni textos leériki japoná ruyé chúriká aʼlá tibupo echi namuti jákami. Japi riká, Proverbios 12:10 aní: “Japi aʼláala ju ko, tibú binoy bukula namuti jákami”. Ayénachó ni machiki japi Onorúami ko ke isimí japi nirúlima risoa níliwami jenaʼí. Nalí aminabi we cha riweli isimí jiti echi pagótami ke noká japi Onorúami aní. Ani we kaníliki japalí ni machí japi Onorúami ko kilí niraa isíami ju alí japi we tamujé galé (Salmo 103:8-14).

Echalí ko ani riwaki bilé cupón echi libro jitra ¿Qué enseña realmente la Biblia? alí ni júuliki corréochi. Aminá ko nawaki bilé niwíkami japi testigo Jeobá ju alí tamí aneki achi ni binénala echi Biblia. Nijé ko aneki japi a. Ayénachó ni simiki echoná napawíliwachi japi niwá echi testigo Jeobá. Kilipi niraa nijé ko aminabi bichiwie japi aní echi Biblia.

Jiti ni bineki echi Biblia, ani riweki isiá wiká namuti japi riká pewa alí bajía. Ayénachó ni bineki aʼlá napacha alí ke cha riká raʼicha, alí aʼlárika inenia echi wéala jáwami (Romanos 13:1). Jipi ko ni ma ke che isimí chati namuti japi riká ni isíami ke chabé.

Nalí japi ni we jilí nirali ko ju inea echi organizaciones japi riká iné Jeobá. Ke tasi ni sapú riweki. Ne kulí ko ani nátiki japi ke aʼlá ju japi ni riwema echi. Nalí be, ani machiki japi echi Onorúami Gobiérnowala bi ju japi omérima iʼwiria echi pagótami, jiti la ni si nakúuriki ruyea echi pagótami jiti machimea echi gobierno jitra (Mateo 6:33, TNM).

PIRI NI NAMUTI KALABÉ NARELI:

Japalí ni iʼwérili isí iʼwiria echi pagótami, ani rojachi japi aʼláala ju alí japi chati ju, alí ni sapú risoa olánali echi japi cha noká. Jiti ni bineli echi Biblia, ma ni ke echi riká isimí. Jipi ko ni iʼwérili isí galea sinéami pagótami (Mateo 5:44). Ani néwariwéliti japi ni galé echi pagótami japalí ni nawesa echi Onorúami Gobiérnowala jitra. Ani we kanili machiyá japi ta nawesa iʼwiri echi pagótami jiti kilí kanílika pirélima jipi alí pe aminana.

Jiti ni ma ke che isimí chati namuti japi ni isié chabé, jipi ko ni kanílika bité. Nalí ani we aʼlá machí japi Jeobá isima japi echi pagótami ma ke cha olama echi kawí alí japi echi namuti jákami alí echi pagótami ma ke risoa nílima. Binoy gobiérnowala jitra, echi ko isima japi jepuná kawí checho aʼlá nima (Isaías 11:1-9). We ni kanili ke bi jiti ni machí echi bichíwali, nalí jiti ni a omeri iʼwiria jarecho jiti ayénachó bichíwima japi aní echi Biblia. Jipi ko ni a machí chúriká iʼwírima jarecho.