Kiti ta binéripa “echi Galabé Riosi Raʼíchala” echi pagótami omáana Wichimóbachi piréami japi iseni raʼíchali raʼíchami ju, ata osá oselí 750 simírikami (Apocalipsis 14:6). ¿Chúriká ta né echiki nóchali nocha? A nirú osáami japi omáana Wichimóbachi piréami ju, ayenacho niru echi japi osá echi oselí suwinárika raʼicháliami echi ko we nochi osoyá, sinéami testigo Jeobá ju.

Echi bachá oserúami ko ju inglés. Echi Japi Aʼlá Niseri iné echi nóchali japi osá echi rejimá, echi ko Estados Unidos piréami ju. Jepuná rejimá iʼwiri jarecho osáami japi echoná nocha alí ayénachó japi ikí nirú sucursal. Sinéami japi nocha, wikaná países piréami ju, kiti bela osiwá echi oselí japi machinali echi pagótami japi omáana pueblos piréami ju.

Echi oserúami iʼaliwa echi osáami kiti osimea japi riká raʼicha aboi. Japalí ma sunisa osayá echi oselí inglés alí ma aʼlá niisa, echoná computadora jona juliwa echi oserúami kiti echi osáami omáana Wichimóbachi piréami osimea echi oselí suwinárika niraa raʼicháliami, ma sunisa ka osayá leeri acha aʼlá aniyá japi riká raʼicha. Echi ko osisáré “echi raʼíchali né bichíwali” alí né echi riká osisáré japi riká aní echi inglés (Eclesiastés 12:10).

Echi computadora nikuuro sapú nocha. Echi computadora ko ke isimí japi riká isimí bilé osáami, kecho osá echi suwinárika raʼicháliami. Echi osáami ko née echi computadora alí diccionario echi riká nokaká we sapú nocha. Echi testigo Jeobá niwali echi Sistema Electrónico de Edición Plurilingüe (MEPS, japi riká osiwá inglés), jepuná ko isimí kiti osimea echi computadóra suwinárika raʼicháliami alí echi MEPS isimí napabúa japi ma oserúami ju alí uchucha echi iyóktami, ma sunísa ka echi oselí buyanáliwa.

Ata wiká oselí osá suwinárika raʼicháliami chíkoré pe okuáabi miles pagótami raʼichi echi raʼicháliami japi osiwá. ¿Chúsiá ta né echiki nóchali nocha? Kiti Jeobá nakí japi echi pagótami omáana piréami niyúbitami nima alí “ayénachó mapu ne siʼnéami galá machimea echi ne Bichíwali” (1 Timoteo 2:3, 4).

• ¿Chúriká osiwá echi oselí?

• ¿Chúsiá ta osá echi oselí suwinárika niraa raʼicháliami?

Echi testigo Jeobá buyacha milloni biblias bamíali niraa alí jarecho si oselí alí iyá echi pagótami ke bujeka; echi testigo Jeobá aboni niwá echi kalí japoná binema alí aʼlá atewi echi kalí, ayénachó niwá sucursales; a kuʼíriwa wiká betelitas alí echi japi julárami ju nawisánilia jarecho país, alí a kuʼíriwa echi pagótami japalí waʼlú ukusaa alí japalí nokosá echi Kawí wiká kalí najuchi alí jarecho si namuti. ¿Jépuká nijí echi winomí kiti natétima jepuná?

Ke ta bujé, kecho ta tani winomí. Tákoré wiká winomí suwibi japalí ta simia nawisasia echi raʼíchali kalabé, tamujé ko tasi ta tani winomí echi pagótami. Ma simírili 100 bamíali japalí oserúami nili echi okúa oselí La Atalaya japoná anili japi Jeobá nikúuri. Ayénachó jéanili: “Tasi ta sine kórima taa énipa winomi kecho japi ta kuírili tanipa echi pagótami”. Tasi ta siné echi riká noká (Mateo 10:8).

Echi winomí japi echi pagótami kanílika nijí, echi kitra natétiwa. Wiká pagótami kanili binériwa japi aní echi Biblia, kiti bela nijí echi winomí japi iki nijínali. Japi ta testigo Jeobá ju, ayénachó ata nijí winomí japi ta iki nijínali, ata ikíriami ju alí ta jiwérika noká nochilia kiti ikimea japi Onorúami nakí omáana Wichimóbachi (1 Crónicas 29:9). Japoná biné echi Testigo Jeobá ayénachó japalí bilé, bikiá rawé ma, napawíliwa ayénachó nirú jaré cajas, sinéami echi pagótami japi nijínali ko echoná aʼwá winomí. Ayénachó nijiwa winomí bakiká echoná página de Internet, jw.org. Né nokí sinéami japi nijí echi winomí, nijíala ju echi pagótami japi ke me winomíwami ju, echi pagótami ko ju japi riká echi muki kunámami ke winomíwami japi Jesús aneli japi we aʼlá isili kiti okuá moneda aʼwáli echoná cájachi echoná Jeobá kalila (Lucas 21:1-4). Waná napabuka muchuwa echi winomí japi mi aʼwáma echoná cájachi, “mapu ikítamo ne sulachí niráa galá nakí ʼyánala” (1 Corintios 16:2; 2 Corintios 9:7).

Ata machí japi Jeobá bi isísima kiti echi pagótami nijísima japi olá, kiti echi riká nokísipa bi binérisia echi Onorúami Gobiérnowala kiti isima japi echi nulá (Proverbios 3:9).

• ¿Piri namuti ta ke noká?

• ¿Chúriká suwábiwa echi winomí japi nijíliwa?

Japalí ta simía Japoná biné echi Testigo Jeobá, echoná ta biné japi aní echi Biblia echi Onorúami Gobiérnowala kitra, Jesús ko we raʼíchali echi kitra (Lucas 8:1).

Echoná ju japoná binewa echi bichíwali Jeobá kitra. Echoná aniwá kumi nawisaba echi raʼíchali kalabé (Mateo 24:14). Jaré kalí japoná ta napawí weli ju alí jaré kuuchi, echoná tasi me wiká namuti nirú; ayénachó echoná, bilé congregación napawí, wiká ma. Chabéi bamíali jona niwásiwa wiká mili kalí japoná ta napawí (rawé niraa niwáliwa malí kalí) kiti wiká muwésimi echi pagótami japi testigo Jeobá nilisimi. ¿Chúriká ta noká? (Mateo 19:26.)

Echi winomí japi ta nijí echi kitra niwaliwa echi kalí japoná ta biné. Echi winomí japi napabúliwa julawa jimi sucursal, echi ko tanewi winomí echi congregaciones kiti niwama bilé kalí japoná binema, kiti atéwima ma echi kalí japi ma niwali.

Echi testigo Jeobá niwá echi kalí tasi nipaká nocha. Omáana países nirú jaré Japi Napawika nocha niwayá echi Kalí japoná biné echi Testigo Jeobá. Jepuná testigo simía wikaná ayé congregaciones echoná país bi piréami ju, a riká simia tákoré we miká simibi, kiti kuʼírima echi testigo japi echoná piréami ju kiti niwama echi kalí japoná binema. Jaréanacho país nirú rejimá japi a omeri ruyea ané chúriká nochama alí iné acha aʼlá niwayá. Ayénachó nirú jarecho rejimá japi nakúuri, aboni pirélachi ju país japoná niwaliwa echi kalí, echi ko we aʼlá machí nocha alí ke nipaká. We be nalí, nokí sinéami japi nocha niwayá echi kalí, nakúuri nocha japi echoná si napawima. Suwaba japi ta iká noká Jeobá jiwérala isimí kiti ta echi riká nochaba ayénachó kiti we aʼlá nóchami kampa (Salmo 127:1; Colosenses 3:23).

• ¿Chúriká niwaliwa echi kalí Japoná biné echi Testigo Jeobá omáana Wichimóbachi?