Suwaba japi ikí nirú echi kalí Japoná biné echi Testigo Jeobá, echi Onorúami rewalá too, kiti bela we aʼlá pichita wilisáré, ayénachó japi nosowíkami ju ku atéwisaré. Echi ko ju bilé nóchali we natéami, japi we kalé Jeobá, alí sinéami ka ta nakúurisaré.

We kanílika nakúurisi pichía japalí ma sunisa binea echoná napawíliwachi. Ma sunisa binea echoná napawíliwachi, echi rejimá pichika wilá japoná napawí; isini kaachi napawí pe pichisia bi suníami. Bilé ochérami, nakúurami rejoy ma, echi ju nuláami alí olá bilé oselí japoná osá piri nochama: pasoa piso alí baño, pichía, biʼwayá ventana, silla aʼlá nawisúlika uchucha, basura napabúa alí jarecho si namuti. Ayénachó aʼlá ju japi echi kuuchi nakúurima, kiti machimea tibúa echi kalí japoná biné (Eclesiastés 5:1).

Nakúuripa atewia echi kalí. Sinibí bamíali niraa inewa echi kalí japoná ta napawí kiti machiboa piri atéwisáriká kiti suwaba namuti aʼlá atéwita wilimea, kiti ke suwibama winomí (2 Crónicas 24:13; 34:10). Echi kalí japoná napawí echi testigo Jeobá aʼlá pichita wilisáré, alí ke nirúlisaré namuti nosowíkami kiti echoná kalírili binériwa Onorúami kitra. Ata we kanílika nochásaká, a newaré japi we natéami ju echi kalí japoná ta napawí alí japi ta we nakí Jeobá (Salmo 122:1). Echi pagótami ayénachó machimea japi ta we aʼlá biʼwíami ju (2 Corintios 6:3).

• ¿Chúsiá sinibí aʼlá simárika wilisáré echi kalí japoná ta napawí?

• ¿Piri nokiwá kiti sinibí aʼlá biʼwíami wilimea echi kalí japoná ta napawí?

¿Ami kanílisa nili che binea echi Biblia? ¿Ami che machinali bilé texto? ¿Ami kanílisa nili che machiyá bilé rejoy japi raʼicha echi Biblia, echi pueblo ma, japi ikili japi aní echi Biblia? ¿Ama mi nárika isiiré acha né bichíwali mi kuʼíria echi Biblia? Ami anisáaká japi a, bakí echoná biblioteca japi wilí japoná ta biné.

Echona biblioteca a nirú japi mi kuʼírima kiti mi aʼlá binema. Ke ma suwaba mi olayéeré echi oselí japi niwali echi testigo Jeobá japi oserúami ju japi riká mi raʼicha; we be nalí, né nokí suwaba echi oselí japi kulíwami ju echoná bibliotécachi nirú japoná ta biné. A nirúiré ma Biblias, sinucho traducciones, bilé diccionario alí jarecho oselí. Ami néesaré echi oselí ma sunisa binea echoná napawíliwachi kecho chotásiwachi ma binea. A nirúaká bilé computadora, a chukúami ju Watchtower Library, echoná mi leerima echi oselí, echoná mi aama japi mi machinali japi riká bilé texto, chu aniwáami ju bilé raʼíchali, bilé binelíwami ma.

We natéami ju japi simama echi binéami japi simari echoná Reunión Vida y Ministerio, bakí echoná bibliotécachi. Ami olayaka bilé nawésali japi mi nijima echoná napawíliwachi bakí echoná bibliotécachi alí biné. Japi simeri jepuná napawíliami echi ju japi tibú echi biblioteca alí japi nawisúlika muchuwi echi oselí kulíwami japi kulí sili. ¿Acha mi machi chúriká mi aama japi mi machinali echoná biblioteca? Ami anésaré japi tibú echi biblioteca mi ruyérale chúriká mi nema, ayénachó ané japi mi bineri. Ami machisáré japi mi ke ku tósaré echi oselí, tasi cho mi rayárisaré, we aʼlá tibú.

Echi Biblia ko aní ata binénalaká “echi binói Onorúami machíala”, ata áasaré japi riká ta aa bilé “namuti we natéami japi chiná atí” (Proverbios 2:1-5). Aʼlá ju japi ta aapa echoná bibliotécachi japi wilí japoná ta biné.

• ¿Piri nirú echoná biblioteca kiti mi aʼlá binema?

• ¿Jépuká mi kuʼírima kiti mi machimea chúriká mi néesaré echi biblioteca?

Jesucristo ko jéanéli echi najátowala: “ʼYemi ayénachó echirigá mapurigá rajáami niráa níisi, echoʼná bacháami echi auché jaré pagótami yuwa. Ne galabé ologá pirélasi echi auché jaré pagótami yuwa, mapurigá aboni galá riwimea mapurigá ʼyémitamo sinibí galabé ologá piré, mapurigá aboni echijiti waminabi walubéraga anema echi ʼyemi Onolá mapu echoʼná ripá riwigachi atí” (Mateo 5:16). Kiti bela ata nee echi kulíwami tecnología japi riká echi Internet. Echi página japi niwali echi testigo Jeobá echi ko ju jw.org/tar echoná mi machimea piri nokáami ju alí piri bichiwi. ¿Piri mi riwiméalé?

Japi nárika noká echi pagótami echi Biblia ruyé. Echoná mi binema japi aní echi Biblia japi nárika noká wiká pagótami. Japi riká echi oselí ¿A ta ma ke che risoa nilia pirélipiré? ¿A checho ku pirélimiré japi ma suwili? Oserúami ju 600 isena raʼíchami. Ayénachó mi riwimea echi Traducción del Nuevo Mundo japi oserúami ju 130 isena raʼíchami; jaré oselí japi binelíwami ju echi Biblia néeka, japi riká ¿Qué enseña realmente la Biblia?, alí La Atalaya alí ¡Despertad! japi kulí buyanárami ju. Wiká jepuná oselí ami leerima alí kipúa ma echoná Internet, descargari ma echi formato japi wiká a machí, japi riká MP3, ayénachó PDF alí EPUB. Ami nakiyáaká ami buyanásaré echi oselí japi mi riká raʼíchami ju kiti mi riwírima echi japi machinali Onorúami Gobiérnowala. A nirú videos suwinárika niraa raʼicháliami lenguaje de señas, ayénachó nirú echi raʼíchali japi aní echi Biblia, dramas japi Bíbliachi buyanárami ju alí we sima aní simea kiti mi kipúma ayénachó descargáriwami ju.

Bichíwali japi aní echi testigo Jeobá. Echoná página Internet ami leérima namuti japi ta kulí nokali, ayénachó nirú videos japi aní chúriká ta nóchiliami ju Onorúami, ayénachó mi leérima japi ikí echi testigo Jeobá omáana piréami alí japi chúriká ta kuʼíri echi pagótami. Ayénachó aniwá chu kabú nima echi napawíliwami japi bikiá rawé ju alí aní chúriká raʼichabo sucursal piréami yúa.

Jepuná página Internet kitra wiká pagótami omáana piréami ma machimea né bichíwali japi aní echi Biblia, kiti echi bichíwali japi riká rajáami ju sinéami binema tákoré we miká piréami ke japi riká Antártida. Ata amachiki Onorúami “mapurigá ke ʼme ayó tamujeta galá omérabo nawésiya Riosi Raʼíchala ne suníami”, kiti walubéala anérami nima Jeobá (2 Tesalonicenses 3:1).

• ¿Chúriká mi nikúura isimí echi página jw.org/tar kiti che wiká pagótami machimea japi aní echi Biblia?

• ¿Piri mi áanali echoná página Internet japi ta olá?