Sinibí binéripo echi pagótami: Aʼlá biné osoyá cartas

CHÚSIÁ WE NATÉAMI JU. Pablo ko 14 cartas osali, bilé ko nili 1 Corintios, Pablo ko osoká júali japi ikí congregación niruili, jiti iʼwérili iyama echi hermanos. Japi carta osáami ju ko we aʼlá machiká osá, ma osoyá machimea jepi júlima echi carta; echi japi naré echi carta sinibí leérinilima japi simá aníami osali echoná. We aʼlá binepo osoya cartas jiti siné kaachi carta osoká binéripo Biblia jarecho pagótami echi leérisa binema Biblia, ami júlima echi carta mujé téemala, ayénachó mujé amígowala alí echi pagótami japi piré japoná ke nakiwá japi simáripa binésia echoná piréami. Echi riká nokiboa, jiti jaréana ke nakíliwa japi pe chuwé bilé bakimea echoná bitichí. ¿Chumi riká osomea carta?

CHÚRIKÁ MI ISIMA:

• 

  Japalí mi ososa echi carta, osá japi riká ko mi raʼicha wiliyá echi yúa. Ruyé chumi riwewi alí chúsiá mi oselí echi carta jiti leérima. Bilé namuti nari japi echi machinali, ayénachó ané japi a machimea a bakisaa echoná página Internet. Ruyé japi binoy omérima binea echi Biblia bakiká echoná página Internet (jepuná ko ke cho nirú tarahumara niraa); japi ta bineri echi pagótami echomí bitichí nawaká ke bujeka, ruyé chu iyiri folleto iyá bineria echi pagótami. Echi carta japi mi osali japi mi julámaré, ayénachó achiili bilé tarjeta de contacto, bilé invitación ma o tratado.

• Pe okuabi letras osá. Jiti echi japi nareli echi carta kanílika leérima suwaba japi mi osali (iné japoná aní Carta ma oserúami).

• Nijí echi cartas we aʼlá osorúami, jiti kanilia leérima we simá aníraalé japi mi osali. Nateti japalí mi julá echi cartas.