¿Chúriká nakí Onorúami japi mi bitélima?
JAPALÍ mi leeri echi periódico, japalí mi iné noticias echoná televisionchi, o rádiochi ma, mujé ko nami japi we chati nokiwá japi riká nakówami, echi pagótami chibi nokáami. Ami risoa nilia bitéere binoy, japalí mi nayusa o muje téemala mukusaa ma.
Ama mi machináliré:
¿Echi riká nakili Onorúami japi ni bitélima?
¿Jépuká tamí iʼwírima jiti ni ke risoa nilima?
¿Ama ke che risoa nilia pirélipiré siné rikaachi?
Echi Biblia mi ruyema japi mi nárika isili.
ECHI BIBLIA KO BINERI JAPI ONORÚAMI WE SIMÁRIKA NIWAMA JENAʼÍ WICHIMÓBACHI
Echi pagótami ma ke suwimea, ke okoma, ma ke che ochérami nima (Apocalipsis [Revelación] 21:4).
“Japi ke omeri iyena ku inama japi riká isimí bilé chumalí” (Isaías 35:6).
“Echi busukachi ku machílima inea” (Isaías 35:5).
Japi ma suwili ku pirélima (Juan 5:28, 29, TNM).
Ke bilé wesi pagótami nayuma (Isaías 33:24).
Nirúlima wabé koʼwáami jenaʼí Wichimóbachi (Salmo 72:16).
JAPI ANÍ ECHI BIBLIA WE MI AʼLÁ IʼWÍRIMA
Japi mi leérili echoná páginas 4 alí 5, kiti natá japi ke bichíwali ju japi aní echoná. Onorúami ko echi riká isima ma mulipi, echi Biblia ruyé japi chúriká isima echi Onorúami.
Japi aní echi Biblia we natéami ju. Echoná ruyé chuti riká we kaníliami nipo tamujé téemala yúa jipi rawé. Mujé binoy we risoa nilia bitéeré japalí mi ke olasa winomí, we timí naʼáwika pirélisa echoná bitichí, nayúa mi bitélisa, o japalí mukusaa mujé téemala. Echi Biblia aní japi mi chu isima échinília bitélisa, alí mi we kanílima machisaa japi aní echi Biblia japi riká:
¿Chúsiá ta risoa nilia piré?
¿Jépuká tamí iʼwírima japalí ni risoa nilia bitélisa?
¿Chúriká echi niwíkami alí kúchuwala kanílika pirélima?
¿Piri ikí echi suwíami?
¿A che ku pirélimiré tamujé téemala japi ma suwili?
¿Chúriká ta machí japi Onorúami we baʼóami niwama na kawí?
Mujé ko ami machinali japi aní echi Biblia, jiti bela mi leeria ko na libro. Na libro mi iʼwírima japi aní echi Biblia, echoná párrafos rilé ayé uchuwi preguntas japi mi náripo jiti mi we aʼlá machimea. Wiká pagótami we kanilia raʼicha echi testigo Jeobá yúa jiti machinali japi aní echi Biblia. Ati mayé japi mujé ayénachó we kanílima. ¡Onorúami mi iʼwírima jiti mi binema japi aní echi Biblia!