SECCIÓN 8
Japalí mi we risoa nili
“Echijiti ʼyémitamo ne wabé simírami kanila, chopi ke siné káachi arigá ʼwérali níima mapu ʼyémitamo pe téeli niráa risúu olárami níibo.” (1 Pegro 1:6)
Chu ko mi ré kanílisa nili japi mujé upila, mujé kúchuwala ma, sinibí kanílika pirélima, we be nalí isini kaachi ke echi riká ju ba ami we risoa níliré (Eclesiastés 9:11). Onorúami ko mi kuʼírima japalí mi risoa nili. Ata mi nokisáaká binea japi aní echi Biblia, mujé alí japi mi yúa bité ata mi anachábolé chati namuti ikisaa.
1 AMI BICHÍWISARÉ JEOBÁ
JAPI ANÍ ECHI BIBLIA: “Sinibí ariwesi mapurigá Riosi ʼyemi mi tibútama. Ketasi ne wabé nílaga ʼnatasi karúmati jiti, mapujiti Riosi Binói ʼyemi mi kuʼwírama.” (1 Pegro 5:7.) Mujé ko ma machí japi ke Onorúami iyiri ju japalí mi risoa ikí (Santiago 1:13). Ami mulíwisaká Onorúami echi ko we aʼlá mi tibuma (Isaías 41:10). Sinibí yúa raʼichá Onorúami ané suwaba japi mi nili (Salmo 62:8).
A sinibí rawé mi leérisaká echi Biblia alí mi binésaká ami kaníliami nima. Ami echi riká isisaká, ami machimea japi Jeobá né bichíwali “sinibí tamujé tamí wabé galá ku kanílatama mapalita wabé risúu olárami ju” (2 Corintios 1:3, 4; Romanos 15:4). Echi Onorúami ko aní japi “ʼyemi mi ʼyama máputamo sinibí kilí ologá pirélabo” (Filipenses 4:6, 7, 13).
JAPI MI ISIMA:
Jeobá yúa raʼichá, jéané japi mi kilii nima, kiti mi aʼlá natama
Bachá natá japi mi isímarú echi riká mi isísaká aʼlá mi machimea japi mi isínali
2 AʼLÁ TIBÚ JAPI MI YÚA BITÉ ALÍ MUJÉ BINÓI SI
JAPI ANÍ ECHI BIBLIA: “Echi sulala japi we machíami ju binéami ju, alí echi nakala japi aʼlá machíami ju aami ju japi binema” (Proverbios 18:15). ¿Piri newalé ibili niraa japi mi yúa bité echoná bitichí? Ami machisáré piri newalea. Yúa raʼichá alí we aʼlá kipú japi mi ané (Proverbios 20:5).
Japalí mujé téemala mukusaa japi mi we kalé kiti riwélika nalá japalí mi omónasa. Jesús ayénachó “nalali” (Juan 11:35; Eclesiastés 3:4). We aʼlá ju japi mi aʼlá sibárika ochimea kiti mi aʼlá isábima (Eclesiastés 4:6). Ami echi riká isísaká we aʼlá mi anachama japalí mi risoa nili.
JAPI MI ISIMA:
Sinibí raʼichasi okuaka ayénachó emi kúchuwala yúa, kiti japalí ta mi risoa nilia pirélisa kiti ke riwélika mi yúa raʼichama
Raʼichá jarecho yúa japi echi riká cho ikili
3 NIKÚURILI TA
JAPI ANÍ ECHI BIBLIA: “Japi amigo ju ko, sinibí we aʼlá kalé echi amigo alí ineni japi riká binoy bachilá japalí risoa níliachi” (Proverbios 17:17). Japi mujé amígowala ju echi ko mi kuʼírinali, we be nalí ke machí japi chúriká mi iwírima. Ruyé suwaba echi amigo chúriká mi kuʼírima (Proverbios 12:25). Ayénachó aa japi aʼlá machíami ju echi Biblia, kiti busuré mi iyama echoná leérika, kiti mi anachama japi mi ikili (Santiago 5:14).
Yúa napawí echi pagótami japi a bichíwami ju Onorúami alí japi bichiwi japi echi aní, ayénachó mi kuʼírimalé kiti mi anacha nílima japalí mi risoa nílisa. Aʼlá nima japi mi iwírima japi mi omona nili, ané japi mi Jeobá bichiwi alí japi echi isíimaré. Wiká namuti isí, kuʼíriwa jarecho kiti wanapi echi pagótami yúa japi mi we kalé kiti echi mi kuʼírinali (Proverbios 18:1; 1 Corintios 15:58).
JAPI MI ISIMA:
Bilé amigo yúa raʼichá alí riwé japi mi iwíripo
Ami nakiyáaká japi mi iwíripo né bichíwika raʼichá, alí ke riwélika ané japi mi nili kiti echi riká omérima mi iwiria