Kiti majá echi Jeobá rawéwala

Ma mulipi ju japalí jonsa Jeobá ma ke kilí buwema japi echi pagótami riwema cha nokayá. Echalí, sinéami echi religiones japi ke bichíwali bineri suwábitami nima. Ayénachó jaré naciones suwábinalima Jeobá puéblowala. Japalí ma echi riká ikíachi Jeobá ko suwábima suwaba echi pagótami chati echoná Armagedón. Sinéami japi ta Jeobá nijewi ma ti buwé japi echi riká ikimea.

Nalí, a nirú wiká namuti japi ta ke machí chúriká ikimea echoná gran tribulación. Japi riká, ke ti machí chu kabú chotásima. Ayénachó ke ti machí chúsiá echi gobiernos suwábinalima echi religiones. Alí ke ti machí chu kilí rojorama echi naciones risoa olayá Jeobá puéblowala alí chúriká nokimea. Ke cho ti machí chúriká isima Jeobá suwabia echi pagótami chati echoná Armagedón.

Ke ti majásaré japi ikimea pe aminana jiti echi Biblia ma tamó ruyé japi chúriká kilí nílipo alí ke majabo. Japi riká, ati machí japi ta “wabé waminánomí rawé” piré (2Ti 3:1). Ayénachó ti machí japi echi naciones chéwitami nima jiti ke siné suwábima echi religión ne bichíwali (Mt 24:22). Alí, ati we aʼlá machí japi Jeobá ko niyúbima echi puéblowala (2Pe 2:9). Ayénachó ti we aʼlá machí japi Jeobá ma wilali bilé we jiwérami alí we aʼlá isíami jiti suwábima echi cha nokáami alí niyúbima echi puéblowala (Ap 19:11, 15, 16).

Japalí ikíachi suwaba jepuná namuti echi pagótami ko natajema majaa (Lu 21:26). Nalí, tamujé ko ke. Ati natásaká alí leérisaká japi chúrika Jeobá chabé tibuli echi puéblowala alí chúriká iʼwírima pe aminana, ati ke majabo alí nokiboa japi riká aní Lucas 21:28: “Wabé kanílasi [...] mapujiti ke ʼme ayó ʼyémitamo galá kuʼwíratami níibo”.