BINELÍWAMI 53
¿Achi galé Jeobá echi namuti japi ta kanili nokayá?
Jeobá ko ju echi Onorúami we kaníliami (1 Timoteo 1:11, TNM). Echi ko nakí japi ta we kaníliami nipo alí japi kanila pirélipo. Ayénachó nakí japi ta isábipo japalí ti ma nochasa alí kanila nokiboa jarecho namuti. Jenaʼí binelíwami binepo jaré namuti japi ta omero nokayá jiti kanila simáripo japalí ta ma sunisa nochia alí achi echi namuti japi ta noká, galé Jeobá.
1. ¿Piri ta natásaré japalí ta kanila simárinali?
¿Piri mi kanili isiá japalí mi ma sunisa nochia? Jaré ko bitichí a ripí leeria bilé libro, kipúa música, inea película o jarecho si namuti echoná internet. Alí jaré ko kanili nokayá jarecho namuti echi amigos yúa, japi riká basalówisia simíaya, akea o riʼesia ma. Tákoré ti ke chopi iyiri namuti noká, nalí suwaba japi ta noká a nísaré japi Onorúami galé (Efesios 5:10, TNM). Jepuná ko we natéami ju japi ta aʼlá machiboa. ¿Chúsiá? Jiti wiká echi namuti japi kanili nokayá echi pagótami, Onorúami ko we kichí. Japi riká nakówami, nasawíliami alí sukurúami (leeri Salmo 11:5). Jiti la, ¿piri tamó iʼwírima jiti aʼlá nátika nokiboa?
Ati olásaká amigos japi galé Jeobá, echi ko tamujé iʼwírima jiti aʼlá nokiboa alí kanila simáripo. Japi riká ti ma bineli echoná binelíwami 48, “echi japi iyena pagótami yúa we aʼlá nátami, ayénachó we aʼlá natama”. Nalí, echi japi napawí echi pagótami yúa japi ke nijewi japi Jeobá nulá, echi ko “risoa nílima” (Proverbios 13:20).
2. ¿Chúsiá we natéami ju japi ta ke wilí simáripo nokayá echi namuti japi ta kanili nokayá?
Tákoré echi namuti japi ta kanili nokayá ke chati ke, ati we aʼlá natásaré chu ikí horas simáripo nokayá echi namuti. Jiti ke echi riká ti nokisáaká, ati wilí nokibóoré isiá echi namuti alí ma ke ikíripo nokayá japi wabé natéami ju. Echi Biblia tamujé ané: “We yaa galabé olasi suwaba máputamo omero” (leeri Efesios 5:15, 16).
AMINABI NATABO JAPI TA BINÉ
Ma binepo piri mi isísaré jiti echi namuti japi mi kanili isiá kanílitima Jeobá.
3. Kiti isí echi namuti japi chati ju
¿Chúsiá we natéami ju japi ta aʼlá natabo chu iyiri namuti japi ta nokinali aʼlá ju alí chu iyiri ko ke? Inesi echi VIDEO alí raʼichasi jepuná jitra:
¿Piri namuti chopi iyiri ju japi nokali echi nakóami chabé alí japi riʼé jipi echi pagótami?
Japi riká machina echoná video, ¿piri bineli Danny?
Leérisi Romanos 12:9 alí raʼichasi jepuná jitra:
Japi riká aní na versículo, ¿chúriká tamó iʼwiri jiti aʼlá nátika nokiboa?
¿Chu iyiri ju jaré namuti japi Jeobá kichí? Leérisi Proverbios 6:16, 17 alí Gálatas 5:19-21. Ma leérisa ibili texto raʼichasi jepuná jitra:
Suwaba echi namuti japi aní echi texto, ¿chu iyiri ju echi namuti japi wabé noká echi pagótami japalí kanila simari?
¿Chúriká ti machiboa japi echi namuti japi ta noká kanila simárimia aʼlá ju?
Nárika isí:
¿Piri ju? ¿Achi machina o nokiwá namuti japi Jeobá kichí?
¿Chu kabú? ¿Achi nima japalí mi isimí jarecho namuti japi wabé natéami ju?
¿Jépuká yúa? ¿Achi ni we napawima pagótami yúa japi ke nijewi Jeobá?
Jiti ke risoa ikiboa ke ti mulíwisaré japoná ti machí japi cha ikiboa. Echi riká cho ke nokiboa echi namuti japi ta kanili nokayá nalí japi ta machí japi chati ju.
4. Aʼlá natá japi mi isima alí chu kilí
Inesi echi VIDEO alí raʼichasi jepuná jitra:
Tákoré echi hermano japi machina echoná video ke chati namuti ineli, ¿chúsiá ke aʼlá nili japi isié?
Leérisi Filipenses 1:10 alí raʼichasi jepuná jitra:
¿Chúriká tamó iʼwiri na versículo jiti natabo chu kilí nokiboa japi ta kanili nokayá?
5. Isí echi namuti japi mi kanili isiá nalí japi aʼlá ju
A bichíwali ju japi Jeobá ko ke galé jaré namuti japi echi pagótami kanili nokayá, nalí a nirú wiká namuti japi ta omero nokayá jiti kanila simáripo. Leérisi Eclesiastés 8:15 alí Filipenses 4:8, alí raʼichasi jepuná jitra:
¿Piri namuti mi kanili isiá japi aʼlá ju?
Ati kanila simáripo nokayá echi namuti japi ta galé alí japi aʼlá ju.
JAPI ANÍ JARÉ PAGÓTAMI: “Ke chati ju japi ta riʼepo o inepo japoná machina nakówami, nasawíliami alí sukurúami, ke ti nokisáaká japi echoná buyaní”.
Mujé ko, ¿piri mi animea?
JAPI MI BINELI
Jeobá ko nakí japi ta kanila simáripo alí kanila nokiboa echi namuti japi aʼlá ju.
Piri mi animea
Echi namuti japi ta noká kanila simárimia, ¿chu iyiri ju japi ta ke nokisáré?
¿Chúsiá ti we aʼlá natásaré chuti kilí noká echi namuti japi ta kanili nokayá?
¿Chúsiá mi isínali echi namuti japi kanílitima Jeobá?
JITI MI CHE BINEMA
Biné jépuká nalí anisáré japi mi isísaré kanila simírimia.
Leeri chúriká mi machimea achi echi namuti japi mi isínali kanila simírimia aʼlá ju.
“¿Achi aʼlá ju echi namuti japi ta kanili nokayá?” (Echi Nawésami, 15 inárachi octubre 2011)
Ami machimea chúsiá bilé rijoi riweli isiá jaré namuti japi kanilie isiá. Leeri echi biografía “Ma ni ke kichí echi pagótami japi sinúrika ju”.
“Binesa echi Biblia jipi ko we kaníliami ju” (Echi Nawésami, 1 inárachi febrero 2010)
Iné piri namuti aʼlá isili bilé mukí japalí ineli japi echoná película machina namuti japi demonios níwala ju.