¿Chu isíami ju Jesús?

Ati aminabi mulíwipo Jesús alí echi Onolá Jeobá, japalí ti biné japi isili Jesús japalí biteili jenaʼí Wichimóbachi. ¿Chu iyiri ju jaré namuti japi Jesús we simá isíami nili? Alí, ¿piri ta nokisáré jiti nipo japi riká Jesús?

1. ¿Chúsiá mi aʼlá machisáaká Jesús ayénachó mi we aʼlá machimea Jeobá?

Jesús ko wiká millones bamíali biteili echi Onolá yúa alí binea chúriká ju echi. Jiti la echi ko nata alí isimí japi riká Jeobá (leeri Juan 5:19). Jesús ko ne sojí chopi iyiri ju japi riká echi Onolá, jiti la echi ko jéanili: “Echi mapu tamí ritiwako, échiko ma ritiwá Onorúami” (Juan 14:9). We mi aʼlá machisáaká Jesús ayénachó mi we aʼlá machimea Jeobá. Japi riká, Jesús we galeli echi pagótami alí jepuná newaré japi Jeobá ayénachó we galé echi pagótami.

2. ¿Chúriká newa isili Jesús japi we galé echi Onolá?

Jesús ko jéanili: “Nijeni we galé Onorúami, ayénachó [...] Nijé we olá mapurigá Onorúami tamí nuleli olánala” (Juan 14:31). Japalí Jesús jenaʼí Wichimóbachi biteili sinibí nijéwili Jeobá tákoré we jilí nili, echi riká newa isili japi we galé echi Onolá. Jesús ko we kanilie raʼichia echi Onolá jitra alí iʼwiria jarecho pagótami jiti Jeobá amígowala nima (Juan 14:23).

3. ¿Chúriká newa isili Jesús japi we galé echi pagótami?

Echoná Biblia aní japi Jesús wabé galé echi pagótami (Proverbios 8:31). Echi ko newa isili japi we galé echi pagótami japalí iʼwírili alí ke buweli japi echi ku iʼwírima. Echi milagros japi niwali ke bi néwariwélitili japi we jiwérami ju, nalí ayénachó japi iʼwírinali echi pagótami (Marcos 1:40-42). We simá isíami nili sinéami yúa. Suwaba japi anili Jesús ku kaníliti echi pagótami japi aʼlá nokáami nili. Jesús ko riweli japi risoa olárami nima alí miʼlirúami nima jiti we galé sinéami echi pagótami, nalí ne wabé galé japi a nijewi japi echi bineri (leeri Juan 15:13, 14).

AMINABI NATABO JAPI TA BINÉ

4. Jesús ko we galé echi Onolá

Japi riká Jesús isili, tamó binérili chúriká newa nokiboa japi ta we galé Onorúami. Leérisi Lucas 6:12 ayénachó Juan 15:10 alí 17:26. Ma leérisa ibili echi texto, raʼichasi jepuná jitra:

• Japi riká isili Jesús, ¿tamujé chúriká newa nokiboa japi ta we galé Jeobá?

6. Jesús ko iyali jarecho japi olali

Tákoré Jesús ke olali wiká namuti, echi ko sinibí iyali jarecho japi olali alí tamó ané japi echi riká cho nokiboa. Leérisi Hechos 20:35 alí raʼichasi jepuná jitra:

• Japi riká anili Jesús, ¿piri ju japi tamó kaníliti?

Inesi echi VIDEO alí raʼichasi jepuná jitra:

VIDEO: We kaníliami ju japi iyá jarecho (fragmento) (4:00)

• ¿Chúriká ti omero iyayá jarecho tákoré ti ke olá wiká namuti?

¿Ami machiyé?

Echi Biblia ko aní japi ta néesaré echi Jesús riwalá japalí ti Onorúami yúa raʼicha (leeri Juan 14:6). Echi riká newa nokiboa japi ta we natéami niraa iné japi Jesús isili jiti ta Onorúami amígowala nipo.

JAPI MI BINELI

Jesús ko we galé Jeobá alí ayénachó echi pagótami. Jiti Jesús ju japi riká echi Onolá, ami aminabi binésaká echi jitra, we mi aʼlá machimea Jeobá.

Piri mi animea

• ¿Chúriká ti newa nokiboa japi ta we galé Jeobá japi riká Jesús?

• ¿Chúriká ti newa nokiboa japi ta we galé echi pagótami japi riká Jesús?

• Japi riká ju Jesús, ¿piri mi we galé?

JITI MI CHE BINEMA

Inepo jaré namuti japi riká isíami nili Jesús jiti echi riká cho nokiboa.

“Nokiboa japi riká isili Jesús” (Jesús ju echi buwé, echi bichíwali alí echi bitéliwami, página 317)

Biné chúriká tamó iʼwiri Jesús jiti ta oméripa raʼicha Onorúami yúa.

“¿Chúsiá ta néesaré Jesús riwalá japalí ta raʼicha Onorúami yúa?” (Echi Nawésami, 1 inárachi febrero 2008)

¿Achi aní echi Biblia japi chúriká nili Jesús?

“¿Chúriká nili Jesús?” (Oselí japi nirú echoná jw.org)

¿Chúriká nili Jesús echi umukí yúa?

“Onorúami ko we natéami niraa iné echi umukí alí riwiwi” (Echi Nawésami, 1 inárachi septiembre 2012)