BINELÍWAMI 28
Newa isí japi mi we natéami niraa iné japi nokali Jeobá alí Jesús mi jitra
¿Chumi nili japalí bilé amigo mi iyá bilé regalo japi mi we galé? A bichíwali ju japi mi we kanili alí mi a néwariwélitinali japi mi we natéami niraa iné echi regalo japi echi mi iyali. Jeobá alí Jesús ayénachó tamujé iyali bilé regalo we natéami: Jesús mukuli tamujé jitra. Jenaʼí binepo chúriká ti newa nokiboa japi ta we natéami niraa iné echi regalo.
1. ¿Chúriká ti newa nokiboa japi ta we natéami niraa iné japi nokali Jeobá alí Jesús tamujé jitra?
Echoná Biblia aní japi “siʼnéami pagótami mapu ikí galá bichíiko echi [Jesús]” sinibí bitélima (Juan 3:16). ¿Chúriká newaré japi ta bichí Jesús? Ke bi aniboa japi ta bichí, ayénachó suwaba japi ta noká néwariwélitisaré japi ta bichíyami ju (Santiago 2:17). Japalí ti aní alí ti newa noká japi ta bichíyami ju, ata aminabi we aʼlá amigos nipo Jeobá yúa alí Jesús (leeri Juan 14:21).
2. ¿Chu kabú wabé natéami ju japi ta néwariwélitipo Jeobá alí Jesús japi ta we natéami niraa iné japi nokali?
Kecho bijí mukuyá, Jesús ko aneli echi discípulos japi napawima newalamia japalí echi mukuli, echi napawíliwami ko machiwá japi riká Conmemoración, echi riká echi discípulos néwariwélitima japi we natéami niraa iné japi echi isima (1 Corintios 11:20). Jesús ko niwali echi napawíliwami echi apóstoles yúa alí echalí jonsa ayénachó nakiyé japi sinéami cristianos newalama japalí echi mukuli sinéami pagótami jitra. Echi ko jéanili: “Sinibí jeʼná jerigá olasi mapurigátamo galá ʼnatabo tamí jiti” (Lucas 22:19). Japalí mi simí Conmemoración, ami néwariwéliti japi mi we natéami niraa iné japi nokali Jeobá alí Jesús tamujé jitra.
AMINABI NATABO JAPI TA BINÉ
Ma inepo jarecho namuti we natéami japi ta nokiboa jiti matétara iyabo Jeobá alí Jesús. Alí inepo chúsiá we natéami ju japi ta napawipo newalamia japalí Jesús mukuli.
3. Newa nokiboa japi ta matétara iyá Jeobá alí Jesús
Natá japi mi silía iyena echoná baʼwírili alí bilé nolina mi iʼwírisia. ¿Achi mi wikawama japi echi isili mi jitra? ¿Wechi ko ke mi isima bilé namuti jiti mi matétara iyama?
Tamujé ko matétara iyásaré Jeobá jiti tamó niyúbili. Leérisi 1 Juan 4:8-10 alí raʼichasi jepuná jitra:
¿Chúsiá bilé regalo we natéami ju japi Jesús isili?
¿Chumi nili machiyá japi nokali Jeobá alí Jesús mi jitra?
¿Chúriká ti newa nokiboa japi ta we natéami niraa iné japi nokali Jeobá alí Jesús tamujé jitra? Leérisi 2 Corintios 5:15 alí ayénachó 1 Juan 4:11 alí 5:3. Ma leérisa ibili versículo, raʼichasi jepuná jitra:
¿Chúriká ti newa nokiboa japi ta matétara iyá Jeobá alí Jesús?
4. Nokiboa japi riká Jesús
Japalí ti noká japi riká Jesús, ati néwariwéliti japi ta matétara iyá Jeobá alí Jesús. Leérisi 1 Pedro 2:21, TNM, alí raʼichasi jepuná jitra:
¿Chúriká mi newa isima japi mi isimí japi riká Jesús?
Jesús ko we natéami niraa ineli Onorúami Raʼicháala, nawesia Onorúami jitra alí iʼwiria jarecho pagótami.
5. Ati napawí newalasia Jesús mukúala
Jiti mi machimea chúriká niwáari echi bachá Conmemoración, leérisi Lucas 22:14, 19, 20. Alí raʼichasi jepuná jitra:
¿Piri nokali echalí rokojó?
¿Piri aniwáami ju echi pan alí vino? (Inesi echi versículos 19 alí 20).
Jesús ko nakiyé japi echi discípulos sinibí bamíali napawima newalasia japalí echi mukuli. Jiti bela, tamujé testigo Jeobá ati sinibí bamíali napawí newalasia japalí Jesús mukuli alí ti noká japi riká echi isili. Jiti mi machimea chúriká ju echi napawíliwami we natéami, inesi echi VIDEO. Alí raʼichasi jepuná jitra:
¿Piri nokiwá Conmemoración kaachi?
Echi pan ko aniwáami ju echi Jesús ripokala japi ke cha isíami nili alí japi nijili tamujé jitra. Alí echi vino ko aniwáami ju echi Jesús lalá.
JAPI ANÍ JARÉ PAGÓTAMI: “Jiti ta niyúbipo pe Jesús bi bichíwisaré”.
¿Chúriká mi néema Juan 3:16 alí Santiago 2:17 ruyemia japi ayénachó nokisáré jarecho namuti?
JAPI MI BINELI
Ata matétara iyá Jeobá alí Jesús japi nokali tamujé jitra, japalí ta newa noká japi ta bichí Jesús alí japalí ta simía echi Conmemoración.
Piri mi animea
¿Chúriká ta newa nokiboa japi ta bichiwi Jesús?
¿Ami matétara iyánali Jeobá alí Jesús japi nokali mi jitra? ¿Chúriká mi isínali?
¿Chúsiá we natéami ju japi ta simabo Conmemoración newalasia Jesús mukúala?
JITI MI CHE BINEMA
¿Piri ta nokinálipo ma machisaa japi Jesús mukuli tamujé jitra?
Piri aniwáami ju bichiwia alí chúriká ti newa nokiboa japi ta bichíyami ju.
¿Chúriká iʼwírili bilé mukí aʼlá inámisa japi Jesús mukuli echi jitra? Leeri japi echi anili.
“Binesa echi Biblia jipi ko we kaníliami ju” (Echi Nawésami, 1 inárachi agosto 2011)
Leeri chúsiá pe kuabi ju japi koʼá echi pan alí bají echi vino echoná Conmemoración.