¿Chu ikí testigo Jeobá mi machí? Jaré ko a ma piréeré mulipi ayé japoná mujé bité, jaré ko nóchiré japoná mi nocha, jarecho ko simíbiré japoná mi simí escuélachi alí jaré ma mi yúa raʼíchiré echi Biblia kitra. ¿Jépuká ta ju, alí chúsiá ta raʼicha echi pagótami yúa japi ta bichiwi?

Chopi iyiri ta ju japi riká echi pagótami. Sinéami ta suwinárika países piréami ju alí jaré ko we winomíwami ju alí jarecho ko ke me. Chabéi jaré tamujé suwinárika bichíwiami nili, alí jarecho ko ke bichíwiami nili Onorúami, we be nalí, japalí kecho testigo Jeobá ka, bachá ko ata bineli echi Biblia (Hechos 17:11). Japi ta bineli ata machili japi né bichíwali ju alí kiti bela ta né iniili nochínala Jeobá.

Ata riwé japi ta echi Biblia kitra ta kuʼíritami niba. Japi riká sinéami echi pagótami tamujé ayénachó ta risoa ikí alí ta jiwérika noká kiti ta ke chati namuti nokiboa; we be nalí, ta sinibí rawé jiwérika noká nijewia echi Biblia nuláala kiti bela ta kanílika piré (Salmo 128:1, 2). Kiti bela ta raʼichánali echi pagótami yúa echi namuti kitra japi ta ma bineli echi Bíbliachi.

Ata nijewi echi busuréliami japi echoná Bíbliachi oserúa uchuwi. Jepuná busuréliami, japi echi Biblia bineri, ata kuʼíriwa kiti ta kilii kaníliami nipa. Ayénachó ta kuʼíriwa riwiwia echi pagótami, kiti ta simá aníami nipa alí kiti ta bichíwika raʼichabo. Ata kuʼíriwa kiti ta ke me nayupa alí kiti ta we nóchami nipa, kiti ta kanílika pirélipa echi téemala yúa alí kiti ta aʼlá nokáami nipa. Ata machí japi Onorúami sinéami chopi riká simárika olá. Kiti bela sinéami echi testigo Jeobá omáana piréami, tamujé najirémala ju, tákoré suwinárika raʼíchami ke, jaréanacho mi país piréami ma. Chíkotaré sinéami chopi riká ke japi riká sinéami, echi testigo Jeobá bilepi bi ta pueblo ju, tasi wesi nirú japi riká tamujé (Hechos 4:13; 10:34, 35).

• ¿Piri noká echi testigo Jeobá, japi riká sinéami pagótami?

• ¿Piri namuti kalabé ta binéritami ju echi Biblia kitra?

Wiká pagótami mayé japi echi testigo Jeobá kulíwami bichíwiliami ju. We be nalí, chabéi jonsa, 2.700 simírikami bamíali, Onorúami ko riwali echi amígowala japi riká binói “testigos” (Isaías 43:10-12). Alí kecho bamíbachi 1931, ata machirúami nili japi riká Biblia Binéami. ¿Chúsiá tamujé abói nakili japi testigo Jeobá riwéwima?

Kiti machirti jépuká ju Onorúami japi ta nóchiliami ju. ¿Chu ikisi oserúami ju echi Onorúami rewalá echoná Bíbliachi? 7 mil simírikami. Echi riká néwariwéliti japi echi Biblia chabéwami oserúami nili. Jaré pagótami japi osali echi Biblia, japi riká abói raʼíchami nili, ma ke osali echi Onorúami rewalá, nalí osali Walubéala, Riosi ma. We be nalí, japalí Onorúami raʼíchali Moisés yúa, echi ko aneli japi echi rewalá ko Jeobá ju alí jéanéli: “Jepuná ko nijé rewalá ju sinibimti” (Éxodo 3:15). Echi riká anili kiti machimea riweili chu rewéami ju echi Onorúami né bichíwali. Alí tamujé ko we ta kanili kiti ta olá echi Onorúami rewalá japi biʼwíami ju.

Kiti machirti japi ta noká. Né chokichí jonsa, wikabé pagótami ko a machírtika nokali japi bichíwiami ju Jeobá, né bachá japi echi riká isiili ko Abel nili. Ayénachó niruili jarecho a, Noé, Abrahán, Sara, Moisés alí David, alí che jarecho si, “jepuná pagótami japi machírtika nok[ali], bilé waʼlú noʼlí ju” (Hebreos 11:4–12:1, TNM). Japi riká bilé rejoy japi simí japoná karewi alí machirti japi machí bilecho rejoy aʼláala kitra, tamujé ayénachó machirti echi bichíwali Onorúami kitra.

Kiti ta noká japi riká isiili Jesús. Echi Biblia aní japi Jesús “sinibí niráa ne wabé bichíwaga aní” (Apocalipsis 3:14). Echi ko machírtili echi binói Onolá rewalá alí anili: Nijé “nawali jenaʼí wichimóbachi mapurigani nawisama echi ne Bichíwali” Onorúami kitra (Juan 17:26; 18:37). Kiti bela, echi binói najátowala né bichíwali a rewéwami nísaré Jeobá rewalá néeka alí machírtisaré echi rewalá. Echi bela ju japi echi testigo Jeobá jiwérika noká echi riká nokayá.

• ¿Chúsiá ta ma ke Biblia Binéami rewéami nínalami nili, nalí testigo Jeobá?

• ¿Chu kabú jonsa nirú pagótami japi machirti echi Jeobá rewalá jenaʼí Wichimóbachi?

• ¿Jépuká ju echi walubéala rejoy japi machírtili echi Jeobá rewalá jenaʼí Wichimóbachi?

Echi Biblia ko anili japalí mukusaa Cristo, jaré echi najátowala, ikaleka binériami nima riweli, alí japi ke aʼlá binérima echi bichíwali japi aní echi Biblia (Hechos 20:29, 30). Alí né echi riká ikili: a niruili pagótami ikaleka binériami japi a bichíwali binérili jaré namuti japi binérili Jesús, nalí be ayénachó ikaleka binérili, echi riká wiká muwésili japi ke bichíwali binériami ju Jesús kitra (2 Timoteo 4:3, 4). Machiká jepuná, ¿chúsiá ta mayé japi né bichíwali ju japi ta biné japi aní echi Biblia?

Jeobá chotásili machirtia echi né bichíwali. Onorúami ko anili japalí kecho nawáachi echi jubá rawé “echi machiwáami né bichíwali wiká muwésima [riweili]” (Daniel 12:4). Echi bamíali 1870, okuáabi pagótami japi áali echi bichíwali, machili japi nokí suwaba japi binérili echi bichíwiliami, ke Bíbliachi uchúwami nili. Kiti bela chotásili áasia né japi riká bineri echi Biblia alí Jeobá machírtili kiti riwimea echi né bichíwali.

Jaré pagótami aʼláala we aʼlá nátaka bineli echi Biblia. Jepuná Biblia Binéami chotásili binea echi Biblia japi riká ta noká jipi: bineka ibili niraa binelíwami echi Biblia kitra. Japalí ke moʼása bilé texto, jarecho texto áali japi kuʼírima aʼlá moʼayá, alí japalí ma aʼlá moʼása japi bineri echi Biblia, a osayé. Echi riká nokaká riweli japi echi Biblia kitra binéritami nima, echi riká bineli né bichíwali japi aní echi Biblia; echi Onorúami rewalá alí echi Binói Gobiérnowala, japi chúriká nakí japi pirélima echi pagótami jenaʼí Wichimóbachi, echi suwíkami ko checho a ku pirélima. Japi echi riwali ko a kuʼírili kiti ke bichíwima echi binelíwami japi ke bichíwali ju alí japi ke nokimea japi Jeobá ke kalé (Juan 8:31, 32).

Echi bamíali 1879, echi Biblia Binéami machili japi nawisárami nima riweili echi bichíwali omáana Wichimóbachi. Echalí bamíali chotásili niwayá echi oselí japi jipi si niwásiwa: La Atalaya. Anunciando el Reino de Jehová. Jipi rawé ata nawesa echi bichíwali japi aní echi Biblia, 240 países simírikami alí isena raʼíchami 750 simírikami ju. ¡Jipi ko ma wiká pagótami machí echi né bichíwali!

• Japalí Jesús mukuli, ¿piri binérili jaré pagótami japi aní echi Biblia?

• ¿Chúriká ku machiiru né bichíwali japi aní echi Biblia?

Wiká bamíali ju, japi echi testigo Jeobá, copia buyáchali echi Biblia, japi echi pagótami osáala nili japi riká abói raʼíchami nili (traducciones aniwáami) alí nachútika iyali echi copia echi pagótami. We be nalí, kilipi niraa echi testigo Jeobá a machili japi echi pagótami a newalé japi oserúami nima echi Biblia kiti sinéami aʼlá moʼama japi aní echi Biblia kiti “galá machimea echi ne Bichíwali”, alí echi ju japi Onorúami nakí japi machimea sinéami echi pagótami (1 Timoteo 2:3, 4). Kiti bela echi bamíali 1950 jonsa, echi testigo Jeobá chotásili buyacha echi Biblia pe okuabi oselí oserúami inglés niraa, japi riká jipi raʼicha, Traducción del Nuevo Mundo anilíami. Jepuná copia oserúami ju né bichíwali alí oserúami ju 130 simírikami raʼicháliami japi osá echi pagótami.

A newalewi bilé Biblia japi ke jilí nima moʼáliwa. Jipi rawé echi pagótami ma ke raʼicha japi riká raʼichawi chabéi, kiti bela echi traducción oserúami ju raʼíchali japi ta ke machí piri aniwáami ju echi. Ayénachó a riwali echi Biblia chabéwami oserúami, jepuná ko né chopi iyiri oserúami nili japi riká né bachá oserúami nili echi Biblia, kiti bela we aʼlá nikuuro kiti aʼlá moʼábo echi raʼíchali hebreo, arameo alí griego, japi riká raʼíchami nili echi Biblia osáami.

A newalewi bilé traducción japi animea né echi riká japi riká oserúami nili né chokichí jonsa. Echi pagótami japi osá echi Biblia suwinárika raʼicháliami tasi bilé osisáré japi riká abói nakí; né osisáré japi riká chabéwala oserúami nili. We nalí, jaré pagótami japi osali jaré traducción ma ke osali echi Onorúami rewalá, Jeobá.

A newalewi bilé Biblia japi aʼlá raichama Echi Japi Niwali kitra (2 Samuel 23:2). Echoná Traducción del Nuevo Mundo, a checho ku osairu echi Jeobá rewalá, 7 mil simírikami textos japi riká oserúami nili chabéi, japi riká chukú echoná rilé ayé (Salmo 83:18). Bamíali niraa we biné ka nokali kiti osimea jepuná Biblia, kiti bela we ta kanili leeria kiti ke jilí ju moʼoliwa echi Onorúami natáala. Ami olá bilé Biblia Traducción del Nuevo Mundo, ma oserúami japi riká mi raʼicha, bilecho Biblia ma, mi ta ané kiti mi sinibí rawé leérima echi Onorúami Raʼicháala (Josué 1:8; Salmo 1:2, 3).

• ¿Chúsiá osaali bilé Biblia Traducción del Nuevo Mundo?

• ¿Piri isisaré sinibí rawé japi machinali ko Onorúami?