Wiká pagótami ma ke simiba tiyópachi kiti echoná ke binériwa japi aní echi Biblia, kecho kuʼíriwa kiti kilii kaníliami nílima. Alí biché, ¿chúsiá mi simisáré Japoná biné echi Testigo Jeobá? ¿Piri aniwá echoná?

We mi kanílima echi pagótami yúa napawía we kaníliami alí we simá aníami. Echi bachá siglo, echi Jesús najátami ayénachó napawili kiti nóchilima Onorúami, bineli echi Biblia alí anakupi niraa we kaníliami nili (Hebreos 10:24, 25). Japalí napawía echi rejimá yúa we simá aníami, japi nili japi riká amigos né bichíwali (2 Tesalonicenses 1:3; ). Tamujé ayénachó echi riká ta noká japi riká echi alí ayénachó ta we kanili.

Ata biné nijewia echi busuréliami japi echoná Bíbliachi oserúa uchuwi. Nokaká japi riká nokali echi pagótami japi raʼicha echi Biblia kitra, rarámuli, umukí alí echi kuuchi, ata napawí kipusia echi nawésali japi nijíliwa alí ata kuʼíriwa kiti ta machiboa chúriká nijéwipa echi busuréliami japi aní echi Biblia (Deuteronomio 31:12; Nehemías 8:8). Sinéami japi echoná muchuwi a náriwa kiti animea japi náriliwa kiti ibili niraa animea japi nili ayénachó si wikarama tamo yúa a omériaká (Hebreos 10:23).

Aminabi mi bichíwimalé Onorúami. Echi julárami Pablo osiili echi rejimá japi napawí: “Mapujiti nijé ʼyemi nimí ne wabé ʼnénali [...] mapurigá tamujeta aʼnagupi waminabi wabé kanílatabo” (Romanos 1:11, 12). Japalí ta napawí binesia echoná napawíliwachi ata aminabi bichiwia nili Onorúami alí ta nijéwinali echi nuláala.

Simí echoná napawíliwachi alí mujé binói machimea japi né echi riká ju. We ta kanílipa mujé nawáachi echoná napawíliwachi. Ke mi bujeba, kecho tániwa winomí.

• ¿Chúriká nili echi napawíliwachi chabéi, alí jipi ru?

• ¿Chu ta nili japalí ta simía napawíliwachi, alí chúsiá?

Japi ta testigo Jeobá ju sinibí ta simiba binesia japoná ta napawí, chíkoré ukuyá wiliké alí we miká niisa ma. ¿Chúsiá né aʼlá jiwérika noká napawía echi rejimá echoná napawíliwachi tákotaré risoa nilia piré we risiyá éensa ma nocha?

Tamí kaníali iyá. Japalí Pablo raʼíchali echi napawíliwachi kitra echi ko anili: “Machiká nokiboa anakupi niraa” (Hebreos 10:24, TNM). Echi julárami Pablo ko nakiyé japi ta machiká nokiboa, japi ta we natéami niraa inepa jarecho. Japalí ta machí jarecho rejimá echoná napawíliwachi, ata machí japi echi ma anáchali echi karú ikiwáami japi tamujé ayénachó olá alí japi echi ko nikuuro kiti ta anachaba.

Nikuuro kiti ta olaba amigos né bichíwali. Echoná napawíliwachi ata napawí amigos yúa japi ta we nakí. Ayénachó ata napawí riʼea isini kaachi. ¿Chúsiá aʼlá ju yúa napawiwa echi rejimá? Nikuuro kiti ta we nakiká nokiboa. Japalí echi rejimá olasa karú ikiwáami ata sapú simía kuʼírisia kiti ta echi amígowala kampa (Proverbios 17:17). Japalí ta sinéami yúa napawí echi rejimá ata néwariwélitipa japi ta we natéami niraa iné echi rejimá (1 Corintios 12:25, 26).

Ayénachó ni mi ané japi mi amígowala bi nima echi pagótami japi ayénachó noká japi Jeobá nakí. Ami riwimea echi amigo echi testigo Jeobá bi yúa. Sinibí simí napawíliwachi tamujé yúa.

• ¿Chúsiá aʼlá ju yúa napawiwa echi rejimá echoná napawíliwachi?

• ¿Chu kabú mi raʼéwinali japoná napawí echi testigo Jeobá?

Echi bacháwala Jesús najátami ko a wikarali, amachíkili alí leérili echi Onorúami Raʼicháala echoná napawíliwachi (1 Corintios 14:26). Japalí mi nawasa japoná ta napawí, jipi chikó riká cho nokiwá japi riká nokali echi bacháwala.

A ruyeliwa japi aní echi Biblia. Sábado, oméachi ma, sinéami echi rejimá napawí kipusia bilé nawésali echi Biblia kitra japi 30 minutos bi ju, alí ta ruyeliwa japi aní echi Biblia alí aní japi chu riwélima jipi rawé. Ata aneliwa japi irápipa echi Biblia japi echoná leériwa. Ma sunisa, binea echi Binelíwami La Atalaya, bilé hora binewa, ayénachó sinéami japi ta napawika muchuwi ata aneliwa japi ta aniboa japi náriwa echi binelíwami La Atalaya. Jepuná binelíwami kitra ta binériwa chúriká nijéwipa echi busuréliami japi nirú echoná Bíbliachi. Omáana Wichimóbachi a nirú 110 mil congregaciones simírikami alí ibili niraa chopi riká biné.

Ata kuʼíriwa kiti ta we aʼlá binériami nipo. Ayénachó ata napawí ma alíi nocha éenisa ata biné bikiá secciones. Jéaníami Vida y Ministerio Cristianos; a binéporé japi michá niráa uchuma Guía de actividades para la reunión Vida y Ministerio Cristianos. Bachá sección aníami ju Tesoros de la Biblia; ata binepo echi textos japi mi bitichí jona leerisa nawali, japoná binewi. Osá sección ko aníami ju Seamos mejores maestros; ayénachó simárima jarecho jiti ta echi ineka echi riká cho nokiboa echi pagótami bineria Biblia. Bilé rejoy nawisama chúriká nokala jiti ta sinéami machiboa chúriká aʼlá leeripo, bineria ma (1 Timoteo 4:13). Jubá sección ko aníami ju Nuestra vida cristiana; echoná ko binepo jiti echi riká nokiboa japi aní echi Biblia. We aʼlá mi binema jiti mi machimea japi aní echi Biblia, ayénachó náriwa alí tamujé ko aní japi ta machí.

Japalí mi simisaa echoná napawíliwachi, ami machimea japi we aʼlá binériwa echi Biblia kitra (Isaías 54:13).

• ¿Piri ka nokiwá echoná japoná napawí echi testigo Jeobá?

• ¿Chu iyiri jepuná napawíliwachi mi bachá simínali?

¿Ma mi ineki echi foto jepuná oselichi japi we aʼlá simárika jawi echi testigo Jeobá japalí simía napawíliwachi? ¿Chúsiá we aʼlá natéami ju japi ta sinibí we aʼlá simárika járipa?

Kiti ta riwiwi Onorúami. A bela bichíwali ju japi Onorúami ko wabé natéami niraa iné echi sulala ke me japi ta riká jari (1 Samuel 16:7). We nalí, japalí ta napawí binésia Jeobá kitra, ata simárika simía kiti ta riwiwi Jeobá alí ayénachó echi japi ta yúa napawí. Ata yúa simasa bilé oyérami ata we aʼlá simárika simía kiti ta riwiwi alí kiti walúala ju. Echi ko riká cho ju japalí ta we aʼlá simárika simía napawíliwachi ata néwariwéliti japi ta nakí echi “japi Oyérami ju omáana wichimóbachi”, Jeobá, alí japi ta riwiwi japoná ta napawí binésia Jeobá (Génesis 18:25).

Kiti néwariwélima japi ta né noká japi aní echi Biblia. Echi Biblia ané echi Jesús najátowala japi “galá pólaga napachama, ayénachó mapu aboni galá sébali iʼwéli sipúchama”, echi riká noká echi pagótami japi aʼlá nátami ju, kiti echi riká noká japi “galabé olánala mapurigá Riosi Binói nakí” (1 Timoteo 2:9, 10). Echi ko aniwáami ju japi echi sipucha, napacha ma, ke me natéami nima, ke simochi, ke chaʼíami, ke chiwáami, we be nalí a nirú wiká sipucha, napacha ma, japi ke echi yiri ju. Japi riká ta napacha newaré “mapu Riosi Raʼíchala binékowami ne wabé galabé ju”, alí walubéala anérami ju Onorúami (Tito 2:10; 1 Pedro 2:12). Ata we aʼlá simárika simásaká echoná napawíliwachi, echi pagótami we simárika natama echi Onorúami puéblowala kitra.

A mi aʼlá simárika inásaré alí biʼwíami sipúchaka tákoré ke kulíwami ke pa. Tákoré mi ke olayé napawíliwachi napáchali japi riká napacha japi simía echoná napawíliwachi Japoná biné echi Testigo Jeobá, ke mi olayaka a riká simí.

• ¿Chúsiá we natéami ju japi ta aʼlá napáchaka simaba binésia Onorúami kitra?

• ¿Chu aní echi Biblia echi sipucha kitra alí echi napacha?

Ami binéaká echi Biblia echi testigo Jeobá yúa, bachá mi binésaré bineli echi binelíwami. Echi riká cho mi isíisaré kiti mi aʼlá binema japi aniwá echoná napawíliwachi. Ami sinibí echi riká isíisaká, we mi aʼlá binema.

Ami machisáré chu kabú alí kumi mi binema. ¿Chu kabú mi kanílisa nili binea? ¿Biʼyá ke mi cho simíachi nochasia, alíi ma chónachi wiliachi, japalí ma ochílachi echi kuuchi? Sinibí mi binésaré, chíkomiré wiká olayé nóchali. Biné japoná ke chilíwiliwa, japoná mi kanílisa nili binea, ma binemia choʼá echi radio alí televisión, teléfono ma. Bachá amachiki, jepuná mi kuʼírima kiti mi ke natama japi mi risoa níliti alí kiti mi nalí natama echi Onorúami Raʼicháala (Filipenses 4:6, 7).

Subrayari echi raʼíchali natéami kiti mi animea japi mi náriwa. Bachá ami machisáré japi aní echi binelíwami. Leeri japi aní echi oselí alí ayénachó echi subtítulo, artículo alí ayénachó iné echi iyóktami, leeri suwaba echi náriwami, kiti ta newalaba echi namuti we natéami. Pe aʼlínala ko leeri echi párrafos alí aa echi japi náriwa. Aa echoná Bíbliachi echi textos japi ke oserúa uchuwi echoná oselichi alí kiti mi machimea chu aniyá japi aní echi Biblia japi ta biné (Hechos 17:11). Japalí mi machisá japi mi náriwa subrayari, echi riká ke jilí mi nírama. Japalí mi echoná binelíwachi atí, ami nakiyáaká ayawi echi sikala alí aní japi mi náriwa.

Ami sinibí tarali binésaká suwaba echi binelíwami aminabi mi machísima echi Biblia kitra (Mateo 13:51, 52).

• ¿Piri mi isíisaré kiti mi sinibí tarali binema japi binéparé echoná napawíliwachi?

• ¿Piri mi isíisaré bachá kiti mi machimea japi mi animea echoná napawíliwachi?

Chabéi jona, Jeobá ko nakili japi echi wénwala alí kúchuwala napawika binema Onorúami kitra kiti nakimea anakupi niraa (Deuteronomio 6:6, 7). Kiti bela, echi testigo Jeobá napawí bilé rawé tarali niraa aboni pirélachi kiti napawika binema Onorúami kitra, biné japi abói machinali. Ayénachó echi japi awénili piré echi riká cho noká binea echi Biblia japi binénali.

Ata kuʼíriwa kiti ta mulíwipa Jeobá. “Galá bichíiga mulubéanasi Riosi yuwa, aʼlí Riosi ayénachó mulubéanama ʼyemi yuwa.” (Santiago 4:8.) Ata mulipi yúa atí ka nili Jeobá japalí ta biné echi Biblia ata machí chu iyiri ju alí piri isimí. Ata napawika binésaré leeria echi Biblia echoná bitichí ineka echi programa japi binéporé Reunión Vida y Ministerio Cristianos. Okuáabi leeri echi Biblia alí aní japi bineli.

A ta kuʼíriwa kiti ta nakiboa japi ta yúa piré. Echi niwíkami japi ke kúchuwami ju alí japi kúchuwami ju, anakupi niraa a nakí japalí napawika biné echi Biblia. Sinéami a kanílisaré echalí rawé. Jaré japi kúchuwami ju, biné echi kúchuwala yúa, jaré a mi binea noká japi aní La Atalaya alí ¡Despertad!, ayénachó irapi echi página Internet jw.org japi echi kúchuwala machimea japi binériwa. Ayénachó yúa raʼícha abói kúchuwala japi ikí echoná escuélachi kiti mi kuʼírima. ¿Chúmisiá ke iné echi programa de televisión echoná JW Broadcasting (tv.jw.org) alí timi raʼíchabo japi timi ineli echoná? Ayénachó mi binésaré wikaráa japi wikarawá echoná napawíliwachi, ma sunísaká binea jaré ko koʼwá koʼwáami.

Sinibí japalí ta napawí binea Jeobá kitra echoná bitichí, ata nakiyá nili echi Onorúami Raʼicháala alí ata jiwérika nokisáaká binea japi aní echi, Jeobá ko wiká namuti nijima (Salmo 1:1-3).

• ¿Chúsiá ta biné Jeobá kitra echoná bitichí bilé rawé tarali niraa?

• ¿Piri nokisáré echi wénwala kiti sinéami binenílima?

¿Ami ritiwá jenaʼí echi pagótami japi we kaníliami ju? Echi muchuwi japoná wiká napawili. Chabéi ko Onorúami nuleli echi amígowala kiti bikiá rawé napawima bilé bamíali niraa. Jipi rawé, tamujé ayénachó we ta kanili simiba japoná wiká napawí (Deuteronomio 16:16). Sinibí bamíali niraa napawiwa bisiá niraa. Echi napawíliwami ko ju: Okuá napawíliwami japi bilé rawé rojorá (echi ko riwaliwa asamblea de circuito) alí bilé napawíliwami japi bikiá rawé rojorá (echi ko riwewi asamblea regional). ¿Chúsiá we natéami ju japi ta simabo?

Ata kuʼíriwa kiti ta we nakiboa echi rejimá. Echi israelitas japi chabéi piréami nili, echi ko we kanili binea Jeobá kitra “napawika wiká pagótami yúa”, jipi ayénachó we ta kanili binea Onorúami kitra echi rejimá yúa japalí ta napawí (Salmo 26:12; 111:1). Echoná ta machí jarecho rejimá japi síkami ju jaréana congregación, jaréanacho país ma. Nasipa rawé ko, ata napawika koʼwá echi koʼwáami echi rejimá yúa alí echi riká newaré japi sinéami amigos ju (Hechos 2:42). Echoná ta néwariwéliti japi ta we nakí “siʼnéami echi auché jaré ritémtami” omáana piréami (1 Pedro 2:17).

Ata kuʼíriwa kiti ta che binepa Jeobá kitra. Echi israelitas ko ayena a kuʼíritami nili japalí binéritami nili kiti “aʼlá machimea echi raʼíchali” japi oserúa uchuwi Bíbliachi (Nehemías 8:8, 12). Jipi, ayénachó we natéami ju japi ta binériwa echoná napawíliwachi. Ibili niraa ata binériwa suwinárika aníami binelíwami japi Bíbliachi jonsa machí awátami ju. Ata kipú we natéami nawésali alí aniwá chúriká aʼlá nijéwipa Onorúami. Ayénachó, ata kipú raʼíchami bilé rejimá japi a anáchali japalí risoa ikili. Echoná napawíliwachi, japi bikiá rawé rojorá (asambleas regionales), ata iné pagótami japi riká napáchami nili chabé piréami, japi riká jipi ma, echi ineka ata biné japi aní echi Biblia. Ayénachó, sinibí japalí napawíliwa, a pakoka noká japi katúwika nokali Onorúami yúa.

• ¿Chúsiá ta we kanili simiba japalí napawíliwa?

• ¿Piri mi binema echoná napawíliwachi?

Ma mulipi mukumeya, Jesús ko anili: “Aʼlí jeʼná Galabé Riosi Raʼíchala galá nawisárami níima ne suníami jenaʼí wichimóbachi, jeanigá mapu Riosi ne galá nulema echi jaré pagótami. Echalí ma sebama ne jubá suwibálawachi rawé” (Mateo 24:14). ¿Chúriká nawisárami nima riweili echi nawésali omáana Wichimóbachi? Ata noká japi riká isili Jesús japalí iyénali jenaʼí Wichimóbachi (Lucas 8:1).

Ata simía echi pagótami pirélachi. Jesús ko binérili echi najátowala kiti nawisama echi raʼíchali kalabé echoná bitichí ayé (Mateo 10:11-13; Hechos 5:42; 20:20). Echi bacháwala nawésami nuleri kumi nawisama (Mateo 10:5, 6; 2 Corintios 10:13). Echi riká cho ju jipi, ibili congregación machí kumi simama nawisasia. Echi riká nokaká ata nijewi japi Jesús nulali “mapurigata ruyebo” echi pagótami Jeobá kitra (Hechos 10:42).

Ata simía echi pagótami yúa japi kumi ko iyena piree. Bachá Jesús echi riká isili, echi ko nawésali suwé ayé bawirili japi wiká pagótami enali, payéwichi ma japoná sinéami pagótami siyé baʼwí turusia (Marcos 4:1; Juan 4:5-15). Tamujé ayénachó simiba nawisasia echi Biblia kitra, echoná calle, japoná ralinewa, echoná parque, teléfono ma. Isini kaachi ta yúa raʼicha echi pagótami japi mulipi piré tamujé yúa, japoná ta nocha, echoná escuelachi, alí tamujé téemala ma. Echi riká ta noká kiti milloni pagótami omáana Wichimóbachi piréami kipuma echi “raʼíchali kalabé japi echi niyúbima” (Salmo 96:2).

¿Jépuká mi yúa kanílisa nili raʼicha echi raʼíchali kalabé echi Onorúami Gobiernowala kitra? Raʼichá jarecho yúa japi mi ma bineli, kiti binói machiká ripí. ¡Jiyáwika yúa raʼichá jarecho echi raʼíchali kalabé!

• ¿Chu iyiri “raʼíchali kalabé” nawisásaré?

• Japi ta testigo Jeobá ju, ¿chúriká ta noká japi riká isili Jesús?

Echi raʼíchali precursor ko aniwáami ju bilé japi bachá irápisimí echi buwé kiti simárima japi upaka éena. Jesús ayénachó precursor nili, kiti julárami nili kiti binérima echi pagótami alí irápili echi buwé kiti niyúbima (Mateo 20:28). Jipi rawé echi riká cho nokiwaa ata bineri echi pagótami kiti machimea Onorúami (Mateo 28:19, 20). Kiti bela jaré ko precursor nínali.

Bilé japi sinibí nawesa. Sinéami japi testigo Jeobá ju, ata nawesa echi raʼíchali kalabé. We be nalí, a nirú jaré japi precursores regulares nínali alí sinibí michá niraa nawesa 70 horas. A okuáabi rawé simiba nochasia, mesia winomí. Jarecho ko chapirúami ju kiti precursores especiales nima; echi ko sinibí michá nawesa 130 horas; echi ko júliwa japoná pe okuáabi nirú nawésami. Echi precursores ko a olá japi newalé bi kiti machi japi Jeobá iyama japi newalé (Mateo 6:31-33; 1 Timoteo 6:6-8). Japi ke omeri ko precursores regulares niya, kecho especiales, a nakiyáaká precursores auxilares nima, alí nawesa sinibí michá niraa 30, 50 horas ma.

Precursor ju kiti we nakí Onorúami alí echi pagótami. Japi riká Jesús, ata machí japi echi pagótami a binésaré Jeobá kitra (Marcos 6:34). Kiti bela ata binéri echi pagótami Onorúami kitra kiti kanílika pirélima jipi alí sinibí. Echi precursores ko we nakí echi pagotami kiti bela a ikíriami ju binérisia simiba echi pagotami tákoré we risiyé (Mateo 22:39; 1 Tesalonicenses 2:8). Echi riká nokaká we bichiwi Jeobá alí we nakísimí kiti bela we kaniliami ju (Hechos 20:35).

• ¿Piri aniwáami ju echi precursor?

• ¿Chúsiá jaré precursores nínali?

Japi Onorúami kitra binériwa echi testigo ko we natéami niraa iné. Echi escuela ko echi testigo Jeobá bi simía japi wiká rawé simía nawisasia echi pagótami yúa echi Onorúami Gobiérnowala kitra, echi ko a noká “né sébali galabé olá mapurigá Riosi [...] nuleli” (2 Timoteo 4:5).

Escuela japi biné echi Precursor. Japalí ma bilé bamiba precursor ka, bayewi japi simía echi escuela usani rawé rojorá, a napawí Japoná biné echi Testigo Jeobá. Echoná escuela binériwa kiti we machíami nima Jeobá kitra, aminabi we nóchiliami nima Jeobá, kiti we aʼlá binériami nima echi pagótami japi aní Onorúami alí kiti anachama.

Escuela japi biné echi japi Nawesa Raʼíchali Kalabé. Echoná escuela binewi okuá michá. Japi ma wiká bamibi precursores ka a riwesa simía japi yúa piré alí simiba jaréanacho mi japomí pe okuáabi nirú nawésami Onorúami kitra. Alí jéaní: “¡Jenaʼí ni wilí! Tamí julá”. Echi riká aniká noká japi riká isili Jesucristo, echi bineli nili japi we nawésami nili jenaʼí Wichimóbachi (Isaías 6:8; Juan 7:29). Japalí we miká simía a biné namuti nokiyá japi nokiwá echoná, a ralá namuti japi newalé bi. Japomí si sinú riká noká echi pagótami. Japomí simía ama, ratachi keʼré, rulachi ma, koʼyáa ma koʼwáami japi ke siné koʼwáami nili. Jaré ko biné raʼicha japi riká raʼichawa echoná. Echi escuela ko simía echi rejoy, mukí ma, japi ke niwíkami ju, ayénachó simía japi niwíkami ju (23 alí 65 bamiba ju japi simía), we aʼlá binériwa kiti aʼlá binérima echi pagótami japi aní echi Biblia japoná simía; echi riká nokoká we aʼlá nochama japi riká nulá Jeobá, alí nijewi echi pagótami japi Onorúami jáwili, echi Organización.

Escuela Bíblica de Galaad de la Watchtower. Echi raʼíchali “Galaad” aniwáami ju, hebreo niraa, japi riká echi nawésami. Echi bamíali 1943 jonsa chotásili echi Escuela de Galaad; simíali 8 mil simírikami testigo Jeobá echoná. Echi ko julárami nili jaréanacho mi país kiti nawisama echi raʼíchali kalabé; echi ko wiká pagótami binérili (Hechos 13:47). Chabé bamíali jaré países japi riká Perú echomí kecho niruli congregaciones japalí siili echi japi simíali echi Escuela de Galaad. Jipi ko, ma nirú mil congregaciones. Japalí siili echomí Japón, 10 bi testigo Jeobá pireili. Jipi ko nirú 200 mil simírikami. Echi testigo japi simía echi Escuela de Galaad, malí michá mochika biné alí binériwa echi Onorúami Raʼicháala kitra. ¿Jépuká simiba? Echi testigo Jeobá japi precursores especiales ju, japi julárami ju nawisánilia jaréanacho país, japi nocha sucursales alí echi oʼwéala ochérami circuito japi si echoná napawíliwachi. Echi ko we aʼlá biné wiká nóchali kiti echi riká aʼlá iwírima chúriká nawisama echi pagótami echi raʼíchali kalabé omáana Wichimóbachi, kiti aminabi nawisama alí jiwérika nokísima nóchilia Onorúami.

• ¿Chúsiá nirú echi Escuela japi biné echi Precursor?

• Echi Escuela japi biné echi japi Nawesa Raʼíchali Kalabé, ¿jépuká simama binésia?