Oserúami japi nijá echi Testigo Jeobá Japi Aʼlá Niseri

“ʼYémitamo ma galá omérati riwéali binériya Riosi Raʼíchala echi auché jaré pagótami” (Heb. 5:12). ¡Ta natasi bo! Ke wesi bineri japi riká Jeobá; echi ko aní japi ta binéripo jarecho japi chu isíami ju Jeobá. Tamujé ko we kanílika bineri Jeobá jitra echoná japoná ti piré, japoná ti napawila alí japalí ti nawesa eena; Jeobá ko we natéami niraa inena japalí ti echi riká noká. ¿Chúriká aʼlá binériami nipo?

Echi Pablo ko aneli echi Timoteo: “Ne sinibí galá ʼneni [o, leeri] Riosi Raʼíchala [...]. Sinibí galá ruyegá bineri echi auché jaré ritémtami”. Ayénachó jéaneli: “Aʼlí ami jeʼná jerigá olásagá, mujemi galá kuʼwíratami [niyúbitami] níima, ayénachó galá kuʼwíratami [niyúbitami] níima siʼnéami echi jaré mapu kipunuko” (1 Tim. 4:13, 16). Echi pagótami japi ta bineri a omérima sinibí pirea a aʼlá kipúsaká. Jiti la we natéami ju japi ta iʼwérili nokiboa japi riká anili Pablo. Ami binésaká na folleto ami machimea chumi riká aʼlá leérima alí binérima. ¿Chumi riká néema na folleto? Ma inepo:

Ami leérima bilé texto bíblico japoná ruyé chúsiá we natéami ju echi binelíwami alí japoná ruyé chúriká nokali japi aʼlá binériami nili.

Echi Jeobá ko “We aʼlá Binériami” ju (Is. 30:20). Ami aʼlá binésaká na folleto ami machimea chumi riká we aʼlá leérima alí binérima; nalí be ami newalásaré japi Jeobá ju japi aʼlá bineri echi pagótami alí japi isimí jiti echi pagótami aʼlá bichíwima Jeobá (Juan 6:44). Jiti la ami sinibí tánima Jeobá echi espíritu santo. Sinibí nee echi Biblia japalí mi bineri. Bineri echi pagótami japi riká nata Jeobá ke ko japi mi riká binoy nata. Iʼwérika isí bineria jiti echi pagótami we aʼlá nakimea Jeobá.

Onorúami ko mi ané jiti mujé ayénachó binérima echi pagótami echi raʼíchali kalabé we natéami japi oserúa uchuwi echoná Bíbliachi. Ata aʼlá machí japi mi aʼlá binérima echi pagótami ami riwésaká japi Jeobá mi ‘jiwérili iyamaʼ (1 Ped. 4:11, TNM).

Echi hermanos japi mi yúa bineri,

Echi Testigo Jeobá Japi Aʼlá Niseri