-
¿Piri ju echi Onorúami Gobiérnowala?¡We mi kanílika bitélima sinibí! Biné japi aní echi Biblia
-
-
BINELÍWAMI 31
¿Piri ju echi Onorúami Gobiérnowala?
Echi Biblia ko we raʼicha echi Onorúami Gobiérnowala jitra. Jeobá ko néema echi Gobiérnowala checho ku niwamia echi Wichimoba japi riká nili ne chokichí. Nalí, ¿piri ju echi Onorúami Gobiérnowala? ¿Chúriká ti machí japi ma nulá? ¿Piri namuti isimí jipi? Alí, ¿piri namuti isima pe aminana? Na binelíwami alí jaréala si, ati binepo jepuná náriwami jitra.
1. ¿Piri ju echi Onorúami Gobiérnowala, alí jépuká ju echi silíami?
Onorúami ko wilali bilé gobierno japoná echi silíami Jesús ju alí nulama ripá jonsa (Mateo 4:17; Juan 18:36). Echi Biblia ko aní japi echi Jesús “ne sinibí niráa [...] nulema” (Lucas 1:32, 33). Jiti Onorúami wilali Jesús japi riká silíami, echi ko nulama omáana Wichimóbachi.
2. ¿Jépuká nulama Jesús yúa?
Ayénachó jaré pagótami “isena raʼíchali raʼíchami mapu ikí nirú ne suníami jenaʼí wichimóbachi [...] oʼwéala nuláami” nima Jesús yúa (Apocalipsis 5:9, 10). ¿Chu ikí pagótami nima japi Jesús yúa nulama? Japalí jonsa Jesús biteili jenaʼí Wichimóbachi wiká millones pagótami ju japi noká japi riká Jesús binérili, nalí 144,000 pagótami bi ju japi nulama Jesús yúa (leeri Apocalipsis 14:1-4). Alí jaréala pagótami ko jenaʼí Wichimóbachi pirélima (Salmo 37:29).
3. ¿Chúsiá echi Onorúami Gobiérnowala wabé aʼlá ju ke ko japi riká echi gobiernos jenaʼí Wichimóbachi nirúami?
Tákoré nirú jaré silíami japi aʼlá nokinali, nalí ke suwaba omero nokayá japi echi nakí. Alí miná ko wiliba bilecho gobierno japi ke iʼwírinili echi pagótami japoná nulá. Nalí Jesús japi silíami ju echoná Onorúami Gobiérnowala sinibí nulama. Onorúami ko wilali “bilé gobierno japi ke sineti suwábitami nima” (Daniel 2:44). Jesús ko nulama omáana Wichimóbachi alí we aʼlá nulema sinéami pagótami. Echi ko we galéami ju, simá isíami, ayénachó sinibí wachía isíami ju, alí binérima echi pagótami jiti echi riká cho nokimea anakupi niraa (leeri Isaías 11:9).
AMINABI NATABO JAPI TA BINÉ
Ma inepo chúsiá echi Onorúami Gobiérnowala wabé aʼlá ju, ke ko japi riká echi gobiernos jenaʼí Wichimóbachi nirúami.
4. Echi Gobierno japi Onorúami wilali nulama omáana Wichimóbachi
Jesucristo ko we omérami ju alí echi bi ju japi we aʼlá machí nulayá, ke wesi nirú bilecho nuláami japi riká echi. Leérisi Mateo 28:18 alí raʼichasi jepuná jitra:
¿Chúsiá Jesús wabé aʼlá silíami ju ke ko japi riká echi silíami japi nirú jenaʼí Wichimóbachi?
Echi gobiernos jenaʼí Wichimóbachi nirúami pe uchíi bi nulá alí ke wilí rojorá. ¿Achi echi riká ikimea echi Gobierno japi Onorúami wilali? Leérisi Daniel 7:14 alí raʼichasi jepuná jitra:
¿Chúsiá we aʼlá ju japi echi Gobierno japi Onorúami wilali ke siné suwábitami nima?
¿Chúsiá aʼlá ju japi nulama omáana Wichimóbachi?
5. Echi gobiernos jenaʼí Wichimóbachi nirúami ma ke nulásaré
¿Chúsiá echi Onorúami Gobiérnowala suwábisaré echi gobiernos jenaʼí Wichimóbachi nirúami alí binoy nulásaré? Inesi echi VIDEO alí raʼichasi jepuná jitra:
¿Piri namuti ke aʼlá nokali echi gobiernos jenaʼí Wichimóbachi nirúami?
Leérisi Eclesiastés 8:9 alí raʼichasi jepuná jitra:
¿Achi Onorúami Gobiérnowala nalí nulásaré jenaʼí Wichimóbachi? ¿Chúsiá?
6. Echi japi nuláami nima echoná Onorúami Gobiérnowala aʼlá machí japi ta nili
Echi silíami Jesús ma biteili jenaʼí Wichimóbachi, jiti la echi ko “galá omero tamujé tamí natimaya máputa ketasi me jiwérami ju” (Hebreos 4:15). Jeobá ko chapili 144,000 pagótami japi nijéwami ju jiti nulama Jesús yúa. Echi pagótami ko omáana Wichimóbachi piréami ju alí isena raʼíchami (Apocalipsis 5:9).
¿Ami kanili natia japi Jesús alí japi echi yúa nulama a machí japi chu ju piréliwa japi riká pagótami? ¿Chúsiá?
Jeobá ko chabé jonsa alí jipi chéana, chapili jaré pagótami omáana Wichimóbachi piréami alí isena raʼíchami jiti nulama Jesús yúa.
7. Echi nulalíwami japi olá Onorúami Gobiérnowala wabé rasía aʼlá ju echi nulalíwami yúa japi niwá echi pagótami
Echi gobiernos niwá nulalíwami jiti tibuma alí iʼwírima echi pagótami. Echi Gobierno japi Onorúami wilali ayénachó olá nulalíwami alí echi pagótami nijéwisaré. Leérisi Efesios 5:5 alí 1 Corintios 6:11, alí raʼichasi jepuná jitra:
¿Chúriká ti piréliporé japalí sinéami pagótami nijéwisa japi Onorúami nulá?a
¿Achi aʼlá ju japi Jeobá anema echi pagótami japi nulérami ju echi Gobiérnowala jitra japi nijéwisaré japi echi nulá? ¿Chúsiá?
¿Chúriká ta machí japi echi pagótami cha nokáami a omero nijewia japi Onorúami nulá? (Inesi echi versículo 11).
Echi gobiernos niwá nulalíwami jiti tibuma alí iʼwírima echi pagótami. Nalí echi nulalíwami japi olá echi Onorúami Gobiérnowala wabé rasíruka aʼlá ju, alí ayénachó tibú alí iʼwiri echi pagótami.
JAPI ANÍ JARÉ PAGÓTAMI: “Echi Reino Onorúami níwala tamujé sulálachi atí”.
Mujé, ¿piri mi animea?
JAPI MI BINELI
Echi Gobierno japi Onorúami wilali a bichíwali ju alí wilí ripá riwigachi. Echi ko ripá jonsa nulama jenaʼí omáana Wichimóbachi.
Piri mi animea
Echoná Onorúami Gobiérnowala, ¿jépuká si nuláami nima?
¿Chúsiá ke nirú bilecho gobierno japi riká echi Onorúami Gobiérnowala?
¿Piri nakí Jeobá japi nokimea echi pagótami japi nulérami ju echi Gobiérnowala jitra?
JITI MI CHE BINEMA
Leeri japi binérili Jesús echi Reino jitra.
“¿Achi echi Reino Onorúami níwala tamujé sulálachi atí?” (Oselí japi nirú echoná jw.org)
¿Chúsiá echi testigo Jeobá bachá nijewi echi Onorúami Gobiérnowala alí upá echi gobiernos jenaʼí Wichimóbachi nirúami?
Biné japi aní echi Biblia echi 144,000 pagótami jitra japi Jeobá chapili jiti Jesús yúa nulama.
“¿Jépuká simía ripá riwigachi?” (Oselí japi nirú echoná jw.org)
¿Chúsiá bilé mukí japi erta asali bichíwili japi Onorúami bi ju japi isima japi ke nirúlima chati namuti?
“Ani bineki chúriká ma ke nirúlima echi chati namuti” (¡Busuréwiami!, noviembre 2011)
-
-
¡Echi Onorúami Gobiérnowala ma nulá!¡We mi kanílika bitélima sinibí! Biné japi aní echi Biblia
-
-
BINELÍWAMI 32
¡Echi Onorúami Gobiérnowala ma nulá!
Echi Onorúami Gobiérnowala chotásili nulayá ripá riwigachi bamíali 1914. Jiti bela, echi gobiernos jenaʼí Wichimóbachi nirúami ma ke wilí rojorama. ¿Chuti riká machí jepuná? Jenaʼí binepo echi profecías japi anili echi Biblia, ayénachó japi riká ti piré jipi alí japi noká echi pagótami 1914 jonsa.
1. ¿Chu anili echi Biblia?
Echi libro japi Daniel osali ma aniyé japi echi Onorúami Gobiérnowala chotásima nulayá ma simírisa “siete tiempos” (Daniel 4:16, 17). Ma simírisa jaré siglos, Jesús ko rewali echi siete tiempos japi riká “los tiempos señalados de las naciones”, alí binérili japi echalí echi tiempos kecho bijí suní (Lucas 21:24, TNM). Ma binepo japi echi siete tiempos sunili bamíali 1914.
2. ¿Chu ikí jenaʼí Wichimóbachi alí chu nokáami ju echi pagótami 1914 jonsa?
Echi discípulos ko nárili Jesús: “¿Chúriká ta aʼlá machiboa japalí mi ma nuláami nisa alí japalí ke me ayó nima echi jubá rawé?” (Mateo 24:3, TNM). Jesús ko aneli japi ikimea wiká namuti japalí echi ma chotásisa nulayá japi riká silíami echoná Onorúami Gobiérnowala. Anili japi nirúlima nakówami, lochéwami alí japi nokomea echi kawí (leeri Mateo 24:7). Echi Biblia ayénachó anili chu nokáami nima riweili echi pagótami echalí “waminánomí rawé” alí japi we jilí nima (2 Timoteo 3:1-5). Bamíali 1914 jonsa suwaba echi namuti ma echi riká ikísimi.
3. ¿Chúsiá wiká chati namuti ikísimi japalí jonsa chotásili nulayá echi Onorúami Gobiérnowala?
Wakinana pe japalí Jesús chotásili nulayá echoná ripá riwigachi, Jesús nikoli echi Satanás alí demonios yúa. Satanás ke niyúrili alí “ripá riwigachi jonsa machí pátami níili, jenaʼí wichimóbachi” (Apocalipsis 12:9, 10, 12). Satanás ko we iyoa iyena jiti machí japi ma mulipi miʼlirúami nima. Echi ko isimí wiká chati namuti jenaʼí Wichimóbachi, jiti la echi pagótami we risoa nilia piré. Nalí echi Onorúami Gobiérnowala ma mulipi suwábima echi chati namuti.
AMINABI NATABO JAPI TA BINÉ
Binepo chúriká ti machí japi echi Onorúami Gobiérnowala chotásili nulayá bamíali 1914 jonsa alí ayénachó binepo piri ta nokisáré.
4. Echi profecías tamó bineri japi echi bamíali ju 1914
Onorúami ko isili japi echi silíami Nabucodonosor, japi nulali echomí Babilonia, rimuma bilé profecía. Japi echi rimuli alí japi riká ruyeli Daniel aniwáami ju echi Nabucodonosor gobiérnowala alí echi Onorúami Gobiérnowala (leérisi Daniel 4:17).a
Leérisi Daniel 4:20-26 alí néesi echi recuadro ruyemia echi preguntas:
A) ¿Piri ineli Nabucodonosor japalí rimuli? (Inesi echi versículos 20 alí 21).
B) ¿Chu olárami nima echi okó? (Inesi echi versículo 23).
C) ¿Piri ikimea riweili ma sunisa echi “siete tiempos”? (Inesi echi versículo 26).
Echi okó japi rimúrami nili alí Onorúami Gobiérnowala
ECHI PROFECÍA (Daniel 4:20-36)
Nulayá asali
A) Bilé okó we ripá wilíami
Riweli nulayá
B) “Mitesi echi okó” alí riwesi japi “simírima siete tiempos”
Checho ku nulali
C) “Checho mi ku nulama”
Japi bachá ikili:
D) Echi okó, ¿jépuká aniwáami nili? (Inesi echi versículo 22).
E) ¿Chu kabú riweli nulayá? (Leérisi Daniel 4:29-33).
F) ¿Piri ikili echi ma simírisa “siete tiempos”? (Leérisi Daniel 4:34-36).
JAPI BACHÁ IKILI
Nulayá asali
D) Nabucodonosor, silíami ju echomí Babilonia
Riweli nulayá
E) Nabucodonosor lowili ma simírisa bamíali 606 a.C. alí ke omeri nulayá kichao bamíali
Checho ku nulali
F) Nabucodonosor ma ke lowíami ju alí checho ku chotasi nulayá
Japi upá ikili:
G) Echi okó, ¿jépuká aniwáami nili? (Leérisi 1 Crónicas 29:23).
H) ¿Chu kabú riweli nulayá? ¿Chúriká ti machí japi ke nulayá mochili japalí Jesús biteili jenaʼí Wichimóbachi? (Leérisi Lucas 21:24).
I) ¿Kumi alí chu kabú chotásili nulayá echi gobierno?
JAPI UPÁ IKILI
Nulayá asali
G) Echi isélikami israelitas japi Onorúami jáwili, echi ko nili japi riká ko Onorúami nulayá
Riweli nulayá
H) Jerusalén najunáari bamíali 607 a.C. alí echi isélikami israelitas riweli nulayá 2,520 bamíali
Checho ku nulali
I) Jesús ko chotásili nulayá echoná Onorúami Gobiérnowala bamíali 1914
¿Chu kilí rojorá siete tiempos?
Jaré versículos japi aní echi Biblia tamó iʼwiri inamia jarecho textos. Japi riká Apocalipsis aní japi tres tiempos miná nasipa ju 1,260 rawé (Apocalipsis 12:6, 14). Siete tiempos ko ju 2,520 rawé. Japalí echi Biblia aní bilé rawé, isini kaachi ko ju bilé bamíali (Ezequiel 4:6). Alí echi riká tarawa echi siete tiempos japi ruyé echi libro de Daniel, echi ko ju 2,520 bamíali.
5. Bamíali 1914 jonsa we cha ikísimi
Jesús ko anili japi ikimea riweili jenaʼí Wichimóbachi japalí echi ma chotásisa nulayá. Leérisi Lucas 21:9-11 alí raʼichasi jepuná jitra:
Japi riká aní echi profecía, ¿chu iyiri mi ma iné o kipú echi riká ikíachi?
Echi apóstol Pablo ruyeli chúriká nima riweili echi pagótami ma kuwachimi rawé. Leérisi 2 Timoteo 3:1-5 alí raʼichasi jepuná jitra:
Japi riká aní echi versículos, ¿chúriká mi ritiwá japi nokáami ju echi pagótami?
6. ¿Piri ta nokisáré machisaa japi Onorúami Gobiérnowala ma nulá?
Leérisi Mateo 24:3, 14 alí raʼichasi jepuná jitra:
¿Piri nóchali we natéami newaré japi ma nulá echi Onorúami Gobiérnowala?
¿Piri mi isísaré mujé si nikúurimia echi nóchali?
Onorúami Gobiérnowala ko ma nulá ripá riwigachi alí ma mulipi nulama omáana jenaʼí Wichimóbachi. Leérisi Hebreos 10:24, 25 alí raʼichasi jepuná jitra:
Jiti ta ma kuwachimi rawé piré, ¿piri ta nokisáré?
Ami binésaká bilé namuti japi iʼwírima jarecho jiti sinibí pirélima, ¿piri mi isima?
JAPI NARI JARÉ PAGÓTAMI: “¿Chúsiá echi testigo Jeobá we raʼicha 1914 jitra?”.
¿Piri mi animea?
JAPI MI BINELI
Echi profecías japi aní echi Biblia alí echi namuti japi ikísimi omáana Wichimóbachi, newaré japi ma nulá Onorúami Gobiérnowala. Ata newa noká japi ta bichiwi echi, japalí ta nawesa alí ti ke riwé simía napawíliwachi.
Piri mi animea
¿Piri ikili japalí ma simírili siete tiempos japi ruyé echi libro de Daniel?
¿Chúsiá mi bichiwi japi echi Onorúami Gobiérnowala chotásili nulayá 1914?
¿Chúriká mi newa isima japi mi bichiwi japi echi Onorúami Gobiérnowala ma nulá?
JITI MI CHE BINEMA
Leeri japi aní jaré historiadores alí jarecho we machíami, japi chúriká ju 1914 jonsa.
“Japalí jonsa chotásili we cha nokayá” (¡Busuréwiami!, abril 2007)
Leeri chúriká iʼwírili bilé rijoi japi aní Mateo 24:14 jiti Onorúami nijéwima.
¿Chúriká ta machí japi echi profecía japi aní Daniel capítulo 4 raʼicha Onorúami Gobiérnowala jitra?
¿Chúriká ta machí japi echi “siete tiempos” japi raʼicha capítulo 4 de Daniel sunili bamíali 1914?
a Jenaʼí binelíwami japoná aní “Jiti mi che binema” leeri echi okuá artículos japi upá uchuwi.
-
-
Piri isima echi Onorúami Gobiérnowala¡We mi kanílika bitélima sinibí! Biné japi aní echi Biblia
-
-
BINELÍWAMI 33
Piri isima echi Onorúami Gobiérnowala
Echi Onorúami Gobiérnowala ma nulá. Ma mulipi echi ko isima wiká namuti aʼláala jenaʼí Wichimóbachi. Ma inepo chu iyiri ju echi namuti japi isima alí japi mi kanila buwema.
1. ¿Piri isima echi Onorúami Gobiérnowala jiti kilí pirélipo jenaʼí Wichimóbachi?
Jesús, japi silíami ju echoná Onorúami Gobiérnowala, suwábima echi pagótami cha nokáami alí echi gobiernos echoná Armagedón (Apocalipsis 16:14, 16). Echalí ko ma ikimea japi riká aní echi Biblia: “Ma kéʼayó, echi japi chati nokáami ju ko ma ke pirélima” (Salmo 37:10). Echoná Onorúami Gobiérnowala, Jesús ko aʼlá wachínika nulama alí isima japi sinéami we kilí pirélima jenaʼí Wichimóbachi (leeri Isaías 11:4).
2. ¿Chúriká pirélipo ma nulasa echi Onorúami Gobiérnowala jenaʼí Wichimóbachi?
Japalí ma nulasa echi Onorúami Gobiérnowala, “echi japi aʼlá nokáami ju ko kawí iyárami nima, alí sinibí pirélima echoná” (Salmo 37:29). Natá chúriká pirélipo japalí sinéami pagótami we aʼlá nokáami nisa, galesa Jeobá alí ayénachó anakupi niraa, ¡echalí we simá riwélima! Ke wesi nayuma alí sinéami sinibí pirélima.
3. Ma suwábisa echi cha nokáami, ¿piri isima echi Onorúami Gobiérnowala?
Ma suwábisa echi pagótami cha nokáami, Jesús silíami nima 1,000 bamíali. Echalí Jesús alí echi 144,000 japi echi yúa nulama, iʼwírima echi pagótami jiti aʼlá sébali nokáami nima. Ma sunisa echi 1,000 bamíali omáana jenaʼí Wichimóbachi ma simá rikáachi nima alí echi pagótami we kanila pirélima jiti nijéwami ju japi Jeobá nulá. Echalí jonsa ko, Jeobá nalí ku nulama. Alí ma ke bilé cha riká raʼichama Onorúami riwalá jitra (Mateo 6:9, 10). Sinéami machimea japi Jeobá we aʼlá nuláami ju alí japi we aʼlá tibú echi puéblowala. Pe aminana ko, Jeobá miʼlimea Satanás, echi demonios alí sinéami japi ke nakí japi echi nulema (Apocalipsis 20:7-10). Suwaba echi namuti aʼláala japi isima echi Onorúami Gobiérnowala sinibí rojorama.
AMINABI NATABO JAPI TA BINÉ
Ma binepo chúsiá ta bichíwisaré japi Onorúami néeka echi Gobiérnowala isima suwaba echi namuti japi riká ma anili echoná Biblia.
4. Echi Onorúami Gobiérnowala suwábima echi gobiernos jenaʼí Wichimóbachi nirúami
“Echi pagótami risoa nili japalí echi rijoi silíami nisa” (Eclesiastés 8:9). Echi Gobiérnowala jitra Jeobá ko isima japi ke bilé pagótami risoa nílima.
Leérisi Daniel 2:44 alí 2 Tesalonisenses 1:6-8, alí raʼichasi jepuná jitra:
Jeobá alí Jesús, ¿chu olama echi gobiernos jenaʼí Wichimóbachi nirúami alí japi echi iʼwiri?
Japi riká mi ma bineli Jeobá alí Jesús jitra, ¿chúsiá mi bichiwi japi echi ko we aʼlá nulema sinéami pagótami alí najórika?
5. Jesús we aʼlá silíami ju
Japi riká silíami, Jesús ko isima wiká namuti aʼláala iʼwírimia echi pagótami jenaʼí Wichimóbachi piréami. Inesi echi VIDEO jiti mi checho newalama japi chúriká newa isili Jesús japi iʼwírinali echi pagótami alí japi Onorúami iyali echi jiwérala jiti omérima echi riká isiá.
Echi namuti japi isili Jesús japalí jenaʼí Wichimóbachi biteili, néwariwélitili japi isima echi Gobierno. Echi namuti aʼláala japi aní echi Biblia, ¿chu iyiri nalí mi we kanílisa nili japi ikimea? Leérisi suwaba textos japoná ruyé echi namuti japi ikimea.
JAPALÍ BITEILI JENAʼÍ KAWICHÍ, JESÚS KO...
RIPÁ RIWIGACHI JONSA, JESÚS KO...
... ku kilí wilábali echi iká alí jarecho si namuti (Marcos 4:36-41)
... we simá rikáachi niwama jenaʼí Wichimóbachi (Isaías 35:1, 2)
... kóʼali wiká miles pagótami (Mateo 14:17-21)
... isima japi wiká koʼwáami nirúlima omáana Wichimóbachi (Salmo 72:16)
... ku saʼweli echi nayúkiami (Lucas 18:35-43)
... isima japi ma ke wesi nayuma (Isaías 33:24)
... ku owíntili jaré pagótami (Lucas 8:49-55)
... isima japi ma ke wesi suwimea (Apocalipsis 21:3, 4)
6. Echi Onorúami Gobiérnowala isima japi ta we kanílika pirélipo pe aminana
Echi Onorúami Gobiérnowala isima japi echi pagótami we kanila pirélima japi riká nakili Jeobá ne chokichí jonsa. Sinibí pirélima echoná kawichí we baʼóachi. Jiti ta machiboa chúriká Jeobá néeka echi Jesús isima wiká namuti aʼláala jenaʼí Wichimóbachi inesi echi VIDEO.
Leérisi Salmo 145:16 alí raʼichasi jepuná jitra:
¿Chumi nili machiyá japi Jeobá iyama ibili niraa japi newalé?
JAPI ANÍ JARÉ PAGÓTAMI: “Sinéami ta napawika nakúurisaká jiti ke nirúlima chati namuti a ti we aʼlá pirélipo”.
¿Chu iyiri chati namuti ke omeri kariwea echi gobiernos jenaʼí nirúami alí japi echi Onorúami Gobiérnowala ko a omérima?
JAPI MI BINELI
Echi Onorúami Gobiérnowala isima japi jenaʼí Wichimóbachi we baʼóami nima, echi pagótami aʼláala sinibí pirélima alí Jeobá bi nijéwima.
Piri mi animea
¿Piri isima echi Onorúami Gobiérnowala jiti ma ke bilé cha riká raʼichama Jeobá riwalá jitra?
¿Chúsiá ti bichiwi japi echi Onorúami Gobiérnowala isima japi riká Jeobá aní echoná Bíbliachi?
Echi namuti aʼláala japi isima echi Onorúami Gobiérnowala, ¿chu iyiri nalí mi we kanílisa nili japi echi riká ikimea?
JITI MI CHE BINEMA
Biné piri ju echi Armagedón.
Biné piri namuti ikimea echalí ma gran tribulación kaachi japi anili Jesús (Mateo 24:21, TNM).
“¿Piri ju echi gran tribulación?” (Oselí japi nirú echoná jw.org)
Iné chúriká echi wénwala alí kúchuwala omeri natia chúriká nima ma nulasa Onorúami Gobiérnowala jenaʼí kawichí.
Leeri echi biografía “Ani machinalie chúsiá wiká chati namuti ikí” alí iné chúriká bilé rijoi japi sayérili echi gobiernos, riwali japi machinalie echoná Biblia.
“Binesa echi Biblia jipi ko we kaníliami ju” (Echi Nawésami, 1 inárachi enero 2012)
-