BINELÍWAMI 20
Chúriká nocháliwa echoná congregación
Jeobá ko nakí japi suwaba aʼlárika nima (1 Corintios 14:33). Jiti la echi puéblowala echi riká cho nísaré. ¿Chúriká nocha echi congregación cristiana? ¿Chúriká ti nokiboa jiti suwaba aʼlárika nima?
1. ¿Jépuká ju japi nulá echoná congregación cristiana?
Cristo ju japi nulá echoná congregación (Efesios 5:23). Ripá jonsa Jesús ko nulá japi nokisáré echi Onorúami puéblowala omáana Wichimóbachi. Echi ko wilali echi pioni aʼlá nijéwami alí aʼlá nátaka nóchami: echi ko ju pe kuabi ancianos we machíami alí japi ayénachó anéliwa Japi Aʼlá Niseri (leeri Mateo 24:45-47). Japi riká nokali echi apóstoles alí ancianos echomí Jerusalén bachá siglo, echi Japi Aʼlá Niseri ayénachó nulé echi congregaciones omáana Wichimóbachi nirúami (Hechos 15:2). Nalí jepuná ko ke aniwáami ju japi weli nuláami ju jenaʼí congregaciones. Echi Japi Aʼlá Niseri, nijewi japi Jeobá nulá echoná Biblia alí ayénachó Jesús.
2. ¿Piri nóchali noká echi ancianos?
Echi ancianos ko we machíami ju, we aʼlá bineri néeka echi Biblia, we aʼlá iʼwiri alí iʼwérili iyá echi hermanos echoná congregación. Echi ko ke me winomí echi nóchali jitra japi noká alí ke “nulérami niráa” nocha, nalí “sinibí wabé kaníliga” (1 Pedro 5:1, 2). Echi ancianos ayénachó olá nakúurami rijoi, japi nokisáré jaré namuti jiti pe aminana ayénachó ancianos nima.
Echi Japi Aʼlá Niseri ayénachó jawa jaré ancianos jiti nima superintendentes de circuito. Jepuná hermanos ko simía echoná congregaciones iʼwírimia alí jiwérili iyamia echi hermanos. Ayénachó echi ko iné achi echi hermanos noká japi riká aní echi Biblia jiti omérima nochia japi riká ancianos alí nakúurami rijoi (1 Timoteo 3:1-10, 12; Tito 1:5-9).
3. ¿Piri nóchali noká ibili Testigo?
Sinéami echoná congregación walubéala ané Jeobá riwalá japalí comentarios nijí echoná napawíliwachi alí japalí iʼwérili noká nawesia (leeri Salmo 148:12, 13).
AMINABI NATABO JAPI TA BINÉ
Inepo chúsiá Jesús we aʼlá nuláami ju, chúriká echi ancianos noká japi riká echi alí chúriká ti omero nijewia Jesús alí echi ancianos.
4. Jesús ko we aʼlá nuláami ju
Jesús ko simárika raʼíchika tamó bayé jiti echi nóchilipo. Leérisi Mateo 11:28-30 alí raʼichasi jepuná jitra:
¿Chu yiri nuláami ju Jesús alí chúsiá echi riká ju?
¿Chúriká noká echi ancianos japi riká Jesús? Inesi echi VIDEO.
Echi Biblia aʼlá ruyé chúriká nokisáré echi nóchali echi ancianos.
Leérisi Isaías 32:2 alí 1 Pedro 5:1-3, alí raʼichasi jepuná jitra:
Jesús ko sinibí iʼwírili jarecho, ¿chumi nili machiyá japi echi ancianos iʼwérili noká echi riká cho nokayá?
¿Chu iyiri jarecho namuti noká echi ancianos japi riká Jesús?
5. Echi ancianos noká japi riká bineri
¿Chúriká nakí Jesús japi echi ancianos inema echi nóchali japi noká? Inesi echi VIDEO.
Jesús ko we aʼlá ruyeli japi chúriká nísaré echi hermanos japi nuláami ju echoná congregación. Leérisi Mateo 23:8-12 alí raʼichasi jepuná jitra:
Japi riká aní echi Biblia, ¿chúriká nísaré echi ancianos? ¿Achi mi mayé japi echi sacerdotes alí jarecho si, noká japi riká aní echi Biblia?
Echi ancianos iʼwérili noká Jeobá amígowala niya alí ayénachó iʼwiri echi téemala jiti echi riká cho nokimea.
Echi ancianos we natéami niraa iné sinéami hermanos echoná congregación.
Echi ancianos iʼwérili noká nawesia.
Echi ancianos we aʼlá binériami ju. Ayénachó iʼwiri jiti simárika wilimea japoná ti napawí alí jarecho si namuti noká.
6. Ata nijewi echi ancianos
Echoná Biblia aní chúsiá we natéami ju japi ta nijéwipo echi ancianos. Leérisi Hebreos 13:17 alí raʼichasi jepuná jitra:
¿Chúsiá echi Biblia aní japi ta riwíwipo alí nijéwipo echi wéala? ¿Ami mayé japi aʼlá ju japi echi riká nokiboa? ¿Chúsiá?
Leérisi Lucas 16:10 alí raʼichasi jepuná jitra:
¿Chúsiá we natéami ju japi ta nijéwipo echi ancianos tákoré japi echi nulá ata mayé japi ke me natéami ju?
JAPI ANÍ JARÉ PAGÓTAMI: “Ke natéami ju japi ta napawipo jarecho yúa jiti nijéwipo Onorúami”.
¿Chúsiá aʼlá ju japi ta napawika nijéwipo Onorúami echi congregación yúa?
JAPI MI BINELI
Jesús ju japi nulá echoná congregaciones. Echi ancianos ko nijewi japi echi aní, alí tamujé ko noká japi riká aní echi ancianos jiti echi ko tamujé tibú alí tamujé bineri.
Piri mi animea
¿Jépuká ju japi nulá echoná congregación cristiana?
¿Chúriká noká echi ancianos iʼwiria echi hermanos echoná congregación?
¿Chu iyiri nóchali noká ibili testigo Jeobá?
JITI MI CHE BINEMA
Iné chúriká newa noká echi Japi Aʼlá Niseri alí jarecho ancianos, japi we galé alí iʼwiri echi hermanos.
Ami machimea chu iyiri nóchali noká echi superintendentes de circuito.
Leeri chu iyiri nóchali noká echi umukí echoná congregación.
“¿Achi echi testigo Jeobá iyá bilé nóchali echi umukí?” (Echi Nawésami, 1 inárachi septiembre 2012)
Ami machimea chúriká echi ancianos iʼwérili noká iʼwiria echi hermanos.
“Echi ancianos tamó iʼwiri jiti kanílika nochabo” (Echi Nawésami, 15 inárachi enero 2013)