BINELÍWAMI 50
¿Piri nokisáré echi niwíkami alí kúchuwala jiti kaníliami nima?
Echi kuuchi ko bilé chiliwéliami ju japi Jeobá nijili. Alí Jeobá ko nakí japi echi wénwala aʼlá tibuma echi chiliwéliami, jiti bela iyá aʼlá busuréliami jiti aʼlá binérima echi kuuchi. Nalí ayénachó iyá busuréliami echi kuuchi jiti sinéami kanila pirélima.
1. ¿Piri busuréliami iyá Jeobá japi kúchuwami ju?
Jeobá ko nakí japi echi wénwala we galema echi kúchuwala, japi iʼwérili nokimea yúa raʼichia alí japi napawika kanila simárima. Ayénachó nakí japi we aʼlá tibuma jiti ke namú ikimea alí japi binérima japi riká aní echi Biblia (Proverbios 1:8). Onorúami ko ané echi wénwala chúriká nokimea echi kúchuwala yúa: “Aminabi ochératasi busuréwika japi riká Jeobá aní” (leeri Efesios 6:4, TNM). Jeobá ko we kanili inea japalí echi wénwala weeli echi kúchuwala japi riká echi nulá echoná Biblia alí japalí echi wénwala ke riwé japi jarecho wéelima echi kúchuwala.
2. ¿Piri busuréliami iyá Jeobá echi kuuchi?
Jeobá ko ané echi kuuchi: “Galá nijéwasi ʼyemi ʼwénawala” (leeri Colosenses 3:20). Echi towí alí tiwé riwíwisaká alí nijéwisaká echi wénwala, we kanílitima echi alí ayénachó Jeobá (Proverbios 23:22-25). Jesús ko we aʼlá towí nili; tákoré echi ko sébali aʼlá isíami nili, echi ko a nijéwili alí riwíwili echi wénwala japi ke sébali aʼlá nokáami nili (Lucas 2:51, 52).
3. ¿Piri nokisáré echi wénwala alí echi kúchuwala jiti mulíwima Jeobá?
Ami kúchuwami nísaká, ami nakiyéeré japi echi we galema Jeobá japi riká mujé. ¿Chúriká mi isima jiti mujé kúchuwala we galema Jeobá? Nijéwisaré jepuná busuréliami: “Binérisaré [echi Onorúami Raʼicháala] mujé kúchuwala alí echi jitra mi raʼichama japalí mi bitichí ku atí, japalí mi biléana iyena, japalí mi ku boʼisá alí japalí mi ku wilisa” (Deuteronomio 6:7). Alí mujé ko ma machiyéeré japi mi wisabé niraa anésaré mujé kúchuwala jiti ke wikawama japi mi ané. Echi texto ko aniwáami ju japi mi ke riwésaré bilé rawé simíriami raʼichia Jeobá jitra mujé kúchuwala. Ayénachó aʼlá ju japi echi wénwala sinibí tarali binema echi kúchuwala yúa echi Biblia jitra. Alí tákoré ke mi kúchuwami ju, ami binésaká echi Biblia sinibí tarali we mi iʼwírima.
AMINABI NATABO JAPI TA BINÉ
Inepo jaré we aʼlá busuréliami japi iʼwírima echi wénwala alí echi kúchuwala jiti kilí alí kanílika pirélima.
4. We galeka bineri mujé kúchuwala
Bineria echi kuuchi a jilí nímiré. Nalí, ¿chúriká mi iʼwírima japi aní echi Biblia? Leérisi Santiago 1:19, 20 alí raʼichasi jepuná jitra:
¿Chúriká newa nokimea echi wénwala japi we galé echi kúchuwala japalí echi yúa raʼicha?
¿Chúsiá echi wénwala ke raʼámisaré echi kúchuwala japalí iyoa muchuwi?a
5. Tibú mujé kúchuwala
Jiti mi we aʼlá tibuma mujé kúchuwala we natéami ju japi mi echi yúa raʼichama echi nasawíliami jitra. Nalí, ami riwela nílimiré raʼichia echi jitra. Inesi echi VIDEO alí raʼichasi jepuná jitra:
¿Chúsiá jilí niraa jaré wénwala raʼichia echi kúchuwala yúa echi nasawíliami jitra?
¿Piri namuti iʼwírili echi wénwala jiti omérima raʼichia echi namuti jitra echi kúchuwala yúa?
Japi riká ma anili echoná Biblia, jenaʼí Wichimóbachi japoná Satanás nulá, aminabi we cha ikimea riweili. Leérisi 2 Timoteo 3:1, 13 alí raʼichasi jepuná jitra:
Jaré echi chati pagótami japi aní echi versículo 13 tábiami ju echi kuuchi. Jiti la, ¿chúsiá we natéami ju japi echi wénwala binérima echi kúchuwala echi nasawíliami jitra? Alí, ¿piri nokisáré tibumia jiti ke cha olárami nima?
¿Ami machiyé?
Echi testigo Jeobá niwá wiká oselí alí videos japi iʼwiri echi wénwala jiti binérima echi kúchuwala echi nasawíliami jitra alí tibuma echi pagótami jitra japi tábiami ju. Jepuná ju jaré:
Aʼlá tibusi emi kúchuwala (video)
“Chúriká mi raʼichama mujé ranala yúa echi nasawíliami jitra” (¡Busuréwiami!, núm. 5 2016)
6. Riwiwi mujé wénwala
Echi kuuchi alí kúruwi riwíwisaré echi wénwala alí newa nokisáré japi a riwiwi japalí echi yúa raʼicha. Inesi echi VIDEO alí raʼichasi jepuná jitra:
¿Chúsiá we natéami ju japi echi remalí riwíwika raʼichama echi wénwala yúa?
¿Chúriká néwariwélitima bilé remalí japi riwiwi echi wénwala?
Leérisi Proverbios 1:8 alí raʼichasi jepuná jitra:
¿Piri isísaré bilé remalí japalí echi onolá o echi iyela ané japi isísaré?
7. Napawika binesi Jeobá jitra echoná bitichí
Echi testigo Jeobá iʼwérili noká binea echi kúchuwala yúa echi Biblia jitra sinibí tarali. Alí, ¿chúriká noká? Inesi echi VIDEO alí raʼichasi jepuná jitra:
¿Chúriká timí omérima nokayá jiti sinibí tarali napawika binema Jeobá jitra echoná bitichí?
¿Chúriká omérima nokayá echi wénwala jiti binea Jeobá jitra echoná bitichí we aʼlárika nima alí sinéami kanílima? (Iné echi foto bachá chukúami jena binelíwami).
Alí mujé ru, ¿achi nirú bilé namuti japi isimí japi mi jilí nirama binea Jeobá jitra echoná bitichí? ¿Chu iyiri ju?
Chabéi Jeobá ko aneli echi israelitas japi sinibí raʼichásaré echi Onorúami Raʼicháala jitra echi téemala yúa. Leérisi Deuteronomio 6:6, 7 alí raʼichasi jepuná jitra:
Mujé, ¿chúriká mi nijéwima jepuná busuréliami?
Japi timí omeri napawika binea echoná bitichí:
Binesi japi binepo echoná napawíliwachi.
Leérisi alí raʼichasi bilé ejemplo jitra japi uchuwi echoná Biblia alí iʼwírima sinéami téemala.
Ami kuuchi kúchuwami nísaká, descargari o imprimiri echi dibujos o jarecho si namuti japi nirú echoná jw.org japi nokimea echi kuuchi.
Ami olásaká kuuchi japi ma weli pee ju, aa bilé artículo echoná jw.org japoná aní “Kúruwi alí iwé”.
Nokisí alí napachasi japi riká aní bilé historia japi chukú echoná Biblia.
Inesi bilé video echoná jw.org alí raʼichasi echi jitra.
JAPI ANÍ JARÉ PAGÓTAMI: “Echi kuuchi kecho bijí aʼlá inami japi aní echi Biblia jiti we jilí ju japi echi inámima”.
Mujé ko, ¿piri mi nata?
JAPI MI BINELI
Jeobá ko nakí japi echi wénwala we galema echi kúchuwala, binérima alí tibuma; alí nakí japi echi kuuchi riwíwima alí nijéwima echi wénwala, alí japi sinéami napawika nijéwima echi.
Piri mi animea
¿Chúriká omero echi wénwala bineria alí tibúa echi kúchuwala?
¿Chúriká néwariwélitima echi kúchuwala japi riwiwi echi wénwala?
¿Chúsiá we aʼlá ju japi echi niwíkami alí kúchuwala napawika binema echi Biblia jitra sinibí tarali?
JITI MI CHE BINEMA
¿Piri namuti iʼwírima echi kuuchi jiti we aʼlá pirélima japalí ma ochérisa?
“Usani namuti we natéami japi iʼwírima mujé kúchuwala” (¡Busuréwiami!, núm. 2 2019)
Leeri jaré busuréliami we natéami japi iʼwírima echi japi tibú echi japi ma ochérami ju.
Iné chúriká bilé rijoi we aʼlá binérili echi kúchuwala tákoré ne kulí ko ke machili chúriká isima.
Leeri chúriká bilé onolá omero muliwia echi kúchuwala yúa.
“¿Chúriká isima bilé onolá jiti mulíwima echi kúchuwala?” (Echi Nawésami, 1 inárachi noviembre 2011)
a Japalí echi Biblia aní japi echi wénwala raʼámisaré echi kúchuwala, echi ko aniwáami ju japi binérisaré alí anema piri namuti ke aʼlá nokali. Alí ke aniwáami ju japi risoa olama alí cha riká raʼíchima (Proverbios 4:1).