Jeobá omeri tamó iʼwiria jiti ne bichíwali kaníliami nipo

1, 2. a) ¿Chu inili wiká pagótami jipi rawé? b) ¿Piri binepo jenaʼí binelíwami?

JIPI rawé echi pagótami we iʼwérili noká kaníliami niya. Nalí tákoré echi riká noká, ke ne bichíwali kaníliami ju alí wiká pagótami we omona nili. Alí a keʼré japi jaré japi Jeobá nijéwami ju echi riká cho inili. Jiti ta “waminánomí rawé” piré, ata ikí wiká namuti we jilírami japi isimí japi ta we omona alí risoa nílipo (2 Tim. 3:1).

² Jenaʼí binelíwami binepo piri namuti isímiré japi ta ma ke kanílipo alí piri ta omeri nokayá jiti ku kanílipo. Nalí ati bachá inepo jépuká ju japi omeri tamó iʼwiria jiti ne bichíwali kaníliami nipo.

JÉPUKÁ OMERI TAMÓ IʼWIRIA JITI NE BICHÍWALI KANÍLIAMI NIPO

3. ¿Piri ta biné Jeobá jitra ineka echi namuti japi niwali? (Ayénachó iné echi imágenes).

³ Jeobá ko sinibí kaníliami ju alí nakí japi tamujé ayénachó kaníliami nipo. Jiti la echi ko niwali wiká namuti japi tamó kaníliti, japi riká echi Wichimoba japi we baʼóami ju, wiká sinúrika colores, we raʼíami koʼwáami alí namuti jákami japi riʼeka tamó achirti. ¡Jeobá ko ne bichíwali tamó galé alí nakí japi ta we kanílika pirélipo!

Taa elefante: Image © Romi Gamit/Shutterstock; kuuchi pingüinos: Vladimir Seliverstov/500px via Getty Images; kuuchi chivitos: Rita Kochmarjova/stock.adobe.com; okuá delfines: georgeclerk/E+ via Getty Images

4. a) ¿Chúsiá Jeobá we kaníliami ju tákoré we aʼlá machí japi echi pagótami we risoa nilia piré? b) ¿Chúriká tamó iʼwiri Jeobá? (Salmo 16:11).

⁴ Jeobá ko we aʼlá machí japi echi pagótami we risoa nilia piré alí we omona nili echi jitra. We be nalí, echi Biblia aní japi echi ko ju bilé Onorúami we kaníliami (1 Tim. 1:11). Nalí, ¿chúsiá Jeobá ke riwé kaníliami niya? Jiti echi ko we aʼlá machí japi ma mulipi suwábima echi risoa níliwami, alí ma anili echi rawé japalí echi riká isima. Nalí kecho séachi echalí rawé, echi ko we natéami niraa iné chuti inili alí japalí ti omona o risoa nili, echi ko tamó iʼwiri jiti ku kanílipo (leeri Salmo 16:11). Ma inepo chúriká echi riká isili binoy Nolá yúa, Jesús.

5, 6. ¿Chúsiá Jesús we kaníliami ju?

⁵ Jesús ju echi pagótami wabé kaníliami japi Jeobá niwali. ¿Chúsiá? Ma inepo okuá namuti. 1) Jiti echi ko “chopi a yiri ju echi Walubela Riosi Onorúami yuwa” alí sébali aʼlá isíami ju japi riká echi binoy Onolá Jeobá (Col. 1:15; 1 Tim. 6:15). 2) Jiti wiká bamíali asali Jeobá yúa, echi bilepi japi omeri tamó iʼwiria ne bichíwali kaníliami niya.

⁶ Ayénachó, Jesús we kaníliami ju jiti sinibí isimí japi echi Onolá nakí japi echi isima (Prov. 8:30, 31; Juan 8:29). Jiti echi ko we nijéwami ju, Jeobá ko we kanila atí echi yúa (Mat. 3:17).

7. ¿Piri ta nokisáré jiti ne bichíwali kaníliami nipo?

⁷ Tamujé ayénachó ne bichíwali kaníliami nipo, ati aminabi mulíwisaká Jeobá. Japalí ti aminabi biné piri nata alí chu inili Jeobá, ati omeri aminabi nokayá japi riká echi, alí jepuná isimí japi wabé kaníliami nipo. Ayénachó nokayá japi riká Jeobá nakí alí machiyá japi echi ko we kanila atí tamujé yúa, tamó iʼwiri wabé kaníliami niya (Sal. 33:12).a Nalí tákoré echi riká ju, isini kaachi ke ti kanila níliporé. ¿Achi aniwáami ju jepuná japi Jeobá ke kanila atí tamujé yúa? ¡Ke tasi! Jeobá ko aʼlá inami japi ta ke sébali aʼlá nokáami ju alí japi isini kaachi ati omona alí risoa nili (Sal. 103:14). Jipi ko binepo piri namuti isímiré japi ta ma ke kanílipo alí piri ta omeri nokayá jiti ku kanílipo.

TIBUKA NOKIBOA ECHI NAMUTI JITRA JAPI ISÍMIRÉ JAPI TA MA KE KANÍLIPO

8. ¿Chuti iníliporé japalí ti ikí namuti jilírami?

⁸ Japalí ti ikí namuti jilírami. A keʼré japi ta risoa nili jiti ta najátarami ju, jiti cha ikili japoná ti piré o jiti ta risóati ju, nayúami o ma ochérami. Jepuná namuti isímiré japi ta ma ke kanílipo, alí wabé japalí ti ke omeri nokayá japi sinúrika ku nima. Echi Biblia aní japalí ti wabé omona nili, ati iníliporé japi ta ma ke siné oméripo ku kanilia (Prov. 15:13). Ma inepo japi ikili bilé anciano. Echi rejimala alí echi wénwala suwili pe naó bamíali simíriachi, alí echi ko ruyé chu inilie kecho suwíachi echi: “Ani bineli ka nilie alí japi ke bilé omerie tamí iʼwiria. We ni omona nilie jiti tákoré ni wabé asinalie nijé wénwala yúa alí rejimala kecho suwíachi echi, ke ni omerie jiti ni wiká namuti jilírami ikiyé”. Echi riká cho, isini kaachi echi namuti jilírami japi ta ikí, omeri isiá japi ta we risiyá nílipo alí we siwea nílipo.

9. ¿Piri ta omeri nokayá jiti ku kanílipo? (Jeremías 29:4-7, 10).

⁹ ¿Piri ta omeri nokayá jiti ku kanílipo? Ata ku kanílipo ata riwésaká wisabé niraa natia echi namuti jilírami japi ta ikí alí japi ta ke omeri nokayá japi sinúrika ku nima, alí ti matétara nijíami nísaká echi namuti jitra japi ta olá. Echi Biblia ruyé japi tákoré ti jilírami namuti ikí, a ti omeri kaníliami niya. Japi riká, Jeobá ko aneli echi judíos japi torúami nili echoná Babilonia, japi iʼwérili nokimea kanila pirea echoná (leeri Jeremías 29:4-7, 10). ¿Piri ta biné? Japi ta iʼwérili nokisáré inea echi aʼláala namuti japi ta olá alí matétara nijíami niya echi jitra. Ayénachó ti newalásaré japi Jeobá ke siné tamó awénili riwema alí tamó iʼwírima (Sal. 63:7; 146:5). Bilé hermana Efi riwéami, japi ikili bilé namuti we chati alí ma ke omeri iyenia, jéaní: “Jeobá, nijé téemala alí echi hermanos echoná congregación we tamí iʼwírili alí iʼwérili iyali. Ani néwariwélitinali japi ni waʼlú matétara iyá echi, jiti la ni iʼwérili isimí sinibí kaníliami niya”.

10. ¿Chúsiá ti ke riwé kaníliami niya tákoré ti ikí namuti we jilírami?

¹⁰ Tákoré ti ikí namuti we jilírami o tamujé téemala, a ti omeri kaníliami niya (Sal. 126:5).b ¿Chúsiá? Jiti echi namuti japi ta ikí, ke isimí japi ta ne bichíwali kaníliami nipo. Bilé precursora María riwéami jéaní: “Japalí ti ikí namuti jilírami, ke ti riwé kaníliami niya jiti ta sinibí newalá japi Jeobá isima. Jepuná ko ke aniwáami ju japi ta ke omero nalayá o aniyá japi ta inili. Nalí tamujé Onolá tamó iʼwiri aminabi kaníliami niya tákoré ti ikiyé chuwé namuti jilírami”. Newalabo japi tákoré jipi rawé we jilí ju, ma mulipi ma ke echi riká nima, jiti Jeobá suwábima suwaba echi namuti japi tamó omonari alí risoa níliti.

11. ¿Chúriká mi iʼwiri natia japi ikili echi apóstol Pablo?

¹¹ Isini kaachi ati natáboré japi ta ikí namuti jilírami jiti Jeobá ma ke kanila atí tamujé yúa. Echi riká ti ikiyáaká, bilé namuti japi tamó iʼwírima ko ju, natia japi ikili jaré pagótami chabé piréami japi Jeobá nijéwami nili alí japi ikili namuti we jilírami. Japi riká echi apóstol Pablo. Jesús ko iyali bilé nóchali we natéami: nawesia echi raʼíchali aʼláala echi pagótami wikaná piréami, ayénachó echi isélikami alí echi judíos (Hech. 9:15). Nalí tákoré iyáari echi nóchali, Pablo ko ikili wiká namuti we jilírami (2 Cor. 11:23-27, TNM). ¿Achi aniwáami ju jepuná japi Onorúami ma ke kanili echi yúa? ¡Ke tasi! Pablo ko anáchili suwaba echi namuti jilírami jiti Jeobá echi yúa asali alí iʼwírili echi (Rom. 5:3-5, TNM). Jipi ko natá japi mi ikí. Tákoré mi ikí namuti jilírami, mujé ko ke riwé nóchilia Jeobá. Jiti la mi omeri bichiwia japi Jeobá we kanila atí mi yúa.

12. ¿Chúsiá ti ke kaníliami nipo japalí ta ke omeri nokayá echi namuti japi ta nokinali aminabi nóchilimia Jeobá?

¹² Japalí ti ke omeri nokayá bilé namuti aminabi nóchilimia Jeobá (Prov. 13:12). Sinéami tamujé we galé Jeobá alí ti matétara iyánali suwaba echi namuti jitra japi tamó iyá, jiti la ti sinibí nata piri ta omeri nokayá aminabi nóchilimia echi. Nalí be, ati olánalaká bilé asignación japi jipi ta ke omero nokayá, a keʼré japi ta siwea nílipo (Prov. 17:22). Bilé precursora Holly riwéami ruyé: “Ani siminalie echoná Escuela japi biné echi Nawésami Raʼíchali Kalabé, nawesia biléanachó país o iʼwiria nochia niwayá echi kulíwami edificios echoná Betel echomí Estados Unidos. Nalí ani ikili namuti japi ni ke buweli alí ma ni ke bilé namuti omériki isiá japi ni isínalie. Jiti la ni we omona níliki. Japalí ti nokinali bilé namuti alí ti ke omeri echi riká nokayá, we ti omona nili”. Wiká hermanos echi riká cho ikí.

13. ¿Piri ta nokisáré ke ti omériaká nokayá echi namuti japi ta nokinali nóchilimia Jeobá?

¹³ ¿Piri ta omeri nokayá jiti ku kanílipo? Ata newalásaré japi Jeobá ke siné tamó tani namuti japi ta ke omeri nokayá. Echi ko we natéami niraa tamó iné jiti ta olá we aʼláala cualidades alí ke ko echi asignaciones jitra japi ta naré. Jeobá ko wabé natéami niraa iné japi ta nata alí japi ta inili, alí ke ko japi ta omeri nokayá. Alí nakí japi ta ke niráami nipo alí sinibí nijéwami nipo (Miq. 6:8; 1 Cor. 4:2). Jiti la, echi ko ke buwé japi ta nokiboa namuti japi ta ke omeri nokayá.c Nalí, ¿piri ta nokisáré ke ti omériaká nokayá echi namuti japi ta nokinali nóchilimia Jeobá? Ati natásaré echi namuti japi ta a omeri nokayá. Japi riká, ati omeri bineria echi remalí jiti aminabi nóchilima Jeobá alí iʼwiria echi hermanos japi ma ochérami ju. Ayénachó ti omeri iʼwérili iyayá bilé, simíaka echi bitélachi, teléfono néeka o mensajes niraa. Jeobá ko we kanili japalí ti noká echi nóchali japi ta a omeri, alí tamó iʼwírima jiti kaníliami nipo. Alí newalabo japi echoná Wichimóbachi baʼóachi, ati oméripo nokayá wabé wiká namuti Jeobá jitra. Holly, japi ta ma raʼíchili echi jitra, aní: “Japalí ni siwea nili, ani kilí niraa nata japi ni ma mulipi sinibí bitélima. Alí ma ni machí jaré namuti japi ni isima Jeobá jitra echoná Wichimóbachi baʼóachi, alí echi ko tamí iʼwírima echi riká isiá”.

14. ¿Piri bilecho namuti omeri isiá japi ta ke kanílipo?

¹⁴ Japalí ti aboi bi jitra nata alí echi namuti japi ta nakí. Jaré ko nee echi redes sociales tamó natárimia japi ta kaníliami nipo ati basalówisaká, wiká namuti ralisáaká, ati nokisáaká echi namuti japi ta nokinali alí ti olásaká suwaba namuti japi ta olánali. A bichíwali ju japi ke chati ju japi nokiboa echi namuti japi tamó kaníliti jiti Jeobá echi riká tamó niwali. We be nalí, wiká pagótami ineli japi ke ne bichíwali kaníliami nili japalí nokali echi namuti. Bilé precursora Eva riwéami aní: “Japalí mi binoy bi jitra nata alí echi namuti japi mi nakí, mujé ko ke siné kaníliami ju alí mi aminabi wiká namuti nakí”. Nokayá jepuná isimí japi ta omona nílipo alí ke kanílipo.

15. ¿Piri ta biné echi silíami Salomón jitra?

¹⁵ Jipi ko binepo japi ikili echi silíami Salomón. Echi ko isili alí olali suwaba namuti japi nakili jiti kaníliami nínalie. Japi riká, echi ko sinibí we raʼíami koʼwáami koʼali, kipuli we semati simelíwami alí ralali wiká namuti we natéami. Nalí suwaba echi namuti ke iʼwírili jiti kaníliami nima. Echi ko anili: “Echi busila ke kanili echi bi jitra japi iné alí echi nakala ke cho kanili echi bi jitra japi kipú” (Ecl. 1:8; 2:1-11). Wiká pagótami nata japi kaníliami nima a olásaká wiká winomí alí nokisáaká japi echi nokinali. Nalí jepuná ko ke bichíwali ju, echi namuti ke siné tamó iʼwírima ne bichíwali kaníliami niya.

16. ¿Chúsiá ti kaníliami nipo ati iʼwírisaká jarecho? (Ayénachó iné echi fotos).

¹⁶ ¿Piri ta omeri nokayá jiti ku kanílipo? Jesús tamó binérili japi “wabé kaníliami ju japi iyá jarecho alí ke ko japi naré” (Hech. 20:35, TNM). Bilé anciano japi rewé Alekos jériká ruyé: “Ani iʼwérili isimí iʼwiria jarecho. Japalí ni aminabi nata jarecho jitra, ke ni me nata binoy jitra, alí jepuná isimí japi ni we kaníliami nima”. ¿Piri namuti mi omeri isiá iʼwírimia jarecho? Ami machisáaká japi bilé ikí namuti jilírami, iʼwérili iyá. A keʼré japi mi ke omérima ku kariwea japi ikí echi, nalí echi ko ku kanílima ami aʼlá kipúsaká japi echi aní, ami iʼwérili isísaká aʼlá inamia japi echi inili alí mi newalárisaká japi omeri anea Jeobá suwaba japi echi inili (Sal. 55:22; 68:19). Ayénachó mi omeri anea japi Jeobá ke bineli riwé echi (Sal. 37:28; Is. 59:1). Alí mi omeri niwilia koʼwáami o simiyá echi yúa basalówisia. Ayénachó bayé jiti mi yúa simea nawisasia; bineria jarecho echi raʼíchali aʼláala jitra, iʼwírima echi jiti ku kanílima. Ami iʼwérili isísaká iʼwiria jarecho, Jeobá ko mi néema iʼwérili iyamia jarecho alí ayénachó ami ne bichíwali kaníliami nima (Prov. 11:25).

17. Ata ne bichíwali kaníliami nínalaká, ¿piri ta nokisáré? (Salmo 43:4).

¹⁷ Ata ne bichíwali kaníliami nipo, ati aminabi mulíwisaká tamujé Onolá. Echi Biblia aní japi Jeobá ju japi wabé tamó kaníliti (leeri Salmo 43:4). Jiti la, tákoré ti ikiyé chuwé namuti jilírami, a ti omeri kilí niya. Ata iʼwérili nokisáaká sinibí Jeobá amígowala niya, echi ko tamó iʼwírima kaníliami niya ne sinibisi (Sal. 144:15).