Esdras

Édra rü namücügümaxã Yerucharéü̃wa nangugü

7 Rü yexguma Artayére rü Pérchiaanearü ãẽ̱xgacü yixĩxgu, rü nayexma ga wüxi ga chacherdóte ga Édragu ãégacü. Rü nüma rü Cheraía nane nixĩ rü nũxcümaü̃cü ga Aróü̃taxa nixĩ.

2 7:2-5 Rü ñaagü nixĩ ga yema Édra ga Cheraía nanearü o̱xigü: rü Acharía, rü Irichía, rü Charúü̃, rü Chadóx, rü Aitúx, rü Amaría, rü Acharía, rü Meraióx, rü Cheraí, rü Uchí, rü Buquí, rü Abichúa, rü Fineéx, rü Ereachá, rü Aróü̃, ga nüxírama chacherdóte ixĩxü̃ ga Iraétanüxü̃tanüwa. 3 Nüü̃ nadau 7:2 4 Nüü̃ nadau 7:2 5 Nüü̃ nadau 7:2

6 Rü nüma ga Édra rü wüxi ga ngu̱xẽẽtaeruxü̃ nixĩ, rü meama nüxü̃ nacua̱x ga Tupanaarü mugü ga Moiché ümatüxü̃. Rü wüxi ga ngunexü̃gu rü ãẽ̱xgacü ga Artayérena naca nax Yerucharéü̃ca̱x namueguaxü̃ca̱x. Rü nüma ga ãẽ̱xgacü rü naga naxĩnü, yerü Tupana rü poraãcü Édraxü̃ narüngü̃xẽxẽ. Rü yemaacü ga Édra rü Babiróniaanewa inaxũãchi rü Yerucharéü̃ca̱x nataegu.

7 7:7-9 Rü yexguma marü 7 ga taunecü ãẽ̱xgacü yixĩxgu ga Artayére rü meama nüxíraü̃cü ga tauemacüarü ügügu inaxũãchi ga Édra nax Yerucharéü̃ca̱x nataeguxü̃. Rü namaxã nawoegu ga wüxitücumü ga Iraétanüxü̃. Rü yematanüwa nayexmagü ga chacherdótegü rü Lebítanüxü̃, rü wiyaetanüxü̃, rü Tupanapata ga taxü̃nearü ĩã̱xarü dauruü̃gü, rü Tupanapata ga taxü̃newaarü ngü̃xẽẽruü̃gü. Rü yemamaxã inaxũãchi ga Édra. Rü Yerucharéü̃wa nangugü meama gumá norü 5 ga tauemacüarü ügügu, yerü Tupana rü poraãcü nüxü̃ narüngü̃xẽxẽ. 8 Nüü̃ nadau 7:7 9 Nüü̃ nadau 7:7

10 Rü nüma ga Édra rü aixcüma nagu narüxĩnü nax Tupanaarü mugüwa nangúxü̃ rü nagu nax namaxü̃xü̃ rü yema togü ga Iraéanecüã̱xgüxü̃ nax nangúexẽẽxü̃ca̱x ga yema Tupanaarü mugü.

11 7:11-12 Rü nüma ga Édra rü wüxi ga ngu̱xẽẽtaeruxü̃ ga meama guxü̃ma ga Tupanaarü mugüxü̃ cuácü nixĩ. Rü yexguma Babiróniaanewa inaxũãchichaü̃gu ga Édra, rü nüma ga ãẽ̱xgacü rü Édrana nanaxã ga wüxi ga popera ga ñaxü̃: —Choma i ãẽ̱xgacü i Artayére rü cuxü̃ charümoxẽ Pa Chacherdóte, Pa Édrax. Rü cuma rü wüxi i ngu̱xẽẽtaeruxü̃ i meama Iraétanüxü̃arü Tupana ya daxũgucüarü mugüxü̃ cuáxe quixĩ. 12 Nüü̃ nadau 7:11

13 Rü marü chanaxunagü i wüxi i mu nax ngẽmaãcü guxü̃ma i Iraétanüxü̃ i cho̱xme̱xwa ngẽxmagüxü̃ rü naxwa̱xegüxü̃ nax cumaxã Yerucharéü̃ca̱x nawoeguxü̃, rü marü name nax cuwe naxĩxü̃. Rü ngẽxgumarüxü̃ ta i ngẽma Lebítanüxü̃ rü chacherdótegü rü marü name nax nawoeguxü̃.

14 Erü choma i ãẽ̱xgacü rü ngẽma 7 i chorü ngü̃xẽẽruü̃gümaxã rü ngéma cuxü̃ tamu nax mea cuyangugüxü̃ca̱x nax ñuxãcü ínamaxẽxü̃ i ngẽma cutanüxü̃ i Yudáanewa, rü ĩane ya Yerucharéü̃wa, rü aixcüma nagu ínamaxẽ i ngẽma curü Tupanaarü mugü i cuxü̃́ ngẽxmaxü̃.

15 Rü ngẽxgumarüxü̃ ta cuxna taxãga nax cuyanaxü̃ca̱x i ngẽma diẽrumü rü úiru i choma i ãẽ̱xgacü rü chorü ngü̃xẽẽruü̃gümaxã torü ngúchaü̃maxã cuxna taxãmaregüxü̃ naxca̱x ya perü Tupana ya Yerucharéü̃gu ãpatacü.

16 Rü ngẽxgumarüxü̃ ta rü name nixĩ i cutanüxü̃ i duü̃xü̃gü rü chacherdótegü i Babiróniaanewa ngẽxmagüxü̃tanüwa cunade i ngẽma diẽrumü, rü úiru, rü ãmaregü i norü ngúchaü̃maxã inaxãgüxü̃ naxca̱x ya yima Tupanapata ya taxü̃ne ya Yerucharéü̃wa ngẽxmane.

17 Rü ngẽma diẽrumaxã rü tá naxca̱x cutaxe i wocaxacügü, rü carnérugü rü carnéruxacügü wüxigu namaxã i ãmaregü i trigu rü bínu. Rü ngẽma ãmaregü tá nixĩ i Tupanapata ya taxü̃nearü ãmarearü guruü̃wa ícuyaguxü̃ i ngẽxguma Yerucharéü̃wa pengugügu.

18 Rü ngẽma diẽru rü úiru íyaxüxü̃maxã rü cuma rü cumücügü rü tá naxca̱x petaxe i ngẽma pema nagu perüxĩnüegu rü Tupanaarü ngúchaü̃ ixĩxü̃.

19 Natürü ngẽma curü Tupanapata ga taxü̃nearü ngẽmaxü̃gü i pexna taxãxü̃ rü cunaxwa̱xe nax cumatama yima Tupanapata ya taxü̃negu cuyanuxü̃ i Yerucharéü̃wa.

20 Rü ngẽxguma iyataxuxgu i diẽru naxca̱x ya yima Tupanapata ya taxü̃ne rüe̱xna ta̱xacü i to i puracü i Tupanaca̱x pexüxchaü̃xü̃, rü marü name i chorü diẽruarü dauruxü̃xü̃tawa naxca̱x ícuca.

21 Rü pemax, Pa Ãẽ̱xgacügüx i Taxtü i Eufrátearü Oéstewaama Ngẽxmagüxe i Diẽrumaxã Icua̱xgüxex, rü choma i Pérchiaanearü ãẽ̱xgacü i Artayére rü pexca̱x chayamupane i ñaa mugü: “¡Rü nüxna penaxã i guxü̃ma i ta̱xacü i pexü̃tawa naxca̱x ínaca̱xü̃ ya yimá chacherdóte ya ngu̱xẽẽtaeruxü̃ ya Édra i meama Tupana ya daxũcüã̱xarü mugüxü̃ cuácü!

22 Rü name nixĩ i nüxna penaxã ñu̱xmata 3,600 quíru nagúxü̃ i diẽrumü rü 22,000 litru nagúxü̃ i trigu, rü 2,200 litru nagucü ya bínu, rü 2,200 litru nagúxü̃ i chíxü̃. Rü yima yucüra ya nüma naxca̱x ínaca̱xacü ¡rü nüxna penaxã!

23 Rü ngẽxgumarüxü̃ ta i ngexü̃rüüxü̃mare i ngẽmaxü̃gü ya Tupana ya daxũcüã̱x naxwa̱xexü̃ i napata ya taxü̃neca̱x, rü name nixĩ i nüxna penaxã nax tama cha̱u̱xca̱x rü chauneca̱x poxcu ínangu̱xẽẽxü̃”.

24 Rü ngẽxgumarüxü̃ ta chanaxunagü i ñaa mu: “Rü ngẽma chacherdótegü, rü Lebítanüxü̃, rü wiyaetanüxü̃, rü ĩã̱xarü dauruü̃gü rü guxü̃ma i ngẽma togü i Tupanapata ya taxü̃newa puracüexü̃, rü tama chanaxwa̱xe nax ãẽ̱xgacüaxü̃́ nax naxütanügüãxü̃”.

25 Rü cumax, Pa Édrax, rü name nixĩ i nagu quixũ i ngẽma cua̱x ya Tupana cuxna ãxü̃. Rü ngẽmaãcü ngẽma naanegü i taxtü i Eufrátearü oéstewaama ngẽxmagüxü̃ i duü̃xü̃güca̱x tá nüxü̃ cuxuneta i ãẽ̱xgacügü i duü̃xü̃güarü guxchaxü̃arü mexẽẽruxü̃ ixĩgüxü̃, rü ãẽ̱xgacügü i mea ngẽma duü̃xü̃gümaxã icuáxü̃. Rü ngẽxguma nangemagu i duü̃xü̃gü i tama curü Tupanaarü mugüxü̃ cua̱xgüxü̃, rü name nixĩ i cuma cunangúexẽxẽ.

26 Rü ngexerüxüxemare ya tama naga ĩnüxe i ngẽma curü Tupanaarü mugü rü chorü mugü ¡rü noxtacüma tüxü̃ pima̱x rüe̱xna tüxü̃ ípeta̱xüchi i perü naanewa, rüe̱xna tüxna penapuxü̃ i tümaarü ngẽmaxü̃gü, rüe̱xna tüxü̃ pepoxcu! —ñanagürü ga ãẽ̱xgacü ga Artayére norü poperawa.

Édraarü Yumüxẽ

27 Rü yexguma ga Édra rü nayumüxẽ rü ñanagürü: —Pa Torü O̱xigüarü Tupanax, rü cuma rü cumecümaxü̃chi. Rü ngẽmaca̱x ãẽ̱xgacüãẽwa ícunanguxẽxẽ nax yima cupata ya taxü̃ne ya Yerucharéü̃wa ngẽxmane wena namexẽẽgüãxü̃ca̱x i curü duü̃xü̃gü.

28 Rü moxẽ cuxna chaxã, Pa Tupanax, erü cuxü̃́ changechaü̃tümüxü̃ nape̱xewa ya ãẽ̱xgacü rü ngẽma 7 i namücügü rü guxü̃ma i norü ngü̃xẽẽruü̃gü. Rü chapora erü cumax, Pa Tupanax, chauxü̃tawa cungexma rü ngẽmaca̱x choxü̃́ natauxcha nax nüxü̃́ chanangúchaü̃xẽẽxü̃ i ñuxre i chautanüxü̃ i Iraétanüxü̃arü ãẽ̱xgacügü nax chowe Yerucharéü̃ca̱x nawoeguxü̃ —ñanagürü ga norü yumüxẽwa.