Números

Iraétanüxü̃arü naanearü üyeanechigü

34 34:1-2 Rü nüma ya Cori ya Tupana rü Moichéxü̃ ñanagürü: —Rü Iraétanüxü̃maxã nüxü̃ ixu i ñaa ucu̱xẽgü: “Pema rü Canaáü̃chixü̃anegu tá pechocu. Ngẽma nachixü̃ane rü pexrü tá nixĩ, rü ñaagü tá nixĩ i ngẽma norü üyeanechigü: 2 Nüü̃ nadau 34:1

3 Norü súrcüwawa i ngẽma naane rü Chianexü̃ i Chíü̃maxã tá nixüye rü ñu̱xũchi Edóü̃anemaxã. Rü norü éstecüwawaama rü Már ya Ngearü Maxü̃ã́xü̃arü súrwa tá inaxügü.

4 Rü súrwaama tá nada rü ñu̱xmatáta Acabíü̃arü tuãchixü̃wa nangu. Rü ngéma rü Chíü̃wa tá nadapetü ñu̱xmatáta Cadé-banéawa nangu. Rü ngéma rü Achá-adáwaama tá nidachigü ñu̱xmatáta Amóü̃wa nangu.

5 Rü Amóü̃wa rü tá inida ñu̱xmatáta ngẽma natü ga Equítuanemaxã íyaxüyeanexü̃wa nangu. Rü ngéma tá inida ñu̱xmatáta Már i Mediteráneugu yacuáx.

6 Rü norü oéstecüwawa i ngẽma naane, rü Már i Mediteráneucutümaxã tá nixüye.

7 Rü ngẽma nórtecüwawaama i üyeane rü Már i Mediteráneuwa tá inaxügü, rü ngéma rü tá we̱xgu peyadaxẽxẽ ñu̱xmatáta ma̱xpǘne ya Óxwa nangu.

8 Rü ma̱xpǘne ya Óxwa tá peyadaxẽxẽ i ngẽma üyeane ñu̱xmatáta Amáca̱x íxücuxü̃wa nangu. Rü ngéma tá peyadaxẽxẽ ñu̱xmatáta Chedáxwa nangu.

9 Rü Chedáxwa tá peyadaxẽxẽ ñu̱xmatáta Chifróü̃wa nangu. Rü Achá-enáü̃gu tá nixĩ i yacuáxü̃. Rü ngẽma tá nixĩ i norü üyeane i nórtecüwawa üxü̃.

10 Rü ngẽma üyeane i norü éstecüwawa üxü̃ rü Achá-enáü̃wa tá we̱xgu peyadaxẽxẽ ñu̱xmatáta Chepáü̃wa nangu.

11 Rü Chepáü̃wa rü ngẽma üyeane tá narüdae ñu̱xmatáta Ribá i Aíü̃arü éstewaama ngẽxmaxü̃wa nangu. Rü ngéma rü éstewaama tá nada ñu̱xmatáta naxtaxa ya Quinérexarü* éstecüwawa nangu.

12 Rü ngéma i ngẽma üyeane rü tá natü i Yudáü̃waama narüdae ñu̱xmatáta Már ya Ngearü Maxü̃ã́xü̃gu yacuá. Rü ngẽma tá nixĩ i perü naanearü üyeanechigü” —ñanagürü.

Ereachá rü Yochué rü Iraétanüxü̃na nayaxãchigü ga naane

13 Rü nüma ga Moiché rü Iraétanüxü̃xü̃ naxuxcu̱xẽ, rü ñanagürü nüxü̃: —Ngẽma nixĩ i naane i sortéuãcü tá pegü pinuxü̃, yema Cori ya Tupana nüxü̃ ixuxü̃rüxü̃ naxca̱x i ngẽma 9 tücumü i Iraétanüxü̃ rü ñu̱xũchi ngẽma ngãxü̃tücumü i Manachétanüxü̃.

14 34:14-15 Erü ngẽma Rubéü̃tanüxü̃, rü Gáxtanüxü̃ rü ñu̱xũchi ngẽma ngãxü̃tücumü ga Manachétanüxü̃ rü marü natanüxü̃maxã nayayauxchigü ga yema naane ga Yudáü̃arü éstewaama ngẽxmaxü̃ ga Yericúarü to̱xma̱xtawa —ñanagürü. 15 Nüü̃ nadau 34:14

16 34:16-17 Rü yemawena ga Cori ya Tupana rü Moichémaxã nidexa rü ñanagürü nüxü̃: —Nüma ya chacherdóte ya Ereachá rü Yochué i Núü̃ nane tá nixĩ i pexü̃ yanuxü̃ i ngẽma naane. 17 Nüü̃ nadau 34:16

18 Rü ngẽmaétü tá naxca̱x peca i wüxitücumüarü ãẽ̱xgacüchigü nax peyanuxü̃ca̱x i ngẽma naane.

19 Rü ñaa tá nixĩ i ngẽma yatügü i naxca̱x pecaxü̃: “Rü ngẽma Yudátanüxü̃tanüwa tá naxca̱x peca i Caréx i Yeponé nane ixĩxü̃.

20 Rü ngẽma Chimeóü̃tanüxü̃tanüwa tá naxca̱x peca i Chamué i Amiúx nane ixĩxü̃.

21 Rü ngẽma Bẽyamíü̃tanüxü̃tanüwa tá naxca̱x peca i Eridá i Quichóü̃ nane ixĩxü̃.

22 Rü ngẽma Dáü̃tanüxü̃wa tá naxca̱x peca i ãẽ̱xgacü i Buquí i Yoquí nane ixĩxü̃.

23 Rü Yúche nane ga Manachétanüxü̃tanüwa tá naxca̱x peca i ãẽ̱xgacü i Anié i Efóx nane ixĩxü̃.

24 Rü Yúche nane ga Efraíü̃tanüxü̃tanüwa tá naxca̱x peca i ãẽ̱xgacü i Quemué i Chitáü̃ nane ixĩxü̃.

25 Rü ngẽma Chaburóü̃tanüxü̃tanüwa tá naxca̱x peca i ãẽ̱xgacü i Erichafáü̃ i Panáx nane ixĩxü̃.

26 Rü ngẽma Ichacátanüxü̃tanüwa tá naxca̱x peca i ãẽ̱xgacü i Patié i Acháü̃ nane ixĩxü̃.

27 Rü ngẽma Achétanüxü̃tanüwa tá naxca̱x peca i ãẽ̱xgacü i Aiúx i Cheromíx nane ixĩxü̃.

28 Rü Netarítanüxü̃tanüwa tá naxca̱x peca i ãẽ̱xgacü i Pedaé i Amiúx nane ixĩxü̃” —ñanagürü.

29 Rü yemagüxü̃ nixĩ ga namuxü̃ ga Cori ya Tupana nax Iraétanüxü̃xü̃ yanuãxü̃ca̱x ga yema Canaáü̃arü naane.