Deuteronómio

17 ¡Rü taxũtáma Tupanana penaxã i wüxi i woca i yatüxü̃ rüe̱xna wüxi i carnéru i ta̱xacürü chixexü̃ nawa ngẽxmaxü̃! Erü nüma ya Tupana rü poraãcü naxchi naxai i ngẽma.

2 17:2-3 Rü ngürüãchi yima ĩanegü ya Tupana pexna ãxü̃negu tá nüxü̃ peyangau i wüxi i yatü rüe̱xna wüxi i ngexü̃ i naxüaxü̃ i ngẽma Tupana tama namaxã taãẽxü̃ rü nagu yanachixexẽẽxü̃ i Tupanaarü uneta nagagu nax ta̱xacürü tupananetaxü̃ yacua̱xüxüxü̃ rü nape̱xegu nacaxã́pü̱xü ngẽxgumarüxü̃ ya üa̱xcü rü tauemacü rü woramacurigü ya Tupana chu̱xuxü̃ nax nüxü̃ yacua̱xüü̃güxü̃. 3 Nüü̃ nadau 17:2

4 17:4-5 Rü ngẽxguma nüxü̃ pecua̱xgu nax petanüwa nangẽxmaxü̃ i wüxi i duü̃xü̃ i ngẽma üxü̃, rü name i mea penangugü i ngẽma rü aixcüma yixĩxgu nax naxüaxü̃ i ngẽma chixexü̃. Rü ngẽxguma aixcüma yixĩxgu nax ngẽma duü̃xü̃ naxüxü̃ i ngẽma chixexü̃ i Iraétanüxü̃tanüwa, rü ñu̱xũchi yima ĩanearü ãẽ̱xgacügüpe̱xewa tá penaga. Rü nüma ya ãẽ̱xgacügü rü tá nanaxuegu nax nutamaxã ípenamuxũchixü̃ nax ngẽmaãcü nayuxü̃ca̱x. 5 Nüü̃ nadau 17:4

6 Rü ngẽxguma nangẽxmagu i taxre rüe̱xna tomaepü̱x i nüxü̃ idauxü̃ rü nüxü̃ ixuxü̃ nax chixexü̃ naxüxü̃ rü name nax yu namaxã pexueguxü̃. Natürü ngẽxguma chi wüxitama i duü̃xü̃ nüxü̃ ixuxgu i ngẽma duü̃xü̃ i chixexü̃ üxü̃ rü taxuacütáma yu namaxã pexuegu.

7 Rü ngẽma duü̃xü̃gü i nüxü̃ daugüxü̃ rü nüxü̃ ixugüxü̃ tá nixĩ i nüxíra nutamaxã ínamuxũchigüxü̃, rü ngẽmawena i guxü̃táma i duü̃xü̃gü. Rü ngẽmaãcü tá nixĩ i penaxoxẽẽxü̃ i ngẽma chixexü̃ i petanüwa ngẽxmaxü̃.

8 Rü ngẽxguma nangẽxmagu i ta̱xacürü guxchaxü̃ i taxucürüwa pexica pemexẽẽxü̃, rü ngẽxgumarüxü̃ i máeta, rüe̱xna nügü nadaixgu, rüe̱xna nügü yapíexẽẽgu, rüe̱xna togüamachigü i guxchaxü̃gü i perü ĩanewa ngupetüxü̃, rü penaxwa̱xe nax ngẽma nachica ya Tupana nüxü̃ unetaxü̃wa peyamexẽẽxü̃.

9 Rü ngéma nape̱xewa i ngẽma Lebítanüxü̃ i chacherdótegü rü ngẽma ãẽ̱xgacü i guxchaarü mexẽẽruxü̃ i ngẽma ngunexü̃gu nagu nanguxü̃ nax ngéma nangẽxmaxü̃, rü tá namaxã nüxü̃ pixu i ngẽma ngupetüxü̃. Rü nümagü tá nixĩ i namaxã naxuegugüãxü̃ i ta̱xacü tá nixĩ i norü poxcu i ngẽma guxchaxü̃ üxü̃ i duü̃xü̃.

10 17:10-11 Rü pema rü tá peyangu̱xẽxẽ i ngẽma poxcu i ngẽma ãẽ̱xgacügü namaxã ueguxü̃. Rü ngẽmatama pemaxã nüxü̃ yaxugüxü̃ãcüma tá penapoxcue. Rü bai tá nax penaxüchicüüxü̃. 11 Nüü̃ nadau 17:10

12 Natürü ngẽxguma tangexmagu ya wüxíe ya tama naga ĩnüchaü̃xe i ngẽma poxcu i ãẽ̱xgacü i guxchaarü mexẽẽruxü̃ ueguxü̃ rüe̱xna ngẽma poxcu i chacherdóte i Tupanaarü puracü ixüxü̃ ueguxü̃, rü yu tá tümamaxã naxuegu. Rü ngẽmaãcü tá peyanaxoxẽxẽ i ngẽma chixexü̃ i Iraéanewa ngẽxmaxü̃.

13 Rü ngẽxguma ngẽma Iraétanüxü̃ nüxü̃ cua̱xgügu rü tá namuü̃e, rü tá nüxü̃ narüxoe nax tama ãẽ̱xgacüga naxĩnüexü̃.

Ãẽ̱xgacügüarü unetachiga

14 Rü ngẽxguma tá marü nagu pechocuxgu rü penapuxgu rü nawa pemaxẽgu i ngẽma naane i Cori ya perü Tupana tá pexna ãxü̃, rü ngürüãchi tá penaxwa̱xe nax pexü̃́ nangẽxmaxü̃ i wüxi i ãẽ̱xgacü i réi nax pemaxã inacuáxü̃ca̱x, naxrüxü̃ i ngẽma togü i nachixü̃anegü.

15 Rü ngẽxguma tá nüxü̃ pexunetagu i wüxi i perü ãẽ̱xgacü i réi, rü name i nüxü̃ pexuneta i wüxi i petanüxü̃tama i Cori ya perü Tupana nüxü̃ unetaxü̃. Rü tama name i nüxü̃ pexuneta i wüxi i duü̃xü̃ i to i nachixü̃anecüã̱x i tama petanüxü̃ ixĩxü̃.

16 Rü ngẽma ãẽ̱xgacü i nüxü̃ pexunetaxü̃ rü tama name nax nüma naxca̱x nataxexü̃ i muxũchixü̃ i cowarugü rü bai Equítuanewa nax namugüãxü̃ i duü̃xü̃gü nax to i cowarugüca̱x yataxegüxü̃ca̱x. Erü nüma ya Cori ya Tupana rü tüxna nanachu̱xu nax naxca̱x iwoeguxü̃ i ngẽma nachixü̃ane.

17 Rü ngẽxgumarüxü̃ ta tama name nax namumaxü̃ erü ngürüãchi naxma̱xgügagu taxũtáma Tupanaga naxĩnü. Rü ngẽxgumarüxü̃ ta i ngẽma ãẽ̱xgacü rü tama name nax nüxü̃́ nangẽxmaxü̃ i muxũchixü̃ i úirugü rü diẽru.

18 Rü ngẽxguma ngẽma ãẽ̱xgacü i nüxü̃ pexunetaxü̃ yaxücugu nax ãẽ̱xgacü yixĩxü̃, rü tá nanamu nax poperagu nüxü̃́ naxümatügüãxü̃ca̱x i ngẽma mugü i chacherdótegü i Lebítanüxü̃ namaxã icua̱xgüxü̃.

19 Rü ngẽma norü napane i ngẽma mugü rü guxü̃gutáma naxme̱xwa nangẽxma nax guxü̃ma i ngunexü̃gü i nagu namaxü̃xü̃gu nawa nangúxü̃ca̱x. Rü ngẽmaãcü i nüma ya ãẽ̱xgacü rü tá Cori ya Tupanaxü̃ nangechaxü̃ rü tá naga naxĩnü rü nagu namaxü̃ i guxü̃ma i ñaa mugü.

20 Rü ngẽmaãcü ya yima ãẽ̱xgacü rü taxũtáma nagu narüxĩnü nax norü duü̃xü̃güxü̃ nayexeramaexü̃. Rü taxũtáma nüxna nixũgachi i ñaa mugü. Rü ngẽmaãcü i nüma rü nanegü rü mucü ya taunecü rü Iraéanearü ãẽ̱xgacügü tá nixĩgü.