Deuteronómio

Ãmarearü guruxü̃ ga ma̱xpǘne ga Ebáwa yexmaxü̃chiga

27 Rü Moiché rü wüxigu Iraétanüxü̃arü ãẽ̱xgacügümaxã yema Iraétanüxü̃xü̃ namu rü ñanagürügü: —¡Peyanguxẽxẽ i guxü̃ma i ngẽma mugü i ñu̱xma pemaxã nüxü̃ chixuxü̃!

2 Rü ngẽxguma marü natü i Yudáü̃ pichoü̃gu, rü ngẽxguma nagu pechocugu i ngẽma naane i Cori ya perü Tupana tá pexna ãxü̃, rü tá ípenatopǘtaxẽxẽ i ñuxre ya nutagü ya tapǘtacü, rü ñu̱xũchi calmaxã tá peyachapütagü nax yacómüpütaxü̃ca̱x.

3 Rü yimápütagu tá penaxümatü i guxü̃ma i ngẽma ucu̱xẽgü i pemaxã nüxü̃ chixuxü̃. Rü ngẽma tá pexü i ngẽxguma nagu pechocugu i ngẽma naane i ngextá yima lechi rü berure rü ñoma dexárüxü̃ taguma ínataxuxü̃wa. Rü nüma ya Cori ya Tupana rü tá pexna nanaxã i ngẽma naane yema perü o̱xigümaxã nüxü̃ yaxuxü̃rüxü̃.

4 Rü ngẽmaãcü ngẽxguma natü i Yudáü̃ pichoü̃gu, rü ma̱xpǘne ya Ebáwa tá ípenatogüpǘtaxẽxẽ ya nutagü. Rü ñu̱xũchi calmaxã tá peyachagüpüta nax yacómüpütaxü̃ca̱x.

5 27:5-6 Rü ngẽma nachicagu tá Cori ya perü Tupanaca̱x penaxü i wüxi i ãmarearü guruxü̃ i nutagü ya nüechama mepütagücüwa rü tama imexẽẽpütagüwa. Erü Tupana nanaxwa̱xe nax nutagü ya nüechama imepütacüwa penaxüxü̃ i ngẽma ãmarearü guruxü̃. Rü ngẽmawa tá nixĩ i Cori ya perü Tupanaca̱x peyaguxü̃ i ngẽma ãmare i nüxna pexãxü̃. 6 Nüü̃ nadau 27:5

7 Rü ngẽma ãmarearü guruü̃wa tá nixĩ i Cori ya Tupanape̱xewa peyaguxü̃ i perü ãmaregü i norü ngüxmüxẽẽruxü̃. Rü ngéma Cori ya perü Tupanape̱xewa tá pechibüe rü petaãẽgü.

8 Rü pema rü namatü ya meama ngóxü̃nemaxã yimá nutagü i tacügu tá penaxümatü i ñaa ucu̱xẽgü i pexna chaxãxü̃ —ñanagürügü.

9 Rü yemawena ga Moiché rü wüxigu namaxã ga yema chacherdótegü ga Lebítanüxü̃ rü yema Iraétanüxü̃maxã nidexa rü ñanagürü nüxü̃: —¡Perüchianegü rü choxü̃ iperüxĩnüe, Pa Iraétanüxü̃x! Rü pemax i ñu̱xma rü marü Cori ya perü Tupanaarü duü̃xü̃gü pixĩgü.

10 Rü ngẽmaca̱x i ñu̱xma i pema rü penaxwa̱xe nax naga pexĩnüexü̃ rü peyanguxẽẽxü̃ i ngẽma norü mugü i ñu̱xma pemaxã nüxü̃ chixuxü̃ —ñanagürü ga Moiché.

Guxchaxü̃gü i tá naxca̱x ínguxü̃ i ngẽma duü̃xü̃gü i tama Cori ya Tupanaarü mugü inguxẽxẽgüxü̃

11 Rü yematama ga ngunexü̃gu ga Moiché rü duü̃xü̃güna nanaxã ga ñaa mu rü ñanagürü nüxü̃:

12 —Ngẽxguma marü natü i Yudáü̃ pichoü̃gu rü name i ngẽma Chimeóü̃tanüxü̃, rü Lebítanüxü̃, rü Yudátanüxü̃, rü Ichacátanüxü̃, rü Yúchetanüxü̃ rü Bẽyamíü̃tanüxü̃ nax ma̱xpǘne ya Guerichíü̃wa naxĩxü̃ nax naxueguxü̃ i ngẽma mexü̃gü i tá naxca̱x ínguxü̃ i ngẽma duü̃xü̃gü i mea Tupanaga ĩnüexü̃.

13 Rü ngẽma Rubéü̃tanüxü̃, rü Gáxtanüxü̃, rü Achétanüxü̃, rü Chaburóü̃tanüxü̃, rü Dáü̃tanüxü̃ rü Netarítanüxü̃ rü ma̱xpǘne ya Ebáwa tá naxĩ nax naxueguxü̃ i ngẽma chixexü̃ i tá naxca̱x ínguxü̃ i ngẽma duü̃xü̃gü i tama Tupanaga ĩnüexü̃.

14 Rü ngẽma Lebítanüxü̃ rü tagaãcü guxü̃ma ga Iraétanüxü̃ca̱x tá nanaxunagü i ñaa ore rü ñanagürügü tá:

15 “Ngẽma duü̃xü̃ i naxüxü̃ i wüxi i naxchicüna̱xã i nainaxca̱x rüe̱xna bróũchenaxca̱x, rü ñu̱xũchi wüxi i nachica i taxúema nüxü̃ ídauxü̃gu namaxã nguxü̃xü̃, rü ngẽma duü̃xü̃ rü Tupanape̱xewa rü poraãcü chixexü̃wa nangẽxma”. Rü ngẽxguma i guxü̃ma i duü̃xü̃gü rü: “Ngẽmaãcü yixĩ”, ñanagürügü tá.

16 “Rü yíxema tümanatüchi aixe rüe̱xna tümaéchi aixe rü chixexü̃wa tangexma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

17 “Rü texé ya tümamücüarü naanearü üyeane ixügachixe nax tümaarü naaneca̱x tangĩ́xü̃, rü chixexü̃wa tangexma”. Rü ngẽxguma i guxü̃ma i duü̃xü̃gü rü, “Ngẽmaãcü yixĩ”, ñanagürügü tá.

18 “Rü ngẽma duü̃xü̃ ya wüxi ya ngexetüxe tümaarü namana tüxü̃ ixũgachixẽẽxü̃, rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

19 “Rü ngẽma duü̃xü̃ i wüxi ya duü̃xẽ ya to i nachixü̃anecüã̱xmaxã chixri icuáxü̃, rüe̱xna wüxi ya yutéxemaxã chixri icuáxü̃, rüe̱xna wüxi ya taxcutamaxã chixri icuáxü̃ rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

20 “Rü ngẽma duü̃xü̃ i nanatü naxma̱xmaxã maxü̃xü̃, rü ngẽmaãcü nanatüxü̃ nachixexẽẽchiga, rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

21 “Rü ngẽma duü̃xü̃ i wüxi i naxü̃namaxã maxü̃xü̃ rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

22 “Rü yíxema ngĩmaxã maxü̃́xẽ i tümaeya̱x i nai i ngewáxü̃cü rü chixexü̃wa tangexma. Rü ngẽxgumarüxü̃ ta chixexü̃wa tangexma ya yíxema ngĩmaxã maxü̃́xẽ i tümaeya̱x i nai ya yatüxacü ixĩcü. Rü ngẽmaãcü taxü̃ i chixexü̃ taxü̃”. Rü guxü̃ma i duü̃xü̃gü rü “Ngẽmaãcü yixĩ”, ñanagürügü tá.

23 “Rü ngẽma duü̃xü̃ i na̱xẽmaxã maxü̃xü̃ rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

24 “Rü ngẽma duü̃xü̃ i tümaechita tüxü̃ imáxü̃ ya namücü rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

25 “Rü ngẽma duü̃xü̃ i tüxü̃ yauxtanüxü̃ nax tüxü̃ yamáxü̃ca̱x ya duü̃xẽ ya taxuxü̃ma chixexü̃ üxe rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

26 “Rü yíxema tama naga ĩnüxe i ñaa ucu̱xẽgü rü tama nagu maxü̃́xẽ rü chixexü̃wa tangexma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.