Mateu

Ngechuchu nanaxunagü na tupauca ga taxü̃ne rü tá nagu na napogüexü̃

24 Rü jexguma tupauca ga taxü̃newa ínaxũũxgu ga Ngechuchu, rü norü ngúexü̃gü naxca̱x naxĩ. Rü nhanagürügü nüxü̃: —Dücax, Pa Corix, nhuxãcü nimexẽchi ja daa tupauca ja taxü̃neãrü ĩpatagü —nhanagürügü. 2 Notürü Ngechuchu nanangãxü̃ rü nhanagürü: —Pema nüxü̃ pedaugü ja guxü̃nema ja jima tupauca ja taxü̃neãrü ĩpatagü. Notürü pemaã nüxü̃ chixu rü aixcuma guxü̃nema ja daa ĩpatagü rü tá nagu napogüe. Rü naxtapü̱xarü nutagü rü taxucütáma nügüétü naxüxüra, rü bai ja wüxi —nhanagürü.

Cua̱xruü̃gü i tá nüxü̃ idauxü̃ naxü̃pa na nagúxü̃ i naãne

3 Rü nhu̱xmachi guma Ma̱xpǘne ga Oriwéranecügu ãẽ́ganewa naxĩ. Rü jexguma guma ma̱xpǘnewa nato̱xgu ga Ngechuchu rü norü ngúexü̃güxicatama naxü̃tawa naxĩ na noxrüwama nüxna nacagüexü̃ca̱x. Rü nhanagürügü: —Tanaxwa̱xe i tomaã nüxü̃ cuixu na nhuxgu tá nangupetüxü̃ i ngẽma nüxü̃ cuixuxü̃. ¿Rü ṯacü tá nixĩ i norü cua̱xruü̃ i nawa nüxü̃ tacuáxü̃ i nhuxgu tá wena núma na cuxũxü̃ rü tá na nagúxü̃ i naãne? —nhanagürügü. 4 Rü jexguma ga Ngechuchu rü nhanagürü nüxü̃: —¡Pexuãẽgü na taxúema pexü̃ womüxẽẽxü̃ca̱x! 5 —Erü muxũchixü̃ i duü̃xü̃gü tá ínangugü, rü chagu tá nügü nicu̱xgü rü tá nhanagürügü:

“Chama nixĩ i Cristu”, nhanagürügü tá. Rü muxũchixü̃ i duü̃xü̃güxü̃ tá nawomüxẽẽ. 6 —Rü tá nüxü̃ pexĩnüẽchiga na nügü naḏaixü̃ i nhuxre i nachiü̃ãnegü rü nügü na nadaixchaü̃xü̃ i togü i nachiü̃ãnegü. ¡Notürü tãũxü̃táma ngẽmaca̱x peḇaixãchiãẽgü! Erü woetama ngẽmaãcü tátama nangupetü i noxrix. Notürü tãũxü̃táma naãneãrü gu̱x nixĩ i ngẽma. 7 —Erü wüxi i nachiü̃ãne rü to i nachiü̃ãnemaã tá nügü nadai. Rü wüxi i ãẽ̱xgacü rü to i ãẽ̱xgacümaã tá nanu, rü norü churaragü rü ngẽma to i ãẽ̱xgacüarü churaragümaã tá nügü nadai. Rü tá taija nangu̱x, rü tá nataxüchi i ḏaaweanegü, rü muxü̃ma i nachicawa rü tá naxĩã̱xãchiane. 8 —Rü guxü̃ma i ngẽma pemaã nüxü̃ chixuxü̃, rü ngẽma nixĩ i norü ügümare i ngẽma ngúxü̃ i tá ngupetüxü̃. 9 —Rü ngẽxguma i togü i duü̃xü̃gü rü tá pexü̃ ínajauxü̃ na chixexü̃ pemaã naxügüxü̃ca̱x. Rü tá pexü̃ nadai. Rü guxü̃ i naãnewa i duü̃xü̃gü rü tá pechi naxaie, erü chorü duü̃xü̃gü peixĩgü. 10 —Rü ngẽxguma rü tá muxũchixü̃ i chorü duü̃xü̃gü ínanata̱xgü i chorü ore, rü nügütanüwa rü tá nügüchi naxaie. Rü nügüechita tá ãẽ̱xgacüxü̃tawa nügü ínajaxuaxü̃gü. 11 —Rü muxũchixü̃ i orearü uruü̃güneta tá ínangugü. Rü tá nüxü̃ nixugügü na Tupana jiĩxü̃ ja núma namugücü na nüxü̃ jaxugüxü̃ca̱x i ore. Rü ngẽmaãcü tá muxũchixü̃ i duü̃xü̃güxü̃ nawomüxẽẽgü. 12 —Rü poraãcü tá nangẽxma i chixexü̃, rü ngẽmagagu rü muxũchixü̃táma i duü̃xü̃gü rü tãũxü̃táma nügü nangechaü̃gü. 13 —Notürü jíxema naẽ́tüwa meã Tupanaãxü̃́ jaxõõmáxẽ rü jíxema tá tixĩ ja aixcuma najaxúxe i maxü̃ i taguma gúxü̃. 14 —Rü ngẽma Tupanaãrü ore i mexü̃ rü guxü̃ i naãnewa tá nüxü̃ nixugügü na guxü̃ i duü̃xü̃gü nüxü̃ na cua̱xgüxü̃ca̱x. Rü ngẽmawena tá nixĩ i nagúxü̃ i naãne. 15 —Rü nuxcümaxü̃cü ga Tupanaãrü orearü uruü̃ ga Danié nachiga nanaxümatü i ngẽma chixexü̃ i Tupanape̱xewa ãũãchixü̃ i ínguxchaü̃xü̃. Rü ngẽxguma nüxü̃ peda̱xgu na tupauca ja taxü̃newa nangóxü̃ i ngẽma chixexü̃ i Tupanape̱xewa chixexü̃chixü̃, rü name nixĩ i pexuãẽgü. 16 —Rü ngẽxguma ngẽma üpetügu, rü ngẽma Judéaanewa ngẽxmagüxü̃ i duü̃xü̃gü rü nanaxwa̱xe na ma̱xpǘneãnewa nabuxmüxü̃. 17 —Rü ngẽma ngunexü̃gu ega texé tümapataã̱xtüwa ngẽxmagu, rü tama name i tümapatagu tajangaxi na tümaãrü ngẽmaxü̃ tajajaxuxü̃ca̱x. 18 —Rü texé ja tümaãnewa ngẽxmaxẽ rü tama name i tümapataca̱x tataegu na tümachirugü tajajaxuxü̃ca̱x. 19 —Rü ngẽma ngunexü̃gügu rü wüxi i ngechaü̃ tá nixĩ i tümaca̱x ja jíxema ngeã̱xtagü ja ixãũcharaü̃güxe rü jíxema imaĩxãcügüxe. 20 —¡Rü Tupanana naxca̱x pec̱a i perü jumuxẽwa na tama gáuane ixüjane rü e̱xna ngü̃xchigaarü ngunexü̃gujane pexü̃ na nangupetüxü̃ca̱x i ngẽma chixexü̃! 21 —Erü ngẽma ngunexü̃gügu rü poraãcü tá nangẽxma i ngúxü̃ ga noxri naãne ixügügumama taguma jexmaxü̃, rü ngẽmawena rü tagutáma wena nangẽxma. 22 —Rü ngẽxguma Tupana tama nanoxrexẽẽgu i ngẽma ngunexü̃gü, rü taxúetáma tamaxü̃. Notürü Tupana tá nananoxrexẽẽ i ngẽma ngunexü̃gü tümaca̱x ja jíxema nüma tüxü̃ jadexechixe. 23 —Rü ngẽxguma texé pexü̃ nhagügu:

“Dücax, daa nixĩ ja Cristu” nhagügu, rü e̱xna:

“Gua nixĩ ja Cristu” nhagügu, ¡rü tama name i nüxü̃́ pejaxõgü! 24 —Erü Cristugüneta rü Tupanaãrü orearü uruü̃güneta tá ínangugü. Rü tá nanaxügü i muxü̃ma i cua̱xruü̃gü i taxü̃gü na ngẽmaãcü, ega nüxü̃́ natauxchagu, na tüxü̃ nawomüxẽẽgüxü̃ca̱x a̱i̱xrüxe ja jíxema duü̃xẽgü ja Tupanatama tüxü̃ idexechixe. 25 —Dücax, naxü̃pa na nangupetüxü̃ i guxü̃ma i ngẽma ngúxü̃, rü marü pemaã nüxü̃ chixu i nachiga. 26 —Rü ngẽmaca̱x i ngẽxguma duü̃xü̃gü nhagügu pexü̃:

“Dücax, jéa taxúema íxãpataxü̃wa nangẽxma ja Cristu”, nhagügu, rü tama name i ngẽ́ma pexĩ. Rü ngẽxguma nhagügu pexü̃:

“Dücax, nuã ucapuwa nangẽxma ja Cristu”, nhagügu, rü tama name i nüxü̃́ pejaxõgü. 27 —Erü nhama wüxi i ba̱i̱xbe̱xane i guxü̃wama nangóonexẽẽxü̃rüü̃ tá nixĩ i ngẽxguma wenaxãrü núma chaxũxgu i chama i Tupana Nane na duü̃xü̃xü̃ chiĩxü̃. 28 Rü duü̃xü̃gü rü tá chauxca̱x nangutaque̱xegü nhama ẽxchagü nawemüca̱x ngutaque̱xexü̃rüü̃.

Nhuxãcü tá nixĩ i ngẽxguma nataegugu ja Tupana Nane ja duü̃xü̃xü̃ ixĩcü

29 —Rü nawena i ngẽma ngúxü̃gü rü tá nixo ja üa̱xcü, rü tãũxü̃táma inabáxi ja tawemacü. Rü woramacurigü rü ẽxtagü rü tá narüji. Rü guxü̃ma i nhama i naãne rü üa̱xcü rü tawemacü rü woramacurigü rü ẽxtagü rü tá naxĩã̱xãchitanü rü tá nu ne nanaxĩmare. 30 —Rü nhu̱xmachi duü̃xü̃gü tá nüxü̃ nadaugü na nhuxãcü dauxü̃wa ne chaxũxü̃. Rü guxü̃ i nachiü̃ãnecü̱̃ã̱x i duü̃xü̃gü rü tá naxauxe. Rü tá choxü̃ nadaugü i ngẽxguma caixanexü̃gügu ícharüxĩxgu rü núma chaxũxgu. Rü ngẽxguma i chama rü ãẽ̱xgacü ja poraxü̃chicü rü mexẽchicü tá chixĩ. 31 —Rü tá chanamu i chorü orearü ngeruü̃gü i dauxü̃cü̱̃ã̱x na jacuegüãxü̃ca̱x ja norü cornetagü na ngẽmaãcü naxĩtaque̱xexẽẽgüãxü̃ca̱x i guxü̃ma i ngẽma duü̃xü̃gü i chidexechixü̃ i guxü̃wama ngẽxmagüxü̃ nhu̱xmata naãne ijacuáxü̃wa ngẽxmagüxü̃. 32 —¡Iperüxĩnüẽ i nhaã cua̱xruü̃ i ori i figuerachiga, rü naxca̱x pengúe! Rü ngẽxguma ngexwacaxü̃xü̃ i nachacüügü ijarüjixgu rü naxüátügu, rü ngẽmawa nüxü̃ pecua̱x na paxa tá taunecü na jiĩxü̃. 33 —Rü ngẽxgumarüü̃ tá nixĩ i ngẽxguma nagúxchaü̃gu i naãne. Erü ngẽxguma nüxü̃ peda̱xgu na nangupetüxü̃ i ngẽma pemaã nüxü̃ chixuxü̃, rü ngẽmawa tá nüxü̃ pecua̱x na marü chingaicaxüchixü̃. 34 —Rü aixcuma pemaã nüxü̃ chixu rü guxü̃ma i ngẽma nüxü̃ chixuxü̃ rü tá nangupetü naxü̃pa na najuexü̃ i duü̃xü̃gü i nhamaü̃cüü maxẽxü̃. 35 —Rü nhama i naãne rü ngẽma dauxü̃wa nüxü̃ idauxü̃ rü tá nagu̱x. Notürü chorü ore rü tagutáma inajarüxo rü aixcuma tá ningu. 36 —Notürü ngẽma ngunexü̃ rü ngora i nagu tá nangupetüxü̃ i ngẽma pemaã nüxü̃ chixuxü̃, rü Chaunatü ja Tupanaxĩcatama nüxü̃ nacua̱x na nhuxgu tá nangupetüxü̃ i ngẽma, rü taxúema ja togue nüxü̃ tacua̱x. Rü woo i norü orearü ngeruü̃gü i dauxü̃cü̱̃ã̱x rü tama nüxü̃ nacua̱xgü, rü woo i chama i Nane na chiĩxü̃ rü tama nüxü̃ chacua̱x na nhuxgu tá nangupetüxü̃ i ngẽma. 37 —Rü jexgumarüü̃ ga duü̃xü̃güxü̃ ngupetüxü̃ ga jexguma Noẽ́ maü̃xgu, rü ngẽxgumarüü̃ tá ta nüxü̃ nangupetü i ngẽxguma íchanguxgu i chama i Tupana Nane na duü̃xü̃xü̃ chiĩxü̃. 38 —Rü jexguma, naxü̃pa ga guma mucü ga taxüchicü ga guxü̃wama inanguanexẽẽcü, rü ga duü̃xü̃gü rü nachibüe, rü naxaxegü, rü nixãma̱xgü rü nixütexacügü nhu̱xmata nawa nangu ga jema ngunexü̃ ga nagu Noẽ́ naweü̃gu ixüexü̃. 39 —Rü noxri ga jema duü̃xü̃gü rü tama nüxü̃ nacua̱xgüéga ga ṯacü tá nüxü̃ na ngupetüxü̃. Notürü jexguma ínanguxgu ga guma mucü ga taxüchicü ga jema duü̃xü̃güxü̃ ḏaicü, rü jexguma nixĩ ga nüxü̃ jacua̱xãchitanüxü̃. Rü ngẽxgumarüü̃ tá ta nixĩ i ngẽxguma wenaxãrü núma chaxũxgu i chama i Tupana Nane na duü̃xü̃xü̃ chiĩxü̃. 40 —Rü ngẽma ngunexü̃gu rü taxre i jatügü rü wüxi i naãnewa tá nügümaã nangẽxmagü. Rü wüxi tá nixĩ i Tupana igaxü̃ rü ngẽma to rü tá ngẽ́ma nata̱x. 41 —Rü taxre i ngexü̃gü tá nügümaã ínacaegü. Rü wüxi tá nixĩ i Tupana igaxü̃ rü ngẽma to rü tá ngẽ́ma nata̱x. 42 —¡Rü pexuãẽgü! Erü tama nüxü̃ pecua̱x i ṯacü rü ngora tá íchangu i chamax. 43 —¡Rü nagu perüxĩnüẽ i nhaã ore! Rü ngẽxguma chi wüxi i ĩpataarü jora nüxü̃ cua̱xgu na ṯacü rü ngoragu tá ínanguxü̃ i ngĩ́ta̱xáxü̃ rü tau chima nape. Erü nüxna chi nadau ja napata na tama ngẽxma naxücuxü̃ca̱x i ngẽma ngĩ́ta̱xáxü̃ na ṯacüca̱x ngẽ́ma jangĩ́xü̃ca̱x. 44 —Rü ngẽmaca̱x name nixĩ i pexuãẽgü i pemax. Erü ngẽma ngunexü̃ i marü tama nagu pegüna ípedaugüxü̃gu tá nixĩ i ngürüãchi íchanguxü̃ i chama i Tupana Nane na duü̃xü̃xü̃ chiĩxü̃.

Wüxi ga duü̃xü̃ ga meã norü coriga ĩnüxü̃ rü to ga tama meã norü coriga ĩnüxü̃chiga

45 —¿Rü texé tiĩxü̃ ja tümaãrü coriarü duü̃xü̃ ja aixcuma janguxẽẽ́xẽ rü tümaãẽxü̃ cuáxe? ¿Tama e̱xna jíxema tiĩxü̃ ja tümaãrü cori tüxna ãgaxe na meã nüxna tadauxü̃ca̱x rü meã ngoragu tanachibüexẽẽxü̃ca̱x i norü duü̃xü̃gü? 46 Rü tataãẽ ja jíxema coriarü duü̃xẽ ega ngẽxguma ínanguxgu i tümaãrü cori rü tüxü̃ íjanguexü̃gu na meãma ítanaxüxü̃ i ngẽma puracü i nagu tüxü̃ namuxü̃. 47 —Rü aixcuma pemaã nüxü̃ chixu rü ngẽma tümaãrü cori rü tá guxü̃ma i norü ngẽmaxü̃güarü daruü̃xü̃ tá tüxü̃ nixĩxẽẽ. 48 24:48-50 —Notürü ngẽxguma chi ngẽma coriarü duü̃xü̃ rü wüxi i jatü i chixexü̃ jixĩgu, rü chi nagu naxĩnügu na tãũxü̃táma paxa ínanguxü̃ i norü cori, rü chi inaxügüãgu na chixri namuãxü̃ i namücügü i norü coriarü duü̃xü̃gü, rü chi ngãxẽxü̃tanügu naxãxgu na namaã nachibüxü̃ca̱x rü naxaxexü̃ca̱x, rü ngürüãchi ngẽma ngunexü̃ rü ngẽma ngora i tama nagu ínanguxẽẽãxü̃gu rü tá ínangu i norü cori. 49 Nüü̃ nadau 24:48 50 Nüü̃ nadau 24:48 51 —Rü poraãcüxü̃chima tá nanapocu i ngẽma norü duü̃xü̃, nhama meã maxẽnetaxü̃ i duü̃xü̃güxü̃ napocuexü̃rüü̃. Rü ngẽ́ma tá narüdoxü rü nixü̃́xchapüta.