2 Corintios

Yema yaxõgüxü̃ rü woo tama namuarü diẽruã̱xgü, natürü togüxü̃ narüngü̃xẽxẽgü

8 Ñu̱xmax, Pa Chauenexẽgüx, pemaxã nüxü̃ tixuxchaü̃ nax ñuxãcü Tupana natanüwa puracüxü̃ i ngẽma yaxõgüxü̃ i Machedóniaanearü ĩanegüwa ngẽxmagüxü̃.

2 Rü woo taxü̃ ga guxchaxü̃gü nüxü̃́ yexmagüxü̃, natürü nataãẽgü. Rü woo tama namuarü diẽruã̱xgü, natürü yema nüxü̃́ yexmacü ga diẽrumaxã togüxü̃ narüngü̃xẽẽgü, ñoma nataarü diẽruã̱xgüxü̃rüxü̃.

3 Rü choma nüxü̃ chadau rü pemaxã nüxü̃ chixu rü nümagü rü taãẽãcüma ngĩxü̃ inaxãgü ga guxcüma ga diẽru ga nüxü̃́ tauxchacü nax ngĩxü̃ inaxãgüxü̃. Rü ngĩétü yexera taãẽãcüma ngĩxü̃ inaxãgü.

4 Rü poraãcü toxü̃ naca̱a̱xü̃gü nax tama nüxna tanachu̱xuxü̃ca̱x nax yemaacü yema togü ga taenexẽgüxü̃ nangü̃xẽẽgüxü̃ca̱x.

5 Rü yema nagu tarüxĩnüexü̃arü yexera ngĩxü̃ inaxãgü ga yema yaxõgüxü̃ ga Machedóniaanecüã̱x. Yerü Tupananaxíra nügü naxãgü rü yemawena toxna nügü naxuaxü̃gü nax toga naxĩnüexü̃ca̱x, yema Tupana naxwa̱xexü̃rüxü̃.

6 Rü yemaca̱x Títoxü̃ taca̱a̱xü̃ nax wena petanüwa naxũxü̃ca̱x nax ngĩxü̃ pingu̱xẽẽxü̃ca̱x ga yema diẽru ga marü pemaxã ngĩxü̃ inaxügücü nax ngĩxü̃ penutaque̱xexü̃.

7 Pema rü guxü̃wama mea ipexĩ erü mea peyaxõgü, rü pexü̃́ natauxcha nax mea nüxü̃ pixuxü̃ i Tupanaarü ore erü mea nüxü̃ pecua̱x nax ta̱xacüchiga yixĩxü̃. Rü aixcüma togüxü̃ perüngü̃xẽẽchaü̃, rü yema pexü̃ tangúexẽẽxü̃ãcüma pegü pengechaü̃gü. Rü ñu̱xma rü ngẽxgumarüxü̃ ta penaxwa̱xe nax aixcüma mea ipexĩxü̃ nawa i ngẽma mexü̃ i nacüma nax diẽru ngĩxü̃ ipexãxü̃ naxca̱x i ngẽma taenexẽgü i nüxü̃́ nataxuxü̃.

8 Tama wüxi i mu nixĩ i ngẽma pemaxã nüxü̃ chixuxü̃. Natürü chanaxwa̱xemare nax nüxü̃ pecuáxü̃ nax ñuxãcü taãẽãcüma ngĩxü̃ inaxãgüxü̃ ga togü ga yaxõgüxü̃. Rü pemaxã nüxü̃ chixu i ngẽma nax pema rü ta ngĩxü̃ ipexãgüxü̃ca̱x i ngẽma diẽru i togü i taenexẽgüarü ngü̃xẽẽca̱x ixĩcü, nax ngẽmaãcü ipenawéxü̃ca̱x nax aixcüma nüxü̃ pengechaü̃güxü̃.

9 Erü pema rü marü nüxü̃ pecua̱x nax ñuxãcü tamaxã namecümaxü̃ ga tórü Cori ya Ngechuchu ya Cristu. Rü woo nüxü̃́ nayexma ga guxü̃ma, natürü ñoma wüxi ga ngearü diẽruã́xü̃rüxü̃ pexca̱x nügü nixĩxẽxẽ nax ngẽmaãcü pexü̃́ nangẽxmaxü̃ca̱x i taxü̃ i Tupanaarü ngü̃xẽxẽ.

10 Rü ñu̱xma rü perü mexü̃ca̱x nixĩ i pemaxã nüxü̃ chixuxü̃ i ngẽma diẽruarü nutaque̱xechiga. Rü taunecü ga ngupetücügutama nixĩ ga ipenaxügüxü̃ nax ngĩxü̃ penutaque̱xexü̃. Rü yema rü aixcüma perü ngúchaü̃maxã nixĩ ga penaxüxü̃.

11 Rü ñu̱xma rü yema noxri nax mea ipenaxügüxü̃rüxü̃, rü name nixĩ i taãẽãcüma rü perü ngúchaü̃maxã peyangu̱xẽxẽ. Rü ngẽma diẽru i pexü̃́ ngẽxmacüwa rü name nixĩ nax noxrirüxü̃ perü ngúchaü̃maxã ngĩxü̃ ipexãxü̃ naxca̱x i ngẽma peenexẽgü i nüxü̃́ nataxuxü̃.

12 Erü ngẽxguma aixcüma wüxi ya duü̃xẽ tümaarü ngúchaü̃maxã ngẽma diẽru i tüxü̃́ ngẽxma̱xcüwa tümaenexẽca̱x ngĩxü̃ itaxãxchaü̃gu, rü Tupana rü taãẽãcüma ngĩxü̃ nayaxu. Erü nüma ya Tupana rü tama tüxna ngĩxca̱x naca i ngẽma tüxü̃́ taxu̱xcü.

13 Rü ngẽmaca̱x tama chanaxwa̱xe i ngẽma togüxü̃ nax perüngü̃xẽẽxü̃gagu pexü̃́ nataxuxü̃ i pemax. Rü tama tanaxwa̱xe nax wüxíe tüxü̃́ nataxuxü̃ rü yíxema toguxe rü tüxü̃́ íyaxüxü̃.

14 Rü ñu̱xma nax pexü̃́ nangẽxmaxü̃ i perü diẽru, rü name nixĩ i nüxü̃ perüngü̃xẽẽgü i ngẽma taenexẽgü i nüxü̃́ nataxuxü̃. Rü ngẽxguma to i ngunexü̃gu i pema pexü̃́ nataxuxgu, rü nümagü rü tá nüxĩ́ nüxü̃́ nangẽxma nax pexü̃ nangü̃xẽẽgüxü̃ca̱x. Rü ngẽmaãcü tá guxãtáma tawüxigu.

ñanagürü.

Títo rü namücügüchiga

16 Natürü Tupanana moxẽ chaxã, erü nüma rü Títoxü̃ nagu narüxĩnüxẽxẽ i ngẽmatama oegaãxẽ i choma pexca̱x choxü̃́ ngẽxmaxü̃.

17 Rü yexguma petanüwa chanamuxgu ga Títo rü: “Ngü̃”, ñanagürü. Yerü nüma rü woetama poraãcü pegu narüxĩnü. Rü ngẽmaca̱x norü ngúchaü̃maxã tá pexü̃ ínayadau i ñu̱xma.

18 Rü wüxigu Títomaxã ngéma petanüwa tanamu i wüxi i taenexẽ i guxü̃ma i yaxõgüxü̃ nüxü̃ ngechaü̃güxü̃, erü nüma rü aixcüma mea nüxü̃ nixu i Tupanaarü ore.

19 Rü naétü ngẽma yaxõgüxü̃tücumügü rü ngẽma taenexẽxü̃ naxunetagü nax toxü̃ íyaxümücüxü̃ca̱x rü toxü̃ nangü̃xẽẽxü̃ca̱x i ngẽxguma Yerucharéü̃wa ngĩxü̃ tangexgu i ngẽma diẽru, nax ngẽmaãcü nüxü̃ ticua̱xüü̃güxü̃ca̱x ya tórü Cori, rü guxãma nüxü̃ daugüxü̃ca̱x nax taãẽãcüma yigü rüngü̃xẽẽgüxü̃.

20 Rü wüxigu tomaxã ítayaga i ngẽma taenexẽ, erü tama tanaxwa̱xe i texé toxü̃ tixu ngĩxca̱x i ngẽma tacü i diẽru i taenexẽgüca̱x ngĩxü̃ inutaque̱xegücü.

21 Rü tama Cori ya Tupanape̱xewaxicatama tanaxwa̱xe nax mea tanaxüxü̃, natürü guxü̃ i duü̃xü̃güpe̱xewa rü ta tanaxwa̱xe nax mea tanaxüxü̃.

22 Rü Títomaxã rü ngẽma togü i taenexẽgümaxã petanüwa tanamu i wüxi i to i taenexẽ i toxü̃ nüxü̃ dauxẽẽxü̃ nax aixcüma nüxü̃́ nangúchaü̃ nax naxüaxü̃ i Tupanaarü puracü. Rü ñu̱xma rü yexeraãcü petanüwa naxũxchaü̃ i nümax, erü pexü̃́ nayaxõ nax pema rü aixcüma togüxü̃ perüngü̃xẽẽgüxü̃.

23 Rü pemaxã nüxü̃ chixu rü nüma ya Títo rü chomücü ya wüxiwa chomaxã pexca̱x puracücü nixĩ. Rü ngẽma taxre i togü i taenexẽgü rü yatügü i ngẽma yaxõgüxü̃tücumügü ngéma mugüxü̃ nixĩ. Rü nümagü rü aixcüma Cristuxü̃ nangechaxü̃gü.

24 Rü ngẽmaca̱x chanaxwa̱xe i ngẽma tomaepü̱x i taenexẽgüxü̃ penawe̱x nax aixcüma nüxü̃ pengechaü̃güxü̃, nax ngẽmaãcü guxü̃ma i ngẽma yaxõgüxü̃tücumügü nüxü̃ cua̱xgüxü̃ca̱x, rü toma rü pemaxã tataãẽgüxü̃.