2 Corintios

2 Rü yemaca̱x nixĩ ga tama wena pexü̃tawa chaxũxü̃, yerü tama chanaxwa̱xe nax pexü̃ changechaü̃xgüxẽẽxü̃.

2 Erü ngẽxguma chi pexü̃ changechaü̃xẽẽgu, ¿rü texé tá choxü̃ tataãẽxẽxẽ? ¿Rü ñuxãcü tá choxü̃ petaãẽxẽxẽ, ega pexü̃ changechaü̃xẽẽgu?

3 Rü yemaca̱x nixĩ ga yemaacü pexca̱x popera chaxümatüxü̃, yerü tama chanaxwa̱xe nax choxü̃ pengechaü̃xẽẽxü̃ ga yexguma chi yéma chaxũxgu, erü pema nixĩ i chanaxwa̱xexü̃ nax choxü̃ petaãẽxẽẽgüxü̃. Rü aixcüma nagu charüxĩnü rü ngẽxguma choma chataãẽxgu rü pema rü tá ta petaãxẽgü.

4 Rü yexguma pexca̱x chanaxümatügu ga yema popera, rü poraãcü chanaxĩ̱xãchiãxẽ, rü düxwa yema chorü ngechaü̃maxã chaxaxu. Natürü tama pexca̱x chanaxümatü nax pexü̃ changechaü̃xẽẽxü̃ca̱x, natürü pexca̱x chanaxümatü nax nüxü̃ pecuáxü̃ca̱x nax poraãcü pexü̃ changechaü̃xü̃.

Pauru rü nüxü̃́ nüxü̃ inarüngüma ga yema guxchaxü̃ ga Coríntiucüã̱x üxü̃

5 Rü yema yatü ga choxü̃ ngechaü̃xẽẽxü̃, rü tama choxü̃xicatama nangechaü̃xẽxẽ, natürü pexü̃ rü ta nangechaü̃xẽxẽ i guxãma i pemax. Natürü tama chanaxwa̱xe nax yexerawa chananguxẽẽxü̃ nax pemaxã nüxü̃ chixuxü̃ i ngẽmachiga.

6 Rü yema poxcu ga pema ga rümumae nüxna pexãxü̃ ga yema duü̃xü̃, rü cha̱u̱xca̱x rü marü name nax ngexicatama yixĩxü̃.

7 Rü ngẽmaca̱x i ñu̱xma rü chanaxwa̱xe i nüxü̃́ nüxü̃ iperüngüma i ngẽma chixexü̃ i naxüxü̃ rü nüxü̃ perüngü̃xẽxẽ nax ngẽma taxü̃ i norü ngechaü̃ rü tama yexeraxü̃ i chixexü̃wa nagaãxü̃ca̱x.

8 Rü ngẽmaca̱x pexü̃ chaca̱a̱xü̃ nax wenaxarü noxrirüxü̃ nüxü̃ penawéxü̃ nax aixcüma nüxü̃ pengechaü̃güxü̃.

9 Rü yemaca̱x nixĩ ga yemachiga pexca̱x chanaxümatüxü̃, yerü pexü̃ chaxüxchaü̃, rü nüxü̃ chacuáxchaü̃ rü marü aixcüma naga pexĩnüe ga yema pemaxã nüxü̃ chixuxü̃.

10 Rü ñu̱xma pemaxã nüxü̃ chixu rü yíxema pema tüxü̃́ nüxü̃ iperüngümaxẽ i tümaarü chixexü̃, rü choma rü tá ta tüxü̃́ nüxü̃ icharüngüma. Rü ngẽxguma chi ta̱xacürü chixexü̃ tüxü̃́ nüxü̃ icharüngümaxü̃gu, rü pexca̱x nixĩ i Cristupe̱xewa tüxü̃́ nüxü̃ icharüngümaxü̃ i ngẽma.

11 Rü ngẽmaãcü chanaxü nax tama nayoxniexü̃ca̱x i Chataná nax chixexü̃gu tüxü̃ nayixẽẽxü̃ca̱x. Erü yixema rü meama nüxü̃ tacua̱x i nacüma i Chataná rü ñuxãcü chixexü̃gu tüxü̃ nayixẽẽchaü̃xü̃.

Tróaarü ĩanewa rü nanaxĩ̱xãchiãxẽ ga Pauru

12 Rü yexguma Tróaarü ĩanewa changuxgu nax nüxü̃ chixuxü̃ca̱x ga Cristuarü ore, rü nüma ga Cori ya Tupana rü choxü̃́ nanatauxchaxẽxẽ nax yéma nüxü̃́ chapuracüxü̃ca̱x.

13 Natürü tama aixcüma chataãxẽ ga yéma, yerü tama yexma nüxü̃ chayangau ga taenexẽ ga Títo. Rü yemaca̱x nüxü̃ charümoxẽ ga yémacüã̱x ga duü̃xü̃gü, rü ichaxũãchi, rü Machedóniaanewa chaxũ.

Cristu rü Pauruxü̃ naporaxẽxẽ

14 Rü Tupanana moxẽ taxãgü erü ñu̱xma nax Cristuarü duü̃xü̃gü tixĩgüxü̃, rü nüma ya Tupana rü guxü̃guma tomaxã nanaxũpe̱xe. Rü nüma nixĩ i towa duü̃xü̃güxü̃ nüxü̃ nacua̱xẽẽxü̃ i norü ore. Rü ngẽma norü ore rü guxü̃wama nangu, rü ñoma i naanewa rü ñoma wüxi i pumara i yixichixü̃rüxü̃ nixĩ.

15 Erü toma rü ñoma pumara i Cristu Tupanana ãxü̃rüxü̃ tixĩgü, rü togagu guxü̃wama nangu i norü ore natanüwa i ngẽma yaxõgüxü̃ rü natanüwa i ngẽma tama yaxõgüxü̃.

16 Rü ngẽma duü̃xü̃gü i tama yaxõgüxü̃ca̱x rü Tupanaarü ore rü ñoma wüxi i guxpaanexü̃ i nayuexẽẽxü̃rüxü̃ nixĩ. Natürü ngẽma yaxõgüxü̃ca̱x rü ngẽma ore rü ñoma wüxi i pumaraema i namaxẽxẽẽxü̃rüxü̃ nixĩ. Rü ngẽmaca̱x ¿texéaxü̃́ natauxcha nax nüxü̃ tixuxü̃ i ngẽma Tupanaarü ore?

17 Rü toma rü tama Tupanaarü oregu diẽru ngĩxü̃ tayaxu ngẽma muxü̃ma i togü naxügüxü̃rüxü̃. Natürü Tupanape̱xewa rü aixcüma mea nüxü̃ tixu i ngẽma norü ore, erü nüma toxü̃ nimugü rü Cristuarü tixĩgü.