Habacuc

 2 Pa Corix, Pa Tupanax, ngẽma nüxü̃ chaxĩnüxü̃ i cuchiga rü nachiga ga guxü̃ma ga yema cuxüxü̃ rü poraãcü muü̃ choxna naxã erü cuxüünexüchi.

¡Rü towa naxü ga yema mexü̃ ga ü̃pa cuxüxü̃ nax ngẽmaãcü i toma rü ta nüxü̃ tadaugüxü̃ca̱x!

Rü woo tomaxã nax cunuxü̃, natürü ¡toxü̃ nawe̱xama nax ñuxãcü cuxü̃́ tangechaü̃tümüxü̃güxü̃!

 3 Rü nüxü̃ chadau ya Cori ya Tupana i Temáü̃anewa ne naxũxü̃ nawa ya yima Paráü̃arü ma̱xpǘne.

Rü dauxü̃guxü̃ i naane rü norü üünemaxã nanapá.

Rü guxü̃ma i ñoma i naanewa ngẽxmagüxü̃ rü nüxü̃ nicua̱xüü̃gü.

 4 Rü ba̱i̱xbeanexü̃gu ngéma ne naxũ.

Rü naxme̱xwa ínaxũxũ i omüema.

Rü ngẽmawa nango̱x i ngẽma norü pora.

 5 Rü nape̱xegu nixũ i da̱xaweanegü i ãũcümaxü̃gü, rü naweama ne naxũ i üxü i poraxüchixü̃.

 6 Rü ngẽxguma iyachiãchigu ya nüma ya Tupana, rü ñoma i naane rü nidu̱xruane.

Rü ngẽxguma ñoma i naanegu nadawenügu rü ngẽma nachixü̃anegü rü naxĩã̱xãchigü, rü yima nũxcümaü̃güne ya ma̱xpǘnegü rü nabu rü nangĩãchi.

Natürü ngẽma Cori ya Tupana nagu rüxĩnüxü̃ rü taguma inarüxo.

 7 Rü choma i Abacú rü nüxü̃ chadau i duü̃xü̃gü i ĩane ya Cucháü̃cüã̱xgü i chixexü̃gu yixü̃.

Rü nüxü̃ chadau i ngẽma Madiáü̃anecüã̱xgü i norü muü̃maxã naxããchipütagüxü̃.

 8 ¿Pa Corix, namaxã cunu ẽ̱xna i ngẽma natügü?

¿Rü ngẽxgumarüxü̃ ta ẽ̱xna namaxã cunu i ngẽma már?

¿Rü ngẽmaca̱x curü cowarugügu quitoe rü ngẽxma márétügu namaxã cuyarüñaü̃xü̃wetaü̃xü̃ rü nagu quixũxü̃ ya yima curü caru ya guxü̃guma namaxã curüporamaene?

 9 Rü curü würa rü ínamemare nax cunamaxgüxü̃ca̱x ya guxü̃nema ya cuxnegü.

Rü ñoma i naane rü natügümaxã cunawaixcuane.

10 Rü ngẽxguma cuxü̃ nadaugügu ya ma̱xpǘnegü rü nidu̱xruxe.

Rü dauxü̃guxü̃ i naanewa rü tacü ya pucü narüngu.

Rü ngẽma már i mátamaxü̃ rü poraãcü naxãũgaãchi namaxã ya norü yuape ya tacü.

11 Rü yima üa̱xcü rü yima tauemacü rü ínayachaxãchigü i ngẽxguma nüxü̃ nadaugügu ya yima cuxnegü ya iyauracüügüne rü curü wocae ya iyauracüücü.

12 Rü curü numaxã rü guxü̃ma i ñoma i naanegu ícuyaxüegu.

Rü curü numaxã nixĩ i nagu cupúgüexü̃ i ngẽma nachixü̃anegü.

13 Rü cuma rü dauxü̃wa ícuxũxũ nax curü duü̃xü̃güxü̃ ícupoxü̃xü̃ca̱x, rü nüxü̃ nax curüngü̃xẽẽxü̃ca̱x ya yimá ãẽ̱xgacü ya cumatama nüxü̃ cuxunetacü.

Rü cuma rü cuyama̱x i ngẽma ãẽ̱xgacü i chixexü̃ üxü̃ rü nagu cupogü i nachixü̃ane ñoma wüxi ya ĩpatagu ipogüxü̃rüxü̃.

14 Rü cumax, Pa Tupanax, rü noxrütama naxnegümaxã cuyama̱x ga yema ãẽ̱xgacü ga chixexü̃ üxü̃ ga yexguma norü churaragümaxã curü duü̃xü̃güca̱x íyaxüãchigu nax ñoma buanecü ya taxüchicürüxü̃ nawoonexẽẽãxü̃ca̱x ga curü duü̃xü̃gü ga tama poraexü̃ nax nügü ínapoxü̃güxü̃.

15 Rü cuma rü curü cowarugümaxã nagu ícuyagoegu i ngẽma már rü ngẽmaãcü poraãcü cunayuapexẽxẽ i ngẽma taxüchixü̃ i norü dexá.

16 Rü yexguma nüxü̃ chaxĩnügu ga yema ãũcümaxü̃ i tá cuxüxü̃ rü chamuü̃, rü poraãcü chidu̱xruchicüra.

Rü taxucürüwa ichachi rü guxü̃ma i chauxune rü ínayaturaãchi.

Natürü woo ngẽmaãcü nax yixĩxü̃ rü mea tá íchananguxẽxẽ i ngẽma ngunexü̃ ya Tupana tá nagu guxchaxü̃ naxca̱x íngu̱xẽẽxü̃ i ngẽma churaragü i chixexü̃ tamaxã ügüxü̃.

17 3:17-18 Rü woo i ngẽma igunecü rü yangechacugu, rü woo i ngẽma úba rü ngẽma oribu rü nangearü õõ̱xgu,

rü woo ngẽma naanegüwa rü nataxuxguma i ori̱x i buxgüxü̃, rü woo nayuegu i ngẽma carnérugü i nachitaxü̃wa, rü woo marü nataxuxguma i wocagü i naxpüü̃wa,

natürü i choma rü taãẽãcüma ta nüxü̃ chicua̱xüxü̃ ya Cori ya Tupana ya chorü maxẽẽruxü̃. 18 Nüü̃ nadau 3:17

19 Erü nüma ya Cori ya Tupana rü pora choxna naxã, rü ñoma wüxi i cowü i poraxü̃rüxü̃ choxü̃ naporaxẽxẽ.

Rü wüxi ya ma̱xpǘneétüwa tá choxü̃ naga rü ngéma tá choxna nadau nax taxuxü̃ma choxü̃ naxüpetüxü̃ca̱x.*