Santiago
Tama name i ñoma i naanewa ngẽxmaxü̃ i chixexü̃gu tamaxẽ
4 ¿Ngexta ne naxũ nax pegümaxã penuexü̃ rü pegü pedaixü̃? Dücax, guxü̃ma i ngẽma rü perü ngúchaü̃gü i chixexü̃ i pewa ngẽxmagüxü̃wa nixĩ i ne naxũxü̃.
2 Pema penaxwa̱xe i ngẽma pexü̃́ taxuxü̃, natürü taxuacüma pexü̃ nanguxü̃. Rü ngẽmaca̱x peyama̱x i togü. Rü norü ngẽmaxü̃ca̱x pixãũxãchie, natürü taxuacüma pexü̃ nanguxü̃, rü ngẽmaca̱x pegümaxã penue, rü pegü pedai. Rü tama penayauxgü i ngẽma penaxwa̱xexü̃ erü tama Tupanana naxca̱x peca.
3 Rü ngẽxguma naxca̱x ípecaxgu, rü tama penayaxu, erü naxca̱x ípeca i ngẽma tama Tupana pexü̃́ naxwa̱xexü̃. Rü ngẽma pematama penaxwa̱xexü̃ nixĩ i naxca̱x ípecaxü̃ nax namaxã pegütama petaãẽxẽẽmarexü̃ca̱x.
4 Pa Duü̃xü̃gü i Chixri Maxẽxü̃x, ¿Tama ẽ̱xna nüxü̃ pecua̱x rü ngẽxguma ñoma i naanewa ngẽxmaxü̃ i chixexü̃güxü̃ pengechaxü̃gügu rü Tupanamaxã perüxuanügu? Erü texé ya ñoma i naanewa ngẽxmagüxü̃ i chixexü̃güxü̃ ngechaü̃güxe rü Tupanamaxã tarüxuanügü.
5 Rü tama natüca̱xma nixĩ i ngẽma Tupanaarü ore i ñaxü̃:
“Tupanaaxü̃́ nachu̱xu i ngẽma taãxẽ i tüxna namuxü̃”,
ñaxü̃.
6 Natürü Tupana rü tüxü̃ narüngü̃xẽxẽ nax tama nagu iyixü̃ca̱x i ngẽma ngúchaü̃gü i chixexü̃gü i ñoma i naanewa ngẽxmagüxü̃. Rü ngẽmaca̱x norü orewa rü ñanagürü:
“Tupana rü tümamaxã nanu ya yíxema tügü icua̱xüü̃güxe, natürü tüxü̃ narüngü̃xẽxẽ ya yíxema tügüna daugüxe nax tama tügü ticua̱xüü̃güxü̃ca̱x”,
ñanagürü.
7 Pa Chauenexẽgüx, ¡Mea Tupanaga pexĩnüe! ¡Rü nüxü̃ pexoó i ngo̱xo i Chataná! Rü nüma rü tá pexna niña.
8 ¡Tupanana pengaicamagü! Rü nüma rü tá ta pexna nangaicama. Rü pemax, Pa Pecaduã̱xgüxü̃x, ¡nüxü̃ perüxoe i pecüma i chixexü̃! Rü pemax, i Tupanawe rüxĩxchaü̃xẽ natürü ñoma i naanewe rü ta rüxĩxchaü̃xẽ, ¡penamexẽxẽ̱x i perü maxü̃ nax Tupanaca̱xicatama pemaxẽxü̃ca̱x!
9 ¡Pegümaxã pengechaü̃gü rü pexauxe erü pipecaduã̱xgü! Rü yíxema ñu̱xma chixexü̃gagu cugüexe rü name nixĩ i tügümaxã taxauxe. Rü yíxema chixexü̃maxã taãẽgüxe, rü name nixĩ i Tupanape̱xewa tügümaxã tangechaü̃gü.
10 Rü name nixĩ i Cori ya Tupanape̱xegu pegü íperüxíragü. Rü nüma rü tá pexü̃ nicua̱xüxü̃ rü pexü̃ nataxẽxẽ.
Tama name i chixexü̃gu cuenexẽmaxã curüxĩnü
11 Pa Chauenexẽgüx, ¡Taxṹ i chixexü̃maxã pegü pixugüxü̃! Erü yíxema chixexü̃maxã tümaenexẽchigagu idexáxe rüe̱xna chixexü̃maxã nüxü̃ dawenüxẽ, rü chixexü̃ nüxü̃ tawogü ta i Tupanaarü mugü. Rü ngẽxguma chixexü̃gu Tupanaarü mugümaxã curüxĩnügu, rü Tupanaarü mugüarü yexera cugü quixĩxẽẽchaü̃, rü tama aixcüma naga cuxĩnü.
12 Tupanaxicatama nixĩ ya tüxna naxãcü i norü mugü, rü ñu̱xũchi nümatama nixĩ i cagüruxü̃ yixĩxü̃. Rü nümatama nixĩ i nüxü̃́ nangẽxmaxü̃ i pora nax tüxü̃ namaxẽxẽẽxü̃ rü ẽ̱xna tüxü̃ napoxcuexü̃. ¿Rü texé quixĩxü̃ i cumax rü ngẽmaca̱x cunangugüxü̃ nax ñuxãcü namaxü̃xü̃ i cumücü?
Taxúema nüxü̃ tacua̱x nax ta̱xacü tá tüxü̃ ngupetüxü̃ i moxü̃arü ngunexü̃gu
13 ¡Choxü̃́ iperüxĩnüe i pema nax ñapegügüxü̃: “Ñu̱xma rüe̱xna moxü̃ tá nai ya ĩanewa taxĩ, rü wüxi ya taunecü tá ngẽxma tayayaxu, rü tá ngéma tataxegü nax mucü i diẽru ngĩxü̃ iyaxuxü̃ca̱x”, ñaperügügü!
14 Pema rü tama nüxü̃ pecua̱x nax ta̱xacü tá pexü̃ üpetüxü̃ i moxü̃. ¿Ta̱xacü nixĩ i perü maxü̃? Perü maxü̃ rü tá inayarüxo ñoma wüxi i cherena i paxaãchi nüxü̃ idauxü̃ rü ngẽxgumatama ngupetüxü̃rüxü̃.
15 Rü narümemae nixĩ nax ñapegüxü̃: “Ngẽxguma chi nanaxwa̱xegu ya Cori ya Tupana nax imaxẽxü̃, rü chi tanaxü i ngẽma puracü i nagu rüxĩnüexü̃”, ñapegüxü̃.
16 Natürü i pema rü ngẽxguma pidexagügu rü pegü picua̱xüü̃gü. Rü guxü̃ma i ngẽma nax pegü picua̱xüü̃güxü̃ rü tama name.
17 Yíxema nüxü̃ cuáxe nax mexü̃ taxüxü̃, natürü tama naxǘxe, rü pecadu taxü.