Meã cugü ínameẽẽ na nawa cungúü̃caꞌ

Ngẽguma Tupanaarü Orecaꞌ ínguꞌegu, tanawaꞌegü na Yeuwaarü ĩnügü rü aicuma torü maü̃newa nanguü̃. Édra wüi meü̃ i cuaꞌruü̃ niĩ erü naãẽwa nügü ínameẽẽ na Yeuwaarü mugüwa nanguꞌü̃caꞌ. (Esd. 7:10) Nhuãcü tá ngẽmaãcü tanaügü?

Nayumüẽ. Naü̃pa na icunaügüü̃ i nawa cunguꞌ rü Yeuwamaã nidea. Nacaꞌ ínaca na nüma rü cuü̃ narüngü̃ẽẽ na meã nüü̃ cucuaꞌü̃caꞌ rü ngẽmagu cuũü̃caꞌ. — Sal. 119:18, 34.

Cugü írüíra. Tupana natchawa nanacú i Tupanaarü Ore i aicumagüü̃ i ngẽma duü̃ü̃gü i nügü írütagüü̃ rü nagu narüĩnüẽ na tama nanawaꞌegü i ngü̃ẽẽ na nüü̃ nacuaꞌgüü̃caꞌ i Tupanaarü Ore. (Luca 10:21) Rü tama tanawaꞌegü nacaꞌ ingúeü̃ i Tupanaarü Ore na togüe tamaã ibaiꞌãtchigüü̃caꞌmare. Rü ngẽguma nüü̃ quicuaꞌãtchigu i ngéma nawaꞌe cunaütchicüü i cucüma, rü cugü írüíraãcü cunaütchicüü i ngẽma.

Nüü̃ naĩnü i wüi i torü wiyae. Rü wiyae rü naporaãü̃ na nanaütchicüüü̃caꞌ i torü ĩnü. Nüü̃ naĩnü i wüi wiyae naü̃pa na cungúü̃ rü cuü̃ narüngü̃ẽẽ tá na meã Yeuwagu curüĩnüü̃caꞌ na nanatautchaü̃caꞌ na curü maü̃ne niwãnaü̃caꞌ na ngẽmaãcü yeeraãcü meã nüü̃ cucuaꞌü̃caꞌ.