Rí na̱jkha̱ inún Romanos
10 A̱ngui̱nʼ rí nandoʼ ga̱jma̱a̱ xúgíʼ a̱jkiu̱nʼ ga̱jma̱a̱ natakáñuu Dios dí ikhiin maguma káwíin. 2 Numuu dí nda̱yo̱o̱ dí ikhiin nduyamajkuíí Dios, mú raʼkháa ga̱jma̱a̱ mbá ku̱ma̱ jmbu. 3 Numuu rí túniʼnuuʼ dí Dios ndaʼyoo dí nindxu̱u̱ májánʼ ga̱jma̱a̱ nigíʼ nini̱ xóo nindúún ikhiin, ikha jngóo túnimbu̱u̱n náa dí nindxu̱u̱ májánʼ náa inuu Dios. 4 Numuu rí Cristo niʼni rí xágiʼdoo numuu Xtángoo, mú xúgíinʼ bi̱ gáguaʼdáá fe maguánú mani̱ndxu̱ún xa̱bu̱ jmbiin.
5 Moisés niʼnirámáʼ rí xú káʼnii mbáa xa̱bu̱ ma̱ndoo mani̱ndxu̱u̱ jmbii xó má eʼthí náa Xtángoo: “Xa̱bu̱ bi̱ naʼni rígi̱ maxtáa numuu rí naʼnimbánuu”. 6 Mú rí jmbu rí na̱ʼkha̱ náa fe naʼthí xúgi̱ kaʼnii: “Xárata náa awúu̱n a̱jkia̱a̱nʼ ‹tsáá gátsimuu mekhuíí rá.› Xóo muʼthá rí maʼni magajtaa Cristo. 7 Ni má xárata ‹tsáá gágajtaa náa iñá mbiʼ›, xóo muʼthá mu maʼni magajnáa Cristo náa majñúnʼ wajinʼ”. 8 Mú náa kiʼnirámáʼ naʼthí: “Ajngáa rígá mijngii náa ikháán, náa rawaanʼ, náa a̱jkia̱a̱nʼ” xóo muʼthá “ajngáa” rí na̱ʼkha̱ ga̱jma̱a̱ numuu fe dí ikháanʼ nutaráʼaxu. 9 Numuu rí á mu naratá pa̱jnu rí Jesús nindxu̱u̱ Tátá ga̱jma̱a̱ náa a̱jkia̱a̱nʼ natasngájma rí xtaʼdáá fe rí Dios nikujxi̱i̱* náa majñúnʼ wajinʼ, makríña̱a̱nʼ. 10 Numuu rí ga̱jma̱a̱ a̱jkiu̱lú nusngajmá rí kuaʼdáá fe rí na̱jkha̱ kaguáánʼ manindxu̱lú xa̱bu̱ jmbii, mú ga̱jma̱a̱ rawunlú nuʼthá pa̱jnu rí ma’ni makáwáánʼ.
11 Náa Kiʼniraʼmáʼ naʼthí: “Nimbáa bi̱ gágiʼdoo fe náa ikhaa xájmáa a̱jkiu̱u̱n”. 12 Numuu rí mbríguiin judíos ga̱jma̱a̱ griegos. Numuu rí mbáwíí Tátá ndrígu̱ún bi̱ naxnún dí májánʼ xúgíinʼ bi̱ nugríga̱a̱. 13 Numuu rí “xúgíinʼ bi̱ gúgriga̱a̱ mbiʼyuu Jeobá* makáwíin”. 14 Mú, xú káʼnii gúgríga̱a̱ mbáa á mu raguáʼdáá fe náa ikhaa xá. Xú káʼnii gúguáʼdáá fe náa ikhaa á mu túdxawíín nditháan ga̱jma̱a̱ numuu xá. Xú káʼnii gúdxawíín ga̱jma̱a̱ numuu á mu nda̱wa̱a̱ tsáa gáʼtáruʼúún xá. 15 Xú káʼnii gútaraʼa á mu nda̱wa̱a̱ tsáa ekunguiinʼ xá. Xó má kiʼnirámáʼ: “¡Ra̱ʼkhá tháán mitsaanʼ rajkúún bi̱ nagún ku̱ñu̱u̱n ajngáa rí májánʼ!”.
16 Mú raʼkháa xúgíinʼ ninimbu̱u̱n náa ajngáa rí májánʼ, numuu rí Isaías naʼthí: “Jeobá,* tsáá niʼnimbo̱o̱ náa ajngáa rí niʼtálu rá.” 17 Fe narígá índo̱ mbáa naʼdxawuun ajngáa, naʼdxawuun ajngáa índo̱ mbáa naʼthí ga̱jma̱a̱ numuu Cristo. 18 Mú ikhúúnʼ narajxi̱: Lá túdxawíín ráʼ. Nidxawíínla numuu dí “náa xúgíʼ ku̱ba̱ʼ niwán ri̱go̱o̱ ajngóo, asndu náa nartumuu ku̱ba̱ʼ niwán ajngóo”. 19 Mú ikhúúnʼ narajxi̱: Lá tákro̱ʼo̱o̱ Israel ráʼ. Moisés naʼthí: “Majmiuʼ xa̱bu̱ bi̱ kúwá náa i̱ʼwáʼ xuajen mu ma̱ni̱ rí ikháanʼ makiʼnáanʼla. Majmiuʼ mbá xuajen bi̱ tséndxa̱ʼóo májánʼ edxu̱u̱ mu ma̱ni̱ rí ikháanʼ makásngañala”. 20 Mú Isaías támiñuu índo̱ niʼthí rígi̱: “Bi̱ túñúunʼ nixkamún, bi̱ túrajxi̱ ga̱jma̱a̱ numuʼ niguánú niniʼniúnʼ”. 21 Mú naʼthí ga̱jma̱a̱ numuu Israel: “Xúgíʼ mbiʼi nikruíyaʼ ñawúnʼ náa mbá xuajen bi̱ tséʼnimbo̱o̱ ga̱jma̱a̱ gújkhúʼ a̱jkiu̱u̱n”.